İQTİSADİYYAT
Ankarada TANAP layihəsini boru kəmərləri ilə təmin edəcək şirkətlərlə müqavilə imzalanıb
AZƏRTAC xəbər verir ki, mərasimdə Türkiyə Respublikasının Baş naziri Əhməd Davudoğlu, enerji və təbii ehtiyatlar naziri Taner Yıldız, Azərbaycan Respublikası Dövlət Neft Şirkətinin (ARDNŞ) prezidenti Rövnəq Abdullayev və digər rəsmi şəxslər iştirak ediblər.
Bu gün bir çox ölkələrdə problemlər yaşanarkən, Türkiyə və Azərbaycanın bölgədə yüksələn iki ölkə olduğunu vurğulayan Ə.Davudoğlu TANAP layihəsi ilə ilk mərhələdə 16 milyard kubmetr təbii qazın daşınacağını, daha sonra isə bu həcmin 22, 24 və 32 milyard kubmetrə qədər çatdırılacağını deyib. O, TANAP layihəsi ilə Türkiyənin istehlakçı ölkə olmaqla yanaşı, tranzit ölkəyə də çevriləcəyini və 2019-cu ildən etibarən Avropaya qaz nəqlinə başlayacağını bildirib.
Baş nazir Xəzər dənizindən başlayan layihənin Türkiyə ilə Yunanıstanın sərhədində “Trans-Adriatik” boru kəmərinə (TAP) birləşərək Albaniya vasitəsilə, Adriatik dənizindən keçməklə İtaliyanın cənubuna, oradan da Qərbi Avropaya keçəcəyini vurğulayıb. Qeyd edilib ki, Azərbaycanın “Şahdəniz-2” yatağından çıxarılan qaz Şərqi Avropa ölkələrinin də təbii qaza olan tələbatını ödəyəcək.
Mərasimdə çıxış edən ARDNŞ-in prezidenti Rövnəq Abdullayev deyib ki, TANAP layihəsi ilə Türkiyə Şərq-Qərb arasında enerji dəhlizinə çevriləcək. Layihə çərçivəsində 15-20 min insana yeni iş imkanı yaradılacağını qeyd edən R.Abdullayev Türkiyənin boru istehsalı və boru inşaatı sektorunun inkişafına və əldə edəcəyi digər faydalara da diqqət yönəldib.
Qeyd olunub ki, layihədə təxminən 1800 kilometrlik əsas boru kəməri üçün elan edilən tenderin 80 faizini altı türk şirkəti qazanıb. TANAP-da istifadə olunacaq təxminən 1,2 milyon ton polad borunun üçdə birini “Borusan Mannesmann”, “Noksel Çelik” və “Erciyas Çelik” şirkətlər konsorsiumu təmin edəcək. Boruların daşınmasının 24 ayda tamamlanması gözlənilir.
Sonra “TANAP Qaz Transmissiya A.Ş.” ilə Türkiyənin “Borusan Mannesmann Boru San. Tic. A.Ş.” - “Noksel Çelik Boru Sanayi A.Ş.” - “Erciyas Çelik Boru Sanayi A.Ş.” şirkətlər konsorsiumu, “Ümran Çelik Boru Sanayii A.Ş.” - “Emek Boru Makina Sanayi ve Ticaret A.Ş.” şirkətlər konsorsiumu, “Tosçelik Profil ve Sac Endüstrisi A.Ş.” şirkəti, həmçinin Çinin “Baosteel Europe” podratçı şirkəti ilə müqavilələr imzalanıb.
Qeyd edək ki, TANAP-ın 2018-ci ildə istismara verilməsi planlaşdırılır.