REGİONLAR
Astara: sitrusçuluq yeni inkişaf dövrünü yaşayır
Astara, 8 oktyabr, Bağır Əliyev, AZƏRTAC
Astara rayonu Azərbaycanın subtropik zonasına daxil olduğu üçün burada meyvəçiliyin əsasını subtropik və sitrus bitkiləri təşkil edir. Rayonda sitrus bitkilərinin əkin dinamikası hər il artan templə inkişaf etdirilir. Sitrus bağlarının çoxaldılması isə öz növbəsində məhsul istehsalının artması üçün əlverişli imkan yaradır.
Astara Rayon Statistika İdarəsinin rəisi Vasif Həsənov rayonda sitrusçuluğun inkişaf dinamikasını təhlil edərək AZƏRTAC-a bildirib ki, 2005-ci ildə rayonda 774 hektar sitrus bağları olduğu halda, 2014-cü ildə bu rəqəm 1107 hektara, 2015-ci ildə isə 1170 hektara çatdırılıb. Bu, 2005-ci illə müqayisədə 1,5 dəfə artım deməkdir.
O cümlədən 2005-ci ildə Astarada 15 min 923 ton subtropik və sitrus meyvələri istehsal olunmuşdusa, 2014-cü ildə bu rəqəm 23 min 896 ton təşkil edib. Bu il isə bağlardan 30 min tondan çox məhsulun yığılması gözlənilir. Bu isə 2005-ci illə müqayisədə 2 dəfə çoxdur.
Rəqəmlərdən də göründüyü kimi, son 10 ildə rayonda sitrus meyvələrinin əkin sahəsi ilə yanaşı, məhsul istehsalı da artıb. Bu inkişaf hər şeydən əvvəl, regionların sosial-iqtisadi inkişafına dair Dövlət proqramlarında Astara rayonu üçün müəyyən edilmiş tədbirlərin uğurlu icrası və məhsul istehsalçılarına göstərilən dövlət dəstəyi nəticəsində mümkün olub.
Rayonda sitrusçuluqla məşğul olan fermerlər, ailə-kəndli təsərrüfatlarının üzvləri məhsul istehsalının intensiv üsullardan istifadə etməklə artırılmasına daha çox diqqət yetirirlər. Aqrotexniki xidmətlərin vaxtında və düzgün aparılmasının nəticəsidir ki, rayonda sitrus bitkilərinin məhsuldarlığı 227 sentnerdən 280 sentnerə çatdırılıb.
Astarada bir çox ailələrin qazanc mənbəyi olan sitrusçuluq əsasən Kijabə, Şüvi, Siyəkü, Səncərədi və Pensər ərazi icra nümayəndəliklərinin yaşayış məntəqələrində inkişaf etdirilir. Bununla belə, rayonda elə bir fərdi təsərrüfat tapılmaz ki, onun həyətyanı sahəsində sitrus bitkiləri əkilməsin.
Sitrusçuluqla məşğul olan ailə-kəndli təsərrüfatının rəhbəri, Pensər kənd sakini Bahadır Cahangirov Astarada bu sahənin əsasının ötən əsrin 30-cu illərində qoyulduğunu bildirir. O, sitrusçuluğun hələ sovet vaxtından ən çox Kijabə qəsəbəsinin ərazisində yerləşən kəndlərdə inkişaf etdiyini vurğulayır.
Uzun müddət tənəzzül dövrünü yaşayan sitrusçuluqda məhsul istehsalçılarına göstərilən dövlət dəstəyi nəticəsində yeni dirçəliş dövrünün başlandığını vurğulayan B.Cahangirov bu sahənin inkişafı ilə bağlı müəyyən məsələlərin həll olunmasını vacib hesab edir. Onun sözlərinə görə, ilk növbədə rayonda emal müəssisəsi, soyuducu anbarlar və tədarük məntəqələri yaradılmalıdır. Ailə-kəndli təsərrüfatının rəhbəri dövlətin dəstəyi sayəsində bu məsələlərin də tezliklə həll olunacağına əminliyini bildirib.