İQTİSADİYYAT
Auditin yenidən tənzimlənməsinin aktual problemləri müzakirə olunub [YENİLƏNİB] VİDEO
Bakı, 5 aprel, AZƏRTAC
Aprelin 5-də Bakıda Azərbaycan Respublikasının Auditorlar Palatasının fəaliyyətə başlamasının 20 illiyinə həsr olunan təntənəli iclas və “Müasir şəraitdə auditin yenidən tənzimlənməsinin aktual ploblemləri” mövzusunda beynəlxalq elmi-praktik konfrans öz işinə başlayıb.
AZƏRTAC xəbər verir ki, iclasda əvvəlcə Azərbaycan Respublikasının Dövlət Himni səsləndirilib. Sonra Auditorlar Palatasının yaradılmasının 20-ci ildönümü münasibətilə Prezident İlham Əliyevin Palatanın kollektivinə və üzvlərinə ünvanladığı təbrik məktubu oxunub.
Auditorlar Palatasının sədri Vahid Novruzov Palatanın fəaliyyət istiqamətləri barədə məlumat verib. Qeyd edib ki, Azərbaycanda auditor xidmətinin inkişafı və tətbiqinin genişləndirilməsi son dövrlərdə qəbul edilən və uğurla yerinə yetirilən bir sıra mühüm dövlət proqramlarında müstəqil auditin vacib problemlərinin müəyyənləşdirilməsi və həlli sayəsində mümkün olub. Ötən dövrdə Auditorlar Palatası 7 dövlət proqramının iştirakçısı olub və üzərinə düşən vəzifələri tam yerinə yetirib. Sonra Auditorlar Palatasının 20 illik yubileyinə həsr olunan sənədli film nümayiş etdirilib.
V.Novruzov qeyd edib ki, MDB məkanında ilk dəfə Azərbaycanda Beynəlxalq Daxili Auditorlar İnstitutunun regional bölməsi təsis edilib. Sonradan müstəqil instituta çevrilən Audit Azərbaycan İnstitutu Avropa və Asiya Konfederasiyalarının üzvlüyünə Auditorlar Palatasının dəstəyi ilə nail olub.
“Auditorlar Palatası ötən 20 ildə auditin təbliği və yayılması istiqamətində bir çox işlər görüb, o cümlədən auditə dair 46 kitab, ali məktəblər üçün dərs vəsaitləri, 43 Milli audit standartı və digər nəşr, jurnal hazırlayıb”, - deyə Auditorlar Palatasının sədri qeyd edib.
Milli Məclisin iqtisadi siyasət, sənaye və sahibkarlıq komitəsinin sədri, akademik Ziyad Səmədzadə bildirib ki, yaranmasının 20 illiyini qeyd edən Auditorlar Palatası bu dövr ərzində milli audit sisteminin bərqərar olması, şəffaflığın artırılması, korrupsiyaya qarşı mübarizə, bütövlükdə, ölkə iqtisadiyyatının inkişafında auditin rolunun yüksəldilməsində yaxından iştirak edib. İqtisadiyyatımızın davamlı inkişafı nəticəsində maliyyə hesabatlılığında şəffaflığın təmin olunması sahəsində maliyyə nəzarətinin, eləcə də müstəqil auditin qarşısında qoyduğu öhdəliklər uğurla yerinə yetirilib.
“Auditorlar Palatasının Milli Məclisin iqtisadi siyasət, sənaye və sahibkarlıq komitəsi, Azərbaycan İqtisadçılar İttifaqı ilə əməkdaşlığı yüksək səviyyədədir. Ümid edirəm ki, bu əməkdaşlığın gələcəkdə də davam etdirilməsi Azərbaycan iqtisad elminə əvəzsiz töhfələrini verəcək”, - deyə akademik Z.Səmədzadə vurğulayıb.
Azərbaycan Kooperasiya Universitetinin rektoru, Milli Məclisin deputatı Eldar Quliyev bildirib ki, ötən dövrdə Auditorlar Palatası böyük inkişaf yolu keçərək bir çox uğurlara imza atıb. Azərbaycanda bazar iqtisadiyyatının təşəkkül tapdığı ilk illərdə yaradılmış Palatanın fəaliyyəti maliyyə nəzarəti sisteminin vacib tərkib hissəsi olan audit institutunun inkişafına dəyərli töhfələr verib. Audit sahəsindəki mövcud beynəlxalq standartların tətbiqi, audit normativ hüquqi bazasının təkmilləşdirilməsi sahəsində sanballı işlər görülüb, kadrların peşəkarlıq potensialının, auditor xidmətlərinin keyfiyyətinin yüksəldilməsi üçün lazımi tədbirlər həyata keçirilib.
Avropa Mühasiblər və Auditorlar Federasiyasının (EFAA) prezidenti Bodo Riçard Azərbaycan Auditorlar Palatasının öz fəaliyyəti dövründə böyük uğurlara imza atdığını deyib. Qeyd edib ki, EFAA-da Azərbaycan, Gürcüstan, Türkiyə, Rumıniya və digər ölkələrin müvafiq qurumları təmsil olunurlar. Həmin qurumlar arasındakı dostluq və əməkdaşlıq əlaqələri yüksək səviyyədədir.
B.Riçard bildirib ki, rəhbəri olduğu qurum ilə Auditorlar Palatası arasında mühüm əlaqələr qurulub. Beynəlxalq standartların tətbiqi sahəsində Azərbaycan Auditorlar Palatası böyük işlər görüb və qeyd edilən əlaqələr baxımından bu işlərin önəmi böyükdür.
“Auditorlar Palatasının yaranması Azərbaycanda iqtisadi sahədə köklü islahatların aparıldığı dövrə təsadüf edirdi. Palata fəaliyyəti dövründə milli audit sisteminin formalaşması sahəsində fundamental işlər görüb, audit xidmətinin əhatə dairəsi genişlənərək ölkə iqtisadiyyatının inkişafında, şəffaflığın təmin olunmasında, korrupsiyaya qarşı mübarizədə əvəzsiz rol oynayıb”, - deyə Hesablama Palatasının sədri Vüqar Gülməmmədov diqqətə çatdırıb.
V.Gülməmmədov vurğulayıb ki, Auditorlar Palatasının Azərbaycan üçün peşəkar auditor kadrlarının hazırlanması və onların peşə-ixtisas səviyyəsinin artırılması sahəsində əldə etdiyi nailiyyətlər, bir sıra ölkələrin maliyyə nəzarəti qurumları ilə yaratdığı əlaqələr, mütərəqqi dünya təcrübəsinin öyrənilməsi və ölkəmizdə tətbiqi sahəsində gördüyü işlər təqdirəlayiqdir.
Türkiyə Müstəqil Mühasiblər, Maliyyə Müşavirləri və Andlı Maliyyə Müşavirləri Palataları Birliyinin prezidenti Nail Sanlı qeyd edib ki, Azərbaycan Auditorlar Palatasının beynəlxalq əməkdaşlıq sahəsindəki uğurları daim artır. Otuzdan çox ölkənin audit və mühasibatlıq qurumları ilə əməkdaşıq əlaqələri yaradan Auditorlar Palatası Beynəlxalq Mühasiblər Federasiyasının, Avropa Mühasiblər və Auditorlar Federasiyasının, Sertifikatlı Mühasiblər və Auditorların Avrasiya Şurasının üzvüdür. Bu, Auditorlar Palatasının səmərəli fəaliyyətinin əhəmiyyətinin göstəricisidir.
Bakı Dövlət Universitetinin rektoru Abel Məhərrəmov, əmək və əhalinin sosial müdafiəsi nazirinin müavini İlqar Rəhimov və başqaları çıxış edərək əminliklə bildiriblər ki, Auditorlar Palatası Azərbaycanda davamlı inkişaf və yüksək sosial səviyyəsinə hədəflənən inkişaf konsepsiyasının həyata keçirilməsinə bundan sonra da öz töhfəsini verməkdə davam edəcək.
Sonra konfrans iştirakçıları adından Azərbaycan Respublikasının Prezidenti İlham Əliyevə müraciət qəbul olunub.
Elmi-praktik konfransda 20-yə yaxın xarici ölkənin müvafiq audit və mühasibatlıq qurumlarının təmsilçiləri, beynəlxalq peşəkar təşkilatların, ölkənin dövlət və qeyri-hökumət təşkilatlarının, özəl sektorun, elmi-tədqiqat institutunun nümayəndələri iştirak edirlər.
Konfrans işini plenar iclaslarla davam etdirib. Plenar iclaslarda “Peşəkar audit qurumları üçün normativ problemlər”, “Türkiyə peşəkar müsahiblərinin audit təcrübələri, audit və mühasibat peşələrinin gələcəyinin qiymətləndirilməsi”, “Davamlı inkişafın təmin edilməsində auditin rolunun gücləndirilməsi istiqamətləri”, “Respublikanın uçot praktikasında maliyyə hesabatının beynəlxalq standartlarından istifadə edilməsi imkanları” və digər mövzularda məruzələr dinlənilib.
Məruzəçilər müstəqil audit xidmətinin əsas inkişaf istiqamətləri, auditor xidməti bazarının genişləndirilməsi, bu xidmət istifadəçilərinin maraqlarının müdafiə olunması istiqamətində həyata keçirilən tədbirlərdən söz açıblar.
Vurğulanıb ki, ölkənin iqtisadi-maliyyə münasibətlərində şəffaflığın təmin olunmasında, iqtisadi cinayətkarlığa və korrupsiyaya qarşı mübarizədə auditin imkanlarından daha geniş istifadə olunmalıdır. Auditin inkişafını şərtləndirən əsas amillərdən biri beynəlxalq tələblər səviyyəsində fəaliyyət göstərmək iqtidarında olan kadrların hazırlanması və onların ixtisas səviyyəsinin daim artırılmasıdır.
Konfrans öz işini aprelin 6-da digər plenar sessiyalarla davam etdirəcək.