İQTİSADİYYAT


Aşqabadda Beynəlxalq Energetika Xartiyasının forumu keçirilir

Aşqabad, 30 may, Laçın Sultanova, AZƏRTAC

Türkmənistanın 2017-ci ildə Energetika Xartiyası Konfransında sədrliyi altında Beynəlxalq Energetika Xartiyasının Aşqabad forumu keçirilir.

AZƏRTAC-ın xüsusi müxbiri xəbər verir ki, “Enerji resurslarının tranziti üzrə çoxtərəfli çərçivə sazişinə doğru” adı altında keçirilən forumun məqsədi qlobal enerji təhlükəsizliyində və dayanıqlı inkişafda tranzitin rolu barədə diskussiyalar təşkil etməkdir.

Beynəlxalq Energetika Xartiyasının baş katibi Urban Rusnak məlumat verib ki, forumun işində 14 ölkənin dövlət rəsmiləri, beynəlxalq təşkilatların, sənaye sektoru və elmi müəssisələrin nümayəndələri iştirak edirlər. Forumun məqsədi enerji resurslarının tranziti üzrə çərçivə sazişini razılaşdırmaq üçün enerji resurslarının, o cümlədən təbii qaz, neft və elektrik enerjisi tranzitinin praktiki, hüquqi və tənzimləyici aspektlərini müzakirə etməkdir.

Forumun sədri, Türkmənistan Nazirlər Kabineti sədrinin müavini Maksat Babayev Beynəlxalq Energetika Xartiyasında Türkmənistanın sədrlik etməsini xatırladaraq deyib ki, energetika sahəsində beynəlxalq əməkdaşlıq onun ölkəsinin prioritetlərindən biridir. Enerji resurslarının daşınmasının təhlükəsizliyinə dair BMT-nin iki qətnaməsi məhz Türkmənistanın təşəbbüsü ilə qəbul edilib.

Forumda Avropa Komissiyasının vitse-prezidenti Maroş Şevçoviçin videomüraciəti təqdim edilib. Maroş Şevçoviç videomüraciətdə müzakirə edilən mövzunun aktuallığını, energetika infrastrukturunun zəruriliyini bildirib, keçən il Gürcüstanın iştirakı ilə Avropa Komissiyası, Azərbaycan və Türkmənistan arasında enerji resursları sahəsində qəbul edilmiş Aşqabad deklarasiyasını xatırladıb. O, enerji resurslarının şaxələndirilməsinin və bu resursların nəqlinin təhlükəsizliyinin təmin edilməsi məsələlərinin müzakirəsinin vacibliyindən danışarkən bu il fevral ayında Bakıda Cənub Qaz Dəhlizi layihəsinə həsr olunmuş görüşü nümunə göstərib.

Forum öz işini “Təbii qaz bazarları: transsərhəd daşımalar və tranzit”, “Qlobal enerji təhlükəsizliyində maye təbii qazın artan rolu”, “Neftin dünya bazarlarına çatdırılması” sessiyalarında davam etdirir. Slovakiya Respublikası İqtisadiyyat Nazirliyinin dövlət müşaviri Peter Dvorak sessiyada çıxış edib. O, Slovakiya tranzit sistemi, hazırda Slovakiyanın iştirakı ilə həyata keçirilən layihələr, o cümlədən Xəzər regionunun enerji ehtiyatları ilə bağlı layihələr barədə məlumat verib.

BP şirkətinin Cənub Qaz Dəhlizi üzrə vitse-prezidenti Cozef Merfi “Cənub Qaz Dəhlizi: transmilli qaz kəməri layihəsinin həyata keçirilməsi” mövzusunda məruzə ilə çıxış edib. C.Merfi bu layihənin strateji əhəmiyyətini vurğulayaraq bildirib ki, Xəzər regionunu Avropa ilə birbaşa əlaqələndirəcək bu layihəyə 11 şirkət külli məbləğdə sərmayə qoyub. O deyib: “layihənin unikallığı bundan ibarətdir ki, o, ilk dəfə olaraq Avropanı münasib qiymətə təbii qazla birbaşa təmin edəcək”.

BP nümayəndəsi tikinti işlərinin tam sürətlə getdiyini bildirərək qeyd edib ki, müvafiq işlər 6 ölkədə 3500 kilometrlik sahədə aparılır. 30 mindən çox insan işlə təmin edilib. C.Merfi Cənub Qaz Dəhlizi layihəsinin tərkib hissəsi olan TANAP layihəsinin reallaşdırılması üzərində ətraflı dayanaraq bildirib ki, Dünya Bankı bu layihənin reallaşdırılması üçün 400 milyon dollar ayırıb. O, Cənub Qaz Dəhlizi layihəsi çərçivəsində bir sıra sosial layihələrin reallaşdırılması barədə də məlumat verib.

Əfqanıstan nümayəndəsi TAPİ boru kəməri layihəsinin perspektivləri barədə danışıb. Çin və Yaponiya nümayəndələri maye təbii qaz bazarının inkişafı və bu sahədə qlobal ticarət perspektivləri barədə məlumat veriblər.

Aşqabad forumunda müzakirə edilən əsas mövzulardan biri Avropa Ittifaqının enerji təhlükəsizliyinin təmin edilməsində Xəzər regionunun və Mərkəzi Asiyanın rolu, transsərhəd infrastruktur layihələri, o cümlədən Bakı-Tbilisi-Ceyhan layihəsi ilə bağlı məsələlər olub.

Forumda Azərbaycanı ölkəmizin Türkmənistandakı səfiri Həsən Zeynalov təmsil edir.

Sabah forum işini davam etdirəcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.