Aprel ayının sonuna kimi Bakı Metropolitenində yeni qatarların xəttə buraxılacağı gözlənilir VİDEO
Bakı, 17 aprel, Gülnar Bəşirova, AZƏRTAC
Aprelin 17-də Bakı Metropoliteninin Nəriman Nərimanov adına elektrik deposunda metropolitenin qatar parkının yenilənməsi məqsədilə paytaxta gətirilən yeni qatarlarda yaradılan şəraitlə tanışlıq məqsədilə mediatur təşkil edilib.
AZƏRTAC xəbər verir ki, “Bakı Metropoliteni" QSC-nin mətbuat xidmətinin rəhbəri Nəsimi Paşayev son vaxtlar Bakı Metropolitenində aparılan abadlıq işləri ilə, gətirilən yeni qatarlarla bağlı məlumat verib.
Nəsimi Paşayev bildirib ki, Bakı Metropolitenin qatar parkının yenilənməsi məqsədilə dəmir yolu infrastrukturunda dünyada aparıcı mövqe tutan, böyük nüfuza malik və “Metrovaqonmaş” Səhmdar Cəmiyyətinin səhmlərinin 25 faizinin sahibi olan Fransanın “Alstom” şirkəti ilə ötən il bağlanan memorandumun şərtlərinə müvafiq olaraq, həmin şirkətlə “Bakı Metropoliteni” QSC arasında imzalanan müqaviləyə əsasən, 5 vaqondan ibarət üç qatarın alınması nəzərdə tutulub. Artıq iki qatar paytaxta gətirilib. Digəri isə bir neçə gündən sonra paytaxtda olacaq.
Yeni qatarların əvvəlkilərdən həm texniki göstəricilərinə, həm də komfortuna görə kəskin fərqləndiyini deyən Metropoliten təmsilçisi alınan qatarların texniki innovasiyalar baxımından dördüncü nəslə mənsub olduğunu diqqətə çatdırıb: “Bu nəsil qatarların idarə edilməsi mikroprosessor əsasında həyata keçirilir. Əvvəlki nəsil qatarlardan fərqli olaraq, yeni qatarların dartı mühərrikləri dəyişən cərəyanla işləyir. Əgər əvvəlki nəsil qatarların mühərriklərinin gücü 114 kilovat idisə, indi bu rəqəm 170 kilovat təşkil edir. Köhnə vaqonların çəkisinə gəlincə, əvvəllər bu göstərici baş vaqon üçün 38, aralıq vaqon üçün 36 ton təşkil edirdisə, yeni nəsil vaqonlarda baş vaqonun çəkisi 34, aralıq vaqonun çəkisi isə 29 tondur. Yeni nəsil vaqonların banı paslanmayan dəmirdəndir və bu qatarlarda əvvəlkilərdən fərqli olaraq vaqonlararası birbaşa keçid var. Vaqonlarda üç rejimdə-soyutma, havalandırma və isitmə rejimlərində çalışan sistem quraşdırılıb, “hərəkətli sətir” sistemi və təhlükəsizliyin təmin edilməsi üçün müşahidə kameraları quraşdırılıb”.
N.Paşayev qeyd edib ki, köhnə vaqonların sərnişintutma qabiliyyəti 308 sərnişin olduğu halda, yeni nəsil vaqonlarda bu göstərici 330 sərnişin təşkil edir. Əvvəlki vaqonlarda pəncərə sistemləri sadə birlaylı idi. Lakin indiki vaqonlar ikilaylı paket tiplidir və bu da sərnişinlər üçün daha yüksək komfort şərait yaradır.
QSC təmsilçisi bildirib ki, aprel ayının sonuna kimi yeni qatarların xəttə buraxılacağı gözlənilir, onların Həzi Aslanov-İçərişəhər istiqamətində hərəkət edəcəyi nəzərdə tutulur.
Hazırda Bakı Metropolitenində kifayət qədər vaqon olduğunu söyləyən Metropoliten təmsilçisi diqqətə çatdırıb ki, QSC-nin vaqon parkında 266 vaqon var və heç birinin də istismar müddəti başa çatmayıb. Lakin gələcəkdə vaqon parkını yeniləməyi düşünülür.
N. Paşayev onu da əlavə edib ki, Nəriman Nərimanov adına elektrik deposunda abadlıq işləri həyata keçirilməsinin nəticəsində qısa müddət ərzində depo ərazisində baxımsız vəziyyətdə olan park yenidən qurulub və onların istifadəsinə verilib. Eyni zamanda işçilərinin istifadəsinə verilən yeməkxanada onlar keyfiyyətli yeməklə yanaşı, xüsusi güzəştlərdən də faydalanırlar. Belə ki, bəzi kateqoriyaya aid olan işçilər pulsuz, digərləri isə Metropoliten İşçiləri Həmkarlar İttifaqının dəstəyi ilə çox ucuz qiymətə yeməklə təmin edilirlər. Bundan başqa ehtiyat avadanlıqların saxlanılması üçün böyük anbar tikilərək istifadəyə verilib.
Daha sonra Bakı Metropoliteninin Diaqnostika və Metroloji Təminat Mərkəzinin rəisi Ebazer Arslanbekov Bakı Metropoliteninin infrastrukturunun beynəlxalq standartlara uyğun yenidən qurulması istiqamətində görülən əhəmiyyətli işlərdən biri olan Diaqnostika Kompleksi haqda məlumat verib.
Qeyd olunub ki, görülmüş tədbirlər nəticəsində ABŞ istehsalı olan serverlər və fasiləsiz cərəyan təminatı, Almaniya istehsalı olan lazer optik sistemləri, Ukrayna istehsal olan cərəyan çevriciləri, Koreya və Çin istehsalı olan işçi kompüter avadanlıqları, Fransa istehsalı olan GPS - koordinasiya qurğusu ilə təchiz olunmuş həmin diaqnostika kompleksinin tətbiqi nəticəsində qatarların hərəkətinin tam təhlükəsizliyinin, səlistliyinin və sərnişindaşımanın komfortu təmin ediləcək. Bütün bu avadanlıqlar diaqnostika kompleksi şəklində Rusiyanın TBEMA firması tərəfindən yığılıb və proqram təminatı ilə təchiz edilib.
Kompleksin əsas vəzifəsi qatarların avtomatik sürət tənzimlənməsi sisteminin kod və siqnallarını nəzarətdə saxlamaqdır. Bundan başqa, Diaqnostika Kompleksinin verdiyi imkanlardan bəhrələnərək rels dövrələrində cərəyan asimmetriyasının təyin edilməsi, tunellərdə qızmaya məruz qalma ehtimalı olan bütün avadanlıq və texniki qurğulara teplovizion nəzarətin aparılması mümkündür. Kompleks, həmçinin qatarların səlis və rahat hərəkətinə maneə yarada biləcək bütün fıziki amillərin qeydiyyatı və analizinə, qüsurların qabaqcadan proqnozlaşdırılması və avtomatik nəzarətə götürülməsinə, bütün əməliyyatların xətti video şəklində qeydə alınmasına və digər tədbirlərin aparılmasına imkan verəcək.
Ebazer Arslanbekov bildirib ki, diaqnostika kompleksinin vasitəsilə Metropolitendə olan süni qurğuların, yəni infrastruktura daxil olan tikili, avadanlıq və qatarlarda olan bütün nasazlıqları qeydə almaq olar. Hətta, növbətçi ilə maşinist arasındakı rabitənin keyfiyyətini də yoxlamaq mümkündür. Diaqnostika kompleksinin uğurlu tətbiqi nəticəsində yaxın gələcəkdə qatarlarda gediş zamanı olan səs-küy də aradan qaldırılacaq.
Bölmənin digər xəbərləri
