Atırau, 23 fevral, АZƏRTAC

Azərbaycanın Aktau şəhərindəki baş konsulluğu Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” kampaniyası çərçivəsində Atırau Dövlət Kiçik İncəsənət Akademiyasında anım tədbiri keçirib.

Tədbirdə Atırauda yaşayan soydaşlarımızla yanaşı, vilayətin tanınmış ziyalıları, ictimaiyyət nümayəndələri, Aktau şəhərinin incəsənət və rəssamlıq məktəblərinin müəllim və tələbələri, vilayətdə fəaliyyət göstərən diaspor rəhbərləri, KİV təmsilçiləri iştirak ediblər.

Qonaqlar “Xocalıya ədalət” kampaniyası çərçivəsində baş konsulluq tərəfindən Aktau şəhərində uşaq və yeniyetmə rəssamlar arasında “Biz ədalət tələb edirik!” mövzusunda keçirilmiş müsabiqədə iştirak etmiş rəsmlərin sərgisinə baxıblar.

Tədbirdə Xocalı soyqırımı qurbanlarının xatirəsi bir dəqiqəlik sükutla yad edilib.

Sonra Azərbaycan Respublikasının Aktau şəhərindəki baş konsulluğunun rəhbəri Elxan Zeynalov çıxış edərək ermənilərin Xocalı şəhərində törətdiyi soyqırımı haqqında məlumat verib. O, ermənilər tərəfindən törədilmiş cinayətin dünya ictimaiyyətinə çatdırılmasında son illərdə Azərbaycan dövləti və xarici ölkələrdə yaşayan soydaşlarımız tərəfindən görülən işlərdən, xüsusilə “Xocalıya ədalət!” kampaniyasından danışıb. Diplomat, həmçinin baş konsulluq tərəfindən yaradılmış www.xocalı.kz saytında BMT, ATƏT və digər beynəlxalq təşkilatlara, dünyanın aparıcı dövlətlərinin rəhbərlərinə, parlamentlərinə müraciət yerləşdirildiyini bildirərək, tədbir iştirakçılarını bu müraciətə qoşulmağa çağırıb.

Sonra Atırau vilayətində yaşayan azərbaycanlıların “Novruz” milli mədəni cəmiyyətinin sədr müavini Abbas İmanov, Atırau Dövlət Kiçik İncəsənət Akademiyasının baş müəllimi, Qazaxıstanın tanınmış rəssamı Meyrbek Jaqıpaşev çıxış ediblər.

Çıxışlardan sonra Atırau Dövlət Kiçik İncəsənət Akademiyasının zalında akademiyada təhsil alan gənc aktyorlar tərəfindən müharibələr, terror aktları nəticəsində həlak olan uşaqların xatirəsinə həsr olunmuş “Xeyir və şər” tamaşası nümayiş etdirilib.

Daha sonra “Biz ədalət tələb edirik!” mövzusunda keçirilmiş rəsm müsabiqəsinin qalibləri mükafatlandırılıb.

Rəsm müsabiqəsində Atırau vilayətində fəaliyyət göstərən səkkiz rəsm və incəsənət məktəbindən 200-dən çox şagird iştirak edib.

Qaliblərə baş konsulluğun fəxri fərmanları və Azərbaycan haqqında kitablar təqdim olunub.

Sonda tədbir iştirakçıları Atırau Dövlət Kiçik İncəsənət Akademiyasının önündə Xocalı soyqırımı qurbanlarının xatirəsinə “Biz ədalət tələb edirik” şüarları səsləndirərək səmaya qara şarlar buraxıblar.

İlahə Əhmədova

AZƏRTAC-ın xüsusi müxbiri

Atırau