İQTİSADİYYAT
Əmlak Məsələləri Dövlət Komitəsi ötən ili yeniliklərlə başa vurub
Bakı, 30 yanvar, AZƏRTAC
Əmlak Məsələləri Dövlət Komitəsində 2014-cü ilin yanvar-sentyabr aylarında görülmüş işlər və qarşıda duran vəzifələrə dair geniş müşavirə keçirilib.
AZƏRTAC xəbər verir ki, müşavirədə çıxış edən komitə sədri Kərəm Həsənov görülmüş işləri xatırladaraq ilin uğurlu olduğunu bildirib. Komitə hüquqi maarifləndirmə, aşkarlıq, optimal daşınmaz əmlak idarəçiliyinin və göstərilən xidmətlərdə yüksək keyfiyyətin təmin olunması istiqamətində ardıcıl tədbirləri davam etdirib.
Kərəm Həsənov vurğulayıb ki, 2014-cü ildə komitənin fəaliyyətində əsas istiqamət informasiya texnologiyalarının, elektron xidmətlərin tətbiqini genişləndirmək, vətəndaşlara daha rahat və çevik xidmətlər təqdim etmək olub. Həyata keçirilən tədbirlər korrupsiya amilinin aradan qaldırılması, xidmət davranışının yüksəlməsi, vətəndaş-məmur ünsiyyətinin şəffaflaşması ilə nəticələnib.
Qeyd olunub ki, komitə ötən ildə mühüm sosial yenilikləri tətbiq etməklə bir sıra uğurlara imza atıb. Fəaliyyət sahələri üzrə elektron xidmətlər, daşınmaz əmlakın qeydiyyatında tətbiq edilən yeniliklər, Ünvan Reyestri İnformasiya Sisteminin tətbiqi, kadastr sisteminin inkişafı komitənin mühüm nailiyyətləridir.
Komitə sədri 2014-cü ildə tətbiq edilən iki mühüm yeniliyə diqqət çəkib ki, bunlar “onlayn” və mobil ofis xidmətləridir. Bildirilib ki, “onlayn” xidmətlərin və ölkə üzrə mobil ofis xidmətlərinin göstərilməsi şəffaflığın yüksəlməsini, rahatçılığı və vaxta qənaət olunmasını birbaşa təmin edib. Artıq vətəndaşlar ərazi qeydiyyat idarələrinə getməyərək daşınmaz əmlaka dair yüklülük arayışlarını (Forma-1) “onlayn” rejimdə əldə edirlər. Eyni zamanda, digər xidmət isə vətəndaşlara, fiziki və hüquqi şəxslərə malik olduqları daşınmaz əmlak barədə dövlət reyestrində olan məlumatı “onlayn” əldə etməyə imkan verir. Mobil ofislər isə qeydiyyat xidmətlərinin vətəndaşların və xüsusi sosial təbəqədən olan insanların ünvanına rahat və çevik şəkildə çatdırılmasını təmin edir.
Ölkə başçısının müvafiq fərmanına əsasən, komitə ötən ilin noyabrından “kütləvi çıxarış kampaniyası”na da start verib. Belə ki, vətəndaşların əvvəllər əldə etdiyi mülkiyyət sənədləri (mülkiyyət hüquqlarını təsdiq edən aktlar, şəhadətnamələr və qeydiyyat vəsiqələri) dövlət reyestrindən çıxarışlarla əvəz olunur. Kampaniyanın mühüm üstünlüyü isə bu çıxarışların vətəndaşlara məhz mobil ofislər vasitəsilə yerlərdə təqdim olunmasıdır.
Vətəndaşların mülkiyyət hüquqlarının təmin olunması və onların hüquqi biliklərinin artırılmasından bəhs edərkən komitə sədri 2014-cü ildə respublika üzrə keçirilən maarifləndirmə tədbirlərini və “Açıq qapı” günlərini qeyd edib. Belə tədbirlərdə qeydiyyat və kadastr prosesinin praktik tərəfləri və prosedurları, qanunvericiliyin tələbləri izah olunub, qeydiyyatın sosial-iqtisadi səmərələri ictimaiyyətə çatdırılıb, vətəndaşların sualları cavablandırılıb. Ötən ildə Lənkəran, Mingəçevir, Şamaxı, Şirvan, Bərdə, Xaçmaz, Beyləqan, Abşeron və Sumqayıtda hüquqi maarifləndirmə tədbirləri və “Açıq qapı” günləri keçirilib.
Komitə sədri çıxışında dövlət başçısının daşınmaz əmlakın qeydiyyatı ünün tələb olunan sənədlərin siyahısını təsdiq edən, 13 yanvar 2015-ci il tarixli Fərmanına da toxunub. Bildirilib ki, bu fərmanla daşınmaz əmlakın qeydiyyatı ilə bağlı hüquqi təminat və qanunvericilik bazası daha da təkmilləşdirilib. Bununla da, qeydiyyat prosesinin hüquqi dairəsi əhəmiyyətli dərəcədə genişləndirilib. Qeyd olunub ki, fərman ərazi qeydiyyat idarələrinin fəaliyyətinin səmərəliliyinə, çevikliyin və rahatlığın təmin olunmasına səbəb olub.
Müşavirədə vurğulanıb ki, komitədə fəaliyyətin müasirləşdirilməsi məqsədilə kompleks İKT tədbirləri davam etdirilir. Belə ki, ötən il hazırlanmış İKT strategiyası bu il uğurla tətbiq edilir. Hazırda daşınmaz əmlakların vahid elektron informasiya sisteminin yaradılması üzərində işlər aparılır. Bu məqsədlə, hazırda Bakı şəhərində İnformasiya Texnologiyaları və Məlumat İdarəetmə Mərkəzinin tikintisi davam etdirilir.
Daşınmaz əmlak idarəçiliyi, əmlakın qeydiyyatı, özəlləşdirmə və hərraclarla bağlı tətbiq edilən elektron xidmətlərin sayı ötən ildə artırılıb. 2014-cü ildə komitənin fəaliyyət sahələri üzrə 14 yeni elektron xidmətin yaradılması təmin edilib. Hazırda 4 informativ və 27 interaktiv olmaqla 31 elektron xidmət vətəndaşların istifadəsindədir. Qeyd olunan interaktiv xidmətlərə səhmdar cəmiyyətlərin səhmlərinin, kiçik dövlət müəssisə və obyektlərin, yarımçıq tikililərin, dövlət qurumlarının balansında olan nəqliyyat vasitələrinin özəlləşdirilməsinə dair keçirilən hərraclarla bağlı e-xidmətlər aiddir. Bu xidmətlər sayəsində artıq dövlət əmlakının özəlləşdirilməsi ilə bağlı hərraclarda iştirak üçün sifarişlər elektron qaydada qəbul edilir. Dövlət əmlakının qorunub saxlanması, idarə edilməsi və istifadə vəziyyəti ilə bağlı hesabatlar, dövlət əmlakının icarəsi üzrə xidmət haqqı, daşınmaz əmlaka dair çıxarışlar, ipoteka, lizinq əməliyyatlarının qeydiyyatı və ləğvi, daşınmaz əmlakın dövlət reyestrindən məlumatların verilməsinə dair e-xidmətlər də fəaliyyət göstərir. Bütün elektron xidmətlər “Elektron hökumət” portalına inteqrasiya edilib. Ümumilikdə, indiyədək komitənin qurumlarına 158 mindən çox elektron müraciət daxil olub.
Müşavirədə bildirilib ki, Ünvan Reyestri İnformasiya Sisteminin Bakı şəhərinin Səbail, Yasamal, Binəqədi, Xətai, Nərimanov, Nizami rayonları üzrə 60 küçədə tətbiqinə başlanılıb. Bu məqsədlə dövlət orqanlarının malik olduqları informasiya sistemləri Ünvan Reyestri İnformasiya Sistemi ilə inteqrasiya edilir.
Daşınmaz əmlakın qeydiyyatı sahəsində xüsusi sosial təbəqədən olan insanlar üçün ötən ildən tətbiq edilən mobil ofis xidmətləri üçün xüsusi avadanlıqlarla təchiz edilmiş 22 nəqliyyat vasitəsi alınıb. Hazırda paralel olaraq respublikanın bütün regionları üzrə mobil ofis xidmətləri göstərilir. Daxil olan müraciətlər əsasında indiyədək Bakı və regionlarda mobil ofislər vasitəsilə 16 minə yaxın vətəndaşa qeydiyyat xidmətləri göstərilib.
Komitə 2014-cü ilin noyabr ayından daşınmaz əmlak üzərində əvvəllər yaranmış mülkiyyət hüquqlarına dair sənədlərin kütləvi şəkildə çıxarışlarla əvəz olunması kampaniyasına başlayıb. Kampaniya Saatlı, Şəmkir, Abşeron, Cəlilabad, Qəbələ və Şəkidə keçirilib və ümumilikdə 1600-ə yaxın vətəndaşın mülkiyyət sənədləri dövlət reyestrindən çıxarışlarla əvəz edilib.
2014-cü ildə vətəndaşların qəbulu və müraciətlərinin təmin olunması komitədə daim diqqətdə saxlanılıb. Əmlak Məsələləri Dövlət Komitəsinin sədri tərəfindən keçirilmiş 12 vətəndaş qəbulunda 400-ə yaxın vətəndaş qəbul edilib.
Ötən il ərzində də dövlət qulluqçularının etik davranış qaydalarına riayət olunması işi nəzarətdə saxlanılıb. Komitədə çalışan dövlət qulluqçuları üçün “Dövlət qulluqçularının etik davranış qaydaları”, “İnformasiya azadlığının təmin edilməsi” mövzusunda seminarlar keçirilib.
Fəaliyyət sahələri üzrə vətəndaşların sorğularının operativ cavablandırılması məqsədi ilə fəaliyyət göstərən komitənin aparatında 193, Daşınmaz Əmlakın Dövlət Reyestri Xidmətində 148 və Hərracların Təşkili üzrə Auksion Mərkəzində 566-07-44 nömrəli qaynar xətlər üzrə cəmi 4167 müraciət daxil olub.
Ötən ilin iyun ayında Əmlak Məsələləri Dövlət Komitəsinin rəsmi internet səhifəsinin müasir texnologiyalar əsasında dizayn və keyfiyyət baxımından təkmilləşdirilmiş yeni versiyası istifadəyə verilib.
Beynəlxalq əməkdaşlıq sahəsində Dünya Bankı, BMT-nin Avropa İqtisadi Komissiyası, Almaniyanın KfW Bankı, İsveçrənin İqtisadi Əməkdaşlıq Katibliyi (SEKO), Almaniya Beynəlxalq Əməkdaşlıq Cəmiyyəti (GİZ), Norveç Kadastr Təşkilatı, “Eurogeografics” təşkilatları ilə əməkdaşlıq davam etdirilib. Əmlak Məsələləri Dövlət Komitəsi sədrinin rəhbərlik etdiyi nümayəndə heyəti Cenevrə şəhərində BMT Avropa İqtisadi Komissiyasının Mənzil Təsərrüfatı və Daşınmaz Əmlakın İdarə Edilməsi Komitəsinin iclasında, BMT-yə üzv dövlətlərin əmlak idarəçiliyi nazirlərinin görüşündə, Geoməkan Dünya Forumunda, habelə forum çərçivəsində təşkil edilmiş beynəlxalq konfransda iştirak edib. Bu ilin sentyabr ayında Əmlak Məsələləri Dövlət Komitəsi sədrinin Almaniyanın daşınmaz əmlakın özəlləşdirilməsi və idarə edilməsi qurumunun nümayəndə heyəti ilə görüşü keçirilib. Oktyabr ayında komitə sədrinin rəhbərlik etdiyi nümayəndə heyəti Cenevrə şəhərində keçirilmiş Mənzil Təsərrüfatı və Daşınmaz Əmlakın İdarə Edilməsi Komitəsinin 75-ci sessiyasında iştirak edib.
Hesabat dövründə 5680-ə yaxın dövlət müəssisə və təşkilatı “Dövlət əmlakının qorunub saxlanılması və ondan səmərəli istifadə vəziyyəti haqqında illik xüsusi hesabat forma”sını təqdim ediblər. Bunlardan 2400-dən çoxu elektron xidmət vasitəsilə təqdim edilib.
Komitənin sərəncamında olan dövlət müəssisələrindən 55-i və dövlətə məxsus səhmləri olan səhmdar cəmiyyətlərindən 205-i illik balans hesabatlarını təqdim ediblər.
Komitə sədri sonda qarşıda duran vəzifələrlə bağlı tapşırıqlarını səsləndirib. O, şəffaflığın və səmərəliliyin artırılması, müasir idarəetmə və nəzarət üsullarının tətbiqi, elektron xidmətlərin, mobil ofislərin genişləndirilməsi, etik davranış qaydalarına riayət olunması, vətəndaş məmnunluğunun yüksəldilməsi istiqamətində tövsiyələr verib. Komitə sədri dövlət əmlakının özəlləşdirilməsi, idarə edilməsi və icarəsi, daşınmaz əmlakın qeydiyyatı sahələrində, elektron kadastr məlumat sistemi və ünvan reyestri sisteminin tətbiqində fəaliyyəti sürətləndirməyi tapşırıb.