İDMAN


Atıcılıq üzrə Avropa çempionatının onuncu günü maraqlı mübarizələrlə yadda qalıb

Bakı, 30 iyul, Məhərrəm Əlioğlu, Pərvin Ələkbərov, AZƏRTAC

İyulun 30-da Bakı Atıcılıq Mərkəzində atıcılıq üzrə Avropa çempionatının onuncu gününün yarışları keçirilib.

AZƏRTAC xəbər verir ki, çempionatın onuncu günündə Azərbaycanın dörd idmançısı mübarizəyə qoşulub. Çempionatda kişilər və qadınlar arasında 300 metr məsafəyə tüfənglə, kişilər və gənclər (yeniyetmələr) arasında 25 metr məsafəyə tapançadan standart və sürətli, qadınlar arasında 300 metr məsafəyə üç vəziyyətdə və qarışıq komanda halında 300 metr məsafəyə atəşaçma yarışlarında qaliblər müəyyənləşib.

Həmçinin qadınlar və yeniyetmələr dairəvi stend atıcılığı yarışında güclərini sınayıblar.

Kişilər arasında 300 metr məsafəyə tüfənglə atəşaçma yarışında isveçrəli atıcı Jan Loçbihler rəqiblərindən daha üstün olaraq 598 xalla birinciliyi təmin edib. İkinci yerə 595 xalla (onluq 42) almaniyalı Frank Fleiçman, üçüncü yerə isə 595 (onluq 31) xalla sloveniyalı Rajmond Debeveç çıxıb.

Fransa millisi kişilər arasında tüfənglə 300 metr məsafəyə güllə atıcılığı üzrə komanda yarışında 1775 xal toplayaraq qalib gəlib. Qızıl medalı Fransa millisinə Moreno Flores Remi (595 xal), Sayril Qraf (594) və Valerian Sauveplane (586) qazandırıblar. İkinci yeri 1769 xalla Sloveniya millisi tutub. Gümüş medalı Sloveniya komandasının heyətində Debevec Rajmond (595), Robert Markoja (594) və Dusan Zisko (580) təmin ediblər.

Yarışın üçüncüsü isə 1764 xalla Almaniya millisi olub. Almaniya yığmasının heyətində bu uğura Frank Fleişmann (595), Raiber Matthias (592) və Joerq Niehueser (577) imza atıblar.

Atıcılıq üzrə Avropa çempionatında kişilər arasında 25 metr məsafəyə standart tapançadan atəşaçma yarışında ukraynalı atıcı Pavlo Korostylov rəqiblərindən daha dəqiq olaraq 581 xalla fəxri kürsünün ən yüksək pilləsinə qalxıb. İkinci yerə 574 xalla almaniyalı Kristian Reitz, üçüncü yerə isə 573 xalla rusiyalı Aleksi Klımov çıxıb. Azərbaycan təmsilçisi Ruslan Lunyov yarışı 564 xalla yeddinci yerdə başa vurub.

Ukrayna millisi kişilər arasında 25 metr məsafəyə tapançadan atəşaçma üzrə komanda yarışında 1719 xal toplayaraq qızıl medal qazanıb. Bu yarışda Ukrayna komandası Pavlo Korostylov, Pasternak Volodymir və Roman Bondaruk ilə təmsil olunub. Klement Bessaguet, Frank Kiefer və Boris Artaud 1676 xalla Fransa millisini gümüş medalla təmin ediblər. Yarışın üçüncüsü isə 1675 xalla Rusiya millisi olub. Rusiya yığmasının heyətində bu uğura Aleksis klimov, Nikita Şkanov və Aleksandr Alifirenko imza atıblar.

Ukraynalı atıcı Pavlo Krepostniak yeniyetmələr (kişilər) arasında 25 metr məsafəyə standart tapançadan atəşaçma yarışının qalibi olub. Ukrayna idmançısı 572 xal qazanaraq fəxri kürsünün ən yüksək pilləsinə qalxıb. Rusiyalı Danil Şikov 565 xalla gümüş, latviyalı Erbs Ernests isə 564 xalla bürünc medal qazanıblar.

Avstriya idmançısı Peer Franziska qadınlar arasında 300 metr məsafəyə tüfənglə üç vəziyyətdə atəş açma yarışının ən güclüsü olub. Dəqiqliyi ilə rəqiblərini üstələyən idmançı 580 xalla qızıl medal qazanıb. Almaniyalı Lisa Müller 576 xalla ikinci, norveçli Oleane Sina Busk isə 575 xalla üçüncü yerə çıxıb.

Avropa çempionatında Rusiya millisi yeniyetmələr (kişilər) arasında 25 metr məsafəyə standart tapança ilə atəşaçma yarışında 1671 xal toplayaraq çempion olub. Qızıl medalı Rusiya millisinə Daniil Şıxov (565 xal), Aleksandr Petrov (554 xal) və Eqor İsmakov (552 xal) qazandırıblar. İkinci yeri 1668 xalla Ukrayna millisi tutub. Komandanın aktivinə gümüş medalı Pavlo Krepostniak, Yuri Kolesnik və Maksim Horotinets yazdırıblar. Yarışın üçüncüsü isə 1663 xalla Almaniya millisi olub. Yığmanın heyətində bu uğura Kristop Lutz, Florian Peter, Filip Heyer imza atıblar.

Qadınlar arasında 300 metr məsafəyə tüfənglə üç vəziyyətdə güllə atıcılığı üzrə komanda yarışının ən güclüsü 1699 xal toplayan İsveçrə millisi olub. Komandaya qızıl medalı Guignard Sneyder Silvia, Mariam Bruehviler və Andrea Bruehlman qazandırıb.

Polşa yığmasının aktivinə gümüş medalı 1689 xalla Silvia Bogacka, Karolina Kovalçuk və Paula Vronska yazdırıblar.

Lessia Leskiv, Natallia Kalnyş və Svetlana Boykova isə 1678 xal yığaraq Ukrayna millisinə bürünc medal qazandırıblar.

Yunanıstanlı idmançı Artemis Kefalidou yeniyetmələr (qızlar) arasında dairəvi stend atıcılığı yarışının ən güclüsü olub.

Yunanıstan idmançısı 46 xalla rəqiblərini üstələyərək qızıl medal qazanıb. Rusiyalı Elena Bukhonova 43 xalla ikinci, italiyalı Del Prete Franseska 35 xalla üçüncü yeri tutub.

Çempionatda qadınlar arasında dairəvi stend atıcılığı yarışının qalibi də müəyyənləşib. Fransalı Lucie Anastassiou rəqiblərindən daha dəqiq olaraq fəxri kürsünün ən yüksək pilləsinə qalxıb.

Kipr idmançısı Andri Eleftheriou gümüş, almaniyalı atıcı Kristin Venzel isə bürünc medala sahib olub. Bu yarışda Azərbaycanı Nurlana Cəfərova, Regina Meftahətdinova, Püstəxanım Məlikova təmsil ediblər.

Qarışıq komanda halında 300 metr məsafəyə atəşaçma yarışlarının qızıl medalçısı isə 372 xalla İsveçrənin 1-ci yığması olub. Yarışda ikinci yerə çempion komandadan bir xal geridə qalan Avstriya (371 xal) millisi, üçüncü yerə isə 361 xal toplayan İsveç yığması çıxıb.

Yeniyetmələr (qadınlar) arasında dairəvi stend atıcılığı üzrə komanda yarışının qalibi isə İtaliya yığması olub.

Komandaya qızıl medalı Del Prete Francesca, Longhi Giada, Basso Giulia qazandırıb. Rusiya millisinin aktivinə gümüş medalı Elena Buxonova, Alina Fazylzyanova, Margarita Qevorkian yazdırıb.

Almaniya komandasının heyətində Maria Kalix, Reiçert Tamar, Valentina Umhoefer bürünc medala sahib olub.

Mükafatlandırma mərasimində fəxri kürsüdə yer alan qalib idmançılara medallar təqdim olunub.

Azərbaycan Atıcılıq Federasiyasının təşkilatçılığı, Gənclər və İdman Nazirliyinin dəstəyi ilə keçirilən Avropa çempionatına avqustun 3-də yekun vurulacaq. Çempionata 43 ölkədən minə yaxın idmançı qatılıb. Yarışda idmançılar 80-ə yaxın medal uğrunda mübarizə aparırlar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.