DÜNYA
Arizona universitetində atışma: ölən və yaralananlar var
Bakı, 9 oktyabr, AZƏRTAC
ABŞ-ın Arizona ştatının Flaqstaff şəhərindəki universitet şəhərciyində baş verən atışma nəticəsində bir nəfər həlak olub, dörd nəfər yaralanıb.
AZƏRTAC Vesti.ru saytına istinadla xəbər verir ki, polis cinayəti törətməkdə şübhəli bilinən şəxsi saxlayıb. Atəş açan şəxsin kimliyi və cinayətin motivləri barədə hələ ki, heç bir məlumat yoxdur.
Flaqstaff şəhərində yerləşən Şimali Arizona Universitetinin yataqxanasında 20 min tələbə yaşayır.
Bu, ABŞ-da son ay ərzində odlu silahın istifadə olunduğu ilk insident deyil. Belə ki, oktyabrın 1-də Oreqon ştatının Rouzburq şəhərində Kris Harper Merser adlı şəxsin Umpkva kollecinin korpuslarının birində açdığı atəş nəticəsində 9 nəfər həlak olmuş, 7 nəfər isə yaralanmışdı. Bu faciədən dərhal sonra Birləşmiş Ştatların Prezidenti Barak Obama silah satışına qadağa qoyulmasının zəruriliyinə dair bəyanatla çıxış edib.