MƏDƏNİYYƏT


“Astana-Arkau” türk musiqi festivalında azərbaycanlı musiqiçilər çıxış ediblər

Astana, 3 iyul, АZƏRTAC

Astana Milli Opera və Balet Teatrında “Astana Arkau” ənənəvi türk musiqisi festivalı keçirilir.

Festival hər il Astananın paytaxt elan olunmasının (Astana Günü) şərəfinə keçirilir. Qazaxıstan Prezidenti Nursultan Nazarbayevin təşəbbüsü ilə türk dünyasının inteqrasiyası konsepsiyasının reallaşdırılması çərçivəsində keçirilən festivalda Azərbaycan, İran, Rusiya, Özbəkistan, Qırğızıstan, Türkiyə, Monqolustan, Çin və digər ölkələrin musiqi qrupları iştirak edirlər. Festivala ənənəvi olaraq azsaylı türkdilli xalqların ifaçıları da qatılırlar.

“Astana Arkau”da iştirakçıların ifa etdikləri musiqi əsərləri həmin xalqların adətlərində və müxtəlif milli ayinlərində istifadə olunur.

Azərbaycan ifaçıları festivalda ölkəmizin Qazaxıstandakı səfirliyinin və Beynəlxalq Türk Mədəniyyəti və İrsi Fondunun təşkilatçılığı ilə iştirak edirlər. Azərbaycanın Əməkdar artistləri Nurlan Növrəsli kamançada, Kamran Kərimov nağara və davulda, Arslan Növrəsli isə tar və udda ifa ediblər.

Azərbaycanın Qazaxıstandakı səfiri Rəşad Məmmədov musiqiçilərimizin festivalda uğurlu çıxışları barədə danışarkən deyib: “Bu musiqi əsərləri bizi üç min il əvvələ, tarixi və mədəni köklərimizə qədər aparır. Festival yüksək səviyyədə təşkil olunub. Bu, bizim ümumi sərvətimizdir və belə tədbirlər xalqlarımızı bir-birinə daha da yaxınlaşdırır”.

Festivalda azərbaycanlı musiqiçilərin çıxışları böyük maraqla qarşılanıb.

İlahə Əhmədova

AZƏRTAC-ın xüsusi müxbiri

Astana

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.