REGİONLAR
Astarada 1000 hektar sahədə çay plantasiyaları salınacaq
Astara, 17 fevral, Bağır Əliyev, AZƏRTAC
2016-cı ildə Astara rayonunda sosial-iqtisadi inkişafın əsas göstəricisi olan ümumi məhsul istehsalı və əhaliyə göstərilən xidmətlərin həcmi 14 faiz artaraq 205 milyon 220 min manat təşkil edib.
AZƏRTAC xəbər verir ki, bu barədə fevralın 17-də Astara Rayon İcra Hakimiyyətində ötən ilin sosial-iqtisadi inkişafının yekunlarına və qarşıda duran vəzifələrə həsr olunmuş hesabat yığıncağında məlumat verilib.
Yığıncaqda Astara Rayon İcra Hakimiyyətinin başçısı Qəzənfər Ağayevin məruzəsi dinlənilib. Qeyd olunub ki, 2016-cı ildə rayonda kənd təsərrüfatında 6 faiz, tikintidə 45 faiz, ticarət və xidmətlər sahəsində 3,5 faiz, nəqliyyatda 13 faiz, informasiya və rabitə sahəsində 14 faiz artım qeydə alınıb. İl ərzində rayonda 990 yeni iş yeri açılıb.
Bildirilib ki, hesabat ilində 860 şagird yerlik Astara şəhər 2 nömrəli tam orta məktəb binasının əsaslı təmiri, Sım kənd tam orta məktəbi və rayon kənd təsərrüfatı idarəsi üçün yeni binanın tikintisi, Pensər kənd və Ərçivan qəsəbəsində çaylar üzərində piyada körpülərinin təmiri başa çatdırılaraq istifadəyə verilib. Astara şəhərində 11 çoxmənzilli yaşayış binasında təmir işləri aparıb.
Rayona gələn turistlərin və qonaqların mənalı istirahətini təmin etmək məqsədilə Astara şəhərində salınmış park-bulvar kompleksinə yaxın ərazidə mövcud binalar yenidən qurulub, hotel, uşaq əyləncə mərkəzi və ictimai-iaşə obyektlərinin tikintisi davam etdirilib.
Bu dövrdə Azərbaycanın ərazi bütövlüyü uğrunda şəhid olanların ailələrinin sosial-məişət şəraitini yaxşılaşdırmaq məqsədilə mənzil növbəsinə dayanmış 4 ailə üçün evlər tikilib.
Rayon ərazisindəki magistral və yerli əhəmiyyətli yolların təmiri, abadlaşdırılması işi davam etdirilib. Vaqo, Təngərüd və Səncərədi kənd daxili yollarında 13 min kvadratmetr yol asfaltlaşdırılıb. “İkinci Azərbaycan Kənd İnvestisiya Layihəsi” çərçivəsində Kijəbə qəsəbə, Siyaku və Şuvi kənd inzibati ərazi dairəsi üzrə nümayəndəliyə daxil olan kəndlərdə avtomobil yolları təmir edilib, Pəlikəş kənd sahə xəstəxanası üçün yeni binanın tikintisi isə davam edir. Astara şəhəri və ətraf qəsəbələrin su təchizatı və kanalizasiya sistemlərinin yenidən qurulması ilə əlaqədar Xanbulançay su anbarından Astara şəhərinə çəkilən, ümumi uzunluğu 28 min 700 metr olan içməli su boru xəttinin 17 min 400 metr hissəsində tikinti-quraşdırma işləri başa çatdırılıb. Bu il şəhər əhalisinin içməli su ilə təmin edilməsi nəzərdə tutulub.
Hesabat ilində rayonun qaz təchizatının yaxşılaşdırılması sahəsində də işlər davam etdirilib, Şağlazüzə kəndinə təbii qazın verilməsi təmin olunub.
Diqqətə çatdırılıb ki, kənd təsərrüfatı rayonu olan Astarada ötən il aqrar bölmədə bir sıra uğurlar qazanılıb. Rayonda ənənəvi kənd təsərrüfatı sahələrindən olan çəltikçilik inkişaf etdirilib. 2016-cı ildə çəltik əkini aparılmış 133 hektar sahədən 543 ton çəltik yığılıb, məhsuldarlıq 41 sentnerə çatdırılıb. Bu, əvvəlki illə müqayisədə 2,1 dəfə çoxdur. Çəltik sahələrinin qarşıdakı illərdə 1000 hektara çatdırılması nəzərdə tutulub. Hesabat ilində 3 min ton dənli və dənli paxlalılar, 11 min ton kartof, 41 min ton tərəvəz, 46 min tondan çox meyvə və giləmeyvə, 4 min tona yaxın diri çəkidə ət, 30 min tondan çox süd istehsal olub. 2017-ci ilin məhsulu üçün 1000 hektardan çox sahədə payızlıq şumu aparılıb. Bu, da əvvəlki ilin müvafiq dövrü ilə müqayisədə 3,5 dəfə çoxdur.
Rayonda çayçılıq təsərrüfatlarının ərazisi genişləndirilərək 345 hektara çatdırılıb. Bunun 192 hektarını məhsuldar çay sahələri təşkil edir. 2016-cı ildə çay plantasiyalarından 646 ton yaşıl çay yarpağı yığılaraq çay emalı müəssisələrinə təhvil verilib. Bu, əvvəlki ildəkindən 224 ton çoxdur. Gələcəkdə 1000 hektar sahədə çay plantasiyalarının salınması nəzərdə tutulub.
Sitrus meyvələrinin istehsalında müsbət dinamika müşahidə edilib, bağlardan əvvəlki illə müqayisədə 7 min ton çox, 43 min 215 ton məhsul yığılıb. 72 hektar yeni sitrus bağı salınıb, əkin sahəsi, ümumilikdə, 2285 hektara çatdırılıb.
Hesabat yığıncağında çıxış edənlər 2016-cı ildə rayonda sosial-iqtisadi inkişaf sahəsində görülmüş işlərdən söhbət açaraq, mövcud problemlərlə bağlı təkliflərini bildiriblər.
Prezident Administrasiyasının məsul işçisi Habil Əzənmədov çıxış edərək ötən il ölkəmizdə, o cümlədən Astara rayonunda sosial-iqtisadi sahədə qazanılmış uğurlardan danışıb, qarşıda duran vəzifələri diqqətə çatdırıb.
İclasda müzakirə edilən məsələ ilə bağlı müvafiq qərar qəbul edilib.
Yığıncaq iştirakçıları adından Prezident İlham Əliyevə müraciət qəbul olunub.