REGİONLAR


Ətlik-südlük istiqamətli müasir ailə-fermer təsərrüfatlarının yaradılması öz bəhrəsini verir VİDEO

A+ A

Ağcabədi, 7 fevral, Tahir Ağaməmmədov, AZƏRTAC

Kənd Təsərrüfatı Nazirliyinin təşəbbüsü ilə 2015-ci ildən həyata keçirilən “Ətlik-südlük istiqamətli müasir ailə-fermer təsərrüfatlarının yaradılması” pilot layihəsi öz bəhrəsini verir. Layihəyə əsasən, Ağcabədidə 25, Bərdədə 26, İmişlidə isə 18 ailə-kəndli təsərrüfatına lizinq yolu ilə 516 baş cins heyvan verilib.

Ağcabədinin Təzəkənd kəndində 25 ailə-fermer təsərrüfatı yaradılıb

Ağcabədi rayon kənd təsərrüfatı idarəsinin heyvandarlıq sektorunun müdiri Etibar Mamedov AZƏRTAC-a bildirib ki, rayonun Təzəkənd kəndində bu layihədən 25 ailə-fermer təsərrüfatı bəhrələnir. Təsərrüfatlara hər birinə 5-10 baş olmaqla, Avstriyadan gətirilmiş 178 baş ətlik-südlük istiqamətli “Simmental” cinsli heyvan verilib. Heyvanların saxlanılması üçün təsərrüfatlarda müasir tipli tövlələr tikilib, yem bazasının formalaşdırılması təmin olunub. Heyvanlardan əldə olunan ət və südün məhsuldarlığının yüksək olması üçün müvafiq qida rasionu tərtib edilib, qarğıdalıdan silos hazırlanması məqsədilə tədbirlər həyata keçirilib. Ailə-fermer təsərrüfatları müasir metodlarla qarğıdalı silosu hazırlanması vərdişlərinə yiyələnib. Fermerlər portativ sağım aparatları və yemi xırdalayaraq qarışdıran aqreqatlarla təmin ediliblər. Ötən dövrdə təsərrüfatdakı heyvanlardan 160 baş bala alınıb. Fermerlər təsərrüfatdan əldə etdikləri südü gündəlik olaraq kənddə yaradılmış süd qəbulu məntəqəsinə verirlər.

Fermer: Hər gün süd qəbulu məntəqəsinə 200 litrə yaxın süd satırıq

Fermer təsərrüfatlarından birinin rəhbəri Elgün Qasımov bildirib ki, layihəyə əsasən lizinq yolu ilə 10 baş cins heyvan alıb. Bu heyvanların gündəlik süd məhsuldarlığı yerli cinslərdən 2-3 dəfə artıqdır: “Əvvəllər də təsərrüfatımda mal-qara saxlayırdım. Bir inək gündə orta hesabla 8-10 litr süd verirdi. İndi isə hər inəkdən gündə 18-20 litr süd sağırıq. Hər gün süd qəbulu məntəqəsinə 200 litrə yaxın süd satırıq”.

E.Qasımov cins inəklərdən 9 baş sağlam bala alıb. Artıq heyvanlar ikinci dəfə bala verməyə başlayıblar. Növbəti ildə damazlıq düyələrin satışı da həyata keçiriləcək.

Ailə-fermer təsərrüfatları süd, pendir, qatıq, ayran, dovğa istehsal edəcəklər

Sahə baytarı Sənan Mamedov “Simmental” cinsli heyvanların yerli iqlimə çox yaxşı uyğunlaşdığını vurğulayaraq deyib: “Heyvanların vəziyyəti çox yaxşıdır. Süd verməsi və çəki artımı yüksəkdir. Bu heyvanlardan gələcəkdə gündə 30 litr süd sağılması gözlənilir. Təsərrüfatlarda epizootik vəziyyət sabitdir. Vaxtlı-vaxtında profilaktik peyvəndləmə və dezinfeksiya işləri aparılır”.

Təsərrüfatlardan süd qəbulu məntəqəsinə yay aylarında 35-40 ton, qış fəslində isə 20-22 ton süd verilir. Toplanan süd emalçılar tərəfindən bir litri 51 qəpik olmaqla satın alınır. Fermerlər gələcəkdə süd məhsullarını özləri emal etməyi, pendir, qatıq, ayran, dovğa istehsalını planlaşdırırlar.

Qeyd edək ki, müasir ailə-fermer təsərrüfatlarının yaradılması layihəsinin məqsədi ailə-kəndli heyvandarlıq təsərrüfatlarında mövcud olan az məhsuldar heyvanları yüksək məhsuldar heyvanlarla əvəz etmək yolu ilə pay torpaqlarına malik ailələr üçün kiçikhəcmli, müasir quruluşlu heyvandarlıq təsərrüfatlarının yaradılmasının stimullaşdırılmasıdır.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.