CƏMİYYƏT


Aşqabadda keçirilən qlobal konfransda BAMF da təmsil olunub

Bakı, 3 dekabr, AZƏRTAC 

Türkmənistanın paytaxtı Aşqabadda BMT-nin dəstəyi ilə keçirilən “Dayanıqlı nəqliyyat sistemi” mövzusunda qlobal konfransda BMT-nin İqtisadi və Sosial Şurasının əsas məşvərətçi statuslu üzvü olan Beynəlxalq Avrasiya Mətbuat Fondu da təmsil olunub. Fondun sədri Umud Mirzəyev tədbirə qatılan xarici ekspertlərlə görüşüb. Görüşlərdə BAMF sədrini təşkilatın Afrika qitəsi üzrə təmsilçisi, Yeniləşən və Səmərəli Enerji üçün Ərəb Platformasının rəhbəri Kamel Esseghairi də müşayiət edib. Görüşlər zamanı nəqliyyatla bağlı bir sıra aktual məsələlər müzakirə edilib.

Daha bir görüş BMT-nin İqtisadi və Sosial Şurasının QHT bölməsinin rəhbəri Alberto Padova ilə baş tutub. A.Padova BMT-nin İqtisadi və Sosial Şurasının QHT bölməsinin ən yüksək statuslu üzvlərinin birgə şəbəkəsinin yaradılması ilə bağlı BAMF-ın təklifini müsbət qiymətləndirib. O, bu sahədə istənilən dəstəyi göstərməyə hazır olduğunu bildirib.

Konfrans çərçivəsində U.Mirzəyev Pakistan vətəndaş cəmiyyətinin təmsilçiləri, Pakistanın limanlar və gəmiçilik naziri Dostan Xan Jamaldini, Qvineyanın BMT-dəki konsulu Alassane Konte, BMT regional inkişaf mərkəzinin direktoru Çikako Takaşe, BMT baş katibinin İqtisadi və Sosial Şura üzrə təmsilçisi Vu Honqbo ilə və digər nümayəndələrlə də görüşüb.

Görüşlərdə Azərbaycanın vətəndaş cəmiyyəti təmsilçiləri haqqında məlumat verən BAMF sədri dünyanı narahat edən münaqişələrə də toxunub. O bildirib ki, bu gün dünya münaqişələr məngənəsində yaşayır. Davam etməkdə olan və dondurulmuş münaqişələrin alovlanması davamlı inkişaf üçün başlıca təhdidlərdəndir. Qlobal kataklizmlərin geniş dağıdıcı təsiri nəinki davamlı inkişaf, eləcə də bəşəri sülhün qorunması üçün ciddi təhlükəyə çevrilib.

Azərbaycanın vətəndaş cəmiyyəti təmsilçilərinin belə beynəlxalq tədbirlərdə iştirakını yüksək qiymətləndirən BAMF sədri xüsusilə beynəlxalq məqsədləri olan yerli QHT-lərin BMT ilə birgə fəaliyyətinin zəruriliyini vurğulayıb.

Qeyd edək ki, bu qlobal konfrans BMT Baş Məclisinin səmərəli nəqliyyat və tranzit dəhlizlərinin yaradılması haqqında qəbul etdiyi qətnamə əsasında baş tutur. BAMF bu tədbirə beynəlxalq statuslu bir təşkilat olduğuna görə Azərbaycandan yeganə qurum kimi dəvət olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.