REGİONLAR
Astarada birinci rübün yekunları və qarşıda duran vəzifələr müzakirə olunub
Astara, 19 aprel, Bağır Əliyev, AZƏRTAC
Astara Rayon İcra Hakimiyyəti yanında şuranın geniş iclasında 2017-ci ilin birinci rübünün yekunları və qarşıda duran vəzifələr müzakirə edilib.
AZƏRTAC xəbər verir ki, hesabat yığıncağında çıxış edən Astara Rayon İcra Hakimiyyətinin başçısı Qəzənfər Ağayev cari ilin birinci rübündə rayonda bütün sahələrdə uğurlu nəticələr qazanıldığını bildirib. Qeyd olunub ki, iqtisadi və sosial inkişafın əsas keyfiyyət göstəricisi olan ümumi məhsul istehsalı və əhaliyə göstərilən xidmətlərin həcmi ötən ilin müvafiq dövrü ilə müqayisədə 2,8 faiz artaraq 31,7 milyon manat təşkil edib.
Rayonda 2017-ci ilin məhsulu üçün 141 hektar buğda, 33 hektar arpa, 175 hektar paxlalı bitkilər, 39 hektar qarğıdalı, 922 hektar kartof, 911 hektar faraş tərəvəz, 30 hektar bostan bitkiləri, 138 hektar yonca əkilib.
İribuynuzlu mal-qaranın sayı 42 min 626, davarların sayı 25 min 980 başa çatdırılıb, 927,2 ton diri çəkidə ət, 7 min 539 ton süd, 2 milyon 252 min ədəd yumurta istehsal olunub.
Bildirilib ki, üç ay ərzində Astara Rayon Məşğulluq Mərkəzində qeydiyyata alınan 547 nəfər işaxtarandan 284-ü rayonun idarə, müəssisə və təşkilatlarında işlə təmin edilib.
Diqqətə çatdırılıb ki, regionların sosial-iqtisadi inkişafına dair üçüncü Dövlət Proqramında müəyyən olunmuş tədbirlərə müvafiq olaraq rayonda bir sıra sosial layihələr həyata keçirilib. Astara şəhərində Xəzər dənizi sahili boyu salınmış park-bulvar kompleksində idman-sağlamlıq və uşaq əyləncə obyektləri tikilib istifadəyə verilib, şəhərin prospekt və küçələrində tikinti-quruculuq işləri davam etdirilib. Ucqar dağlıq əraziləri əhatə edən, mürəkkəb relyef şəraitində yerləşən Taxtanakəran-Toradi, Taxtanakəran-Miki avtomobil yollarının tikintisinin ikinci mərhələsinə başlanıb. “Şimal-Cənub“ nəqliyyat dəhlizinin tərkib hissəsi olan Ələt-Astara-İran beynəlxalq avtomobil yolunun Masallı-Astara hissəsinin tikintisi davam etdirilir, Astaraçay çayı üzərində tikilən körpü vasitəsilə bu ilin mart ayında Azərbaycandan İrana ilk qatar yola salınıb.
Rayonda turizm sektorunun inkişafına diqqət artırılıb, yaradılmış turist şəbəkələri hesabına Astaraya gələn turistlərin sayında xeyli artım qeydə alınıb.
Azərbaycan Respublikası regionlarının 2014-2018-ci illərdə sosial iqtisadi inkişafı Dövlət Proqramı çərçivəsində Xanbulançay su anbarından Astara şəhərinə çəkilən içməli su xəttinin 17424 metr hissəsində tikinti-quraşdırma işləri və kənd çıxışları üçün qurğuların tikintisinin icrası başa çatdırılıb.
Yığıncaqda çıxış edənlər cari ilin birinci rübündə rayonda sosial-iqtisadi sahədə görülmüş işlərdən və qarşıda duran vəzifələrdən danışıb, mövcud problemlərlə bağlı təkliflərini bildiriblər.
Şura iclasında müzakirə edilən məsələ ilə bağlı müvafiq qərar qəbul olunub.