REGİONLAR
“Aqrolizinq” ASC-nin 2014-cü ildəki fəaliyyəti və qarşıda duran vəzifələrə həsr olunmuş respublika müşavirəsi keçirilib
Bakı, 6 mart, AZƏRTAC
Martın 6–da Kənd Təsərrüfatı Nazirliyində “Aqrolizinq” ASC-nin 2014-cü ildəki fəaliyyəti və qarşıda duran vəzifələrə həsr olunmuş respublika müşavirəsi keçirilib.
AZƏRTAC xəbər verir ki, müşavirdə nazirliyin məsul işçiləri, “Aqrolizinq” ASC-nin, rayon aqroservis filiallarının rəhbərləri, alimlər, texniki nəzarət müfəttişləri iştirak ediblər.
Kənd təsərrüfatı naziri Heydər Əsədov çıxış edərək Azərbaycanda kənd təsərrüfatının inkişafından, dövlətin bu sahəyə göstərdiyi diqqət və qayğıdan, “Aqrolizinq” ASC-nin fəaliyyətindən və qarşıda duran vəzifələrdən danışıb. Bildirilib ki, əsası ümummilli lider Heydər Əliyev tərəfindən qoyulan aqrar siyasət Prezident İlham Əliyev tərəfindən uğurla davam etdirilir. Nazir qeyd edib ki, baytarlıq, fitosanitariya, aqrolizinq və digər sahələrdə göstərilən xidmətlərin fəaliyyətlərinin təkmilləşdirilməsi vacibdir.
“Aqrolizinq” ASC-nin sədri Elşən Məmmədov cəmiyyətin illik fəaliyyəti barədə məlumat verib. Bildirilib ki, 2014-cü ildə TC-5050 New Holland, Dominator-130, SR-2045 “Sampo” markalı müasir taxılyığan kombaynların, Gəncə Avtomobil Zavodundan müxtəlif gücə malik traktorların və kotanların alınması məqsədilə müqavilələr bağlanıb, 3576 ədəd müxtəlif təyinatlı kənd təsərrüfatı texnikaları alınıb və onlardan 3284 ədədi respublikaya gətirilib. Ötən il cəmiyyət tərəfindən 3345 ədəd müxtəlif təyinatlı kənd təsərrüfatı texnikası 1929 nəfər hüquqi və fiziki şəxsə lizinqə verilib və ya lizinq yolu ilə satılıb. 2014-cü ildə kənd təsərrüfatı məhsulları istehsalçılarına lizinqə verilmiş və ya lizinq qaydasında satılmış kənd təsərrüfatı texnikaları 2013-cü illə müqayisədə 37,4 faiz, o cümlədən taxılyığan kombaynlar 57,2 faiz, traktorlar 47,7 faiz, ekskavator və digər texnikalar 29,1 faiz, lizinq alanların sayı isə 33,6 faiz artıb.
Qeyd edilib ki, hesabat dövründə 38,8 min ton mineral gübrələrin və 3,63 ton pestisidlərin güzəştli satışı təmin edilib. Ümumiyyətlə, ölkə üzrə cari ilin taxıl biçinində iştirak edən 2770 ədəd taxılyığan kombayndan 1396 ədədini “Aqrolizinq” ASC-nin xətti ilə alınmış taxılyığan kombaynlar təşkil edib. 2014-cü ilin taxıl biçini mövsümünə hazırlıq çərçivəsində taxılyığan kombaynlar üçün zəruri həcmdə ehtiyat hissələrinin, 100 ədəd Dominator-130 Claas, 100 ədəd TC-5050 New Holland, 271 ədəd SR-2045 “Sampo”, 4 ədəd LZ-3A və 3 ədəd KZS-5 markalı taxılyığan kombaynın respublikaya gətirilməsi təmin edilib.
Bildirilib ki, xaricdən 7106 baş, o cümlədən 6400 baş hoştin-friz və 706 baş simmental cinsli damazlıq heyvanların və 5200 baş xırdabuynuzlu (qoyun və keçi) damazlıq heyvanların alınması üçün müqavilələr bağlanıb. Səhmdar cəmiyyət tərəfindən müqavilə şərtlərinə uyğun olaraq 927 baş holştin-friz cinsli heyvan, 1615 baş saanen cinsli keçi, 911 baş asaf cinsli qoyun, eləcə də 2013-cü ildə bağlanmış müqavilələr üzrə 1991 baş holştin-friz cinsli heyvan və 710 baş saanen cinsli keçi respublikaya gətirilərək, 50 faiz güzəştlə 3 il müddətinə lizinq yolu ilə məhsul istehsalçılarına satılıb.
Müşavirədə lizinq müqavilələrinin şərtlərinin yerinə yetirilməsi, o cümlədən lizinqə verilmiş texnikalardan istifadəyə görə ödənişlərin həyata keçirilməsi, hər bir texnika üzrə uçot sisteminin düzgün aparılması, texnikaların mövcud vəziyyəti və səmərəli istifadə olunması, mineral gübrələrin güzəştli şərtlərlə təsdiq olunmuş qaydalara uyğun sənədləşməsində mövcud nöqsanlar və satılmış mineral gübrələrin dəyərinin vaxtında ödənilməsi və digər məsələlər müzakirə edilib.
Tədbirdə hər bir rayon aqroservisinin rəhbərinin fəaliyyəti dinlənilib.
Nazir Heydər Əsədov buraxılmış nöqsan və çatışmazlıqların qısa müddətdə aradan qaldırılması və “Aqrolizinq” ASC-nin fəaliyyətinin təkmilləşdirilməsi barədə tapşırıq və tövsiyələr verib, fəaliyyətində ciddi nöqsanlara yol vermiş aqroservis filiallarının rəhbərləri barədə müvafiq tədbir görülüb.