SİYASƏT


Avropa Hüquqşünas Tələbələr Assosiasiyasının “Yay hüquq məktəbi”nin açılışı olub

Bakı, 7 iyul, AZƏRTAC

İyulun 7-də Bakıda Avropa Hüquqşünas Tələbələr Assosiasiyasının (ELSA) Azərbaycan nümayəndəliyinin təşkilatçılığı ilə beynəlxalq “Yay hüquq məktəbi”nin açılış mərasimi keçirilib. İyulun 12-dək davam edəcək “Yay hüquq məktəbi” ölkəmizdə fəaliyyət göstərən yerli hüquq mərkəzlərinin dəstəyi ilə təşkil olunur.

ELSA-dan AZƏRTAC-a bildiriblər ki, açılış mərasimində Milli Məclisin deputatı Vüsal Hüseynov, Bakı Hüquq Mərkəzinin tərəfdaşı Mətin Əsgər, “ASAN xidmət”in beynəlxalq əməkdaşlıq şöbəsinin müdiri Elnur Hümbətov və ELSA beynəlxalq təşkilatının Azərbaycan nümayəndəliyinin prezidenti Məhəmməd İsmayılov çıxış edərək tədbirin əhəmiyyətindən danışıb, iştirakçılara uğurlar arzulayıblar.

V.Hüseynov ELSA təşkilatının fəaliyyətini müsbət qiymətləndirərək belə bir beynəlxalq tədbirin Bakıda keçirilməsinin əhəmiyyətini qeyd edib. O, tədbirin iştirakçılar üçün yalnız hüquqi biliklər deyil, həmçinin ölkəmizi daha yaxından tanımaları baxımından da yaxşı imkan olduğunu vurğulayıb və belə tədbirlərin davamlı olmasının vacibliyini bildirib. Ölkəmizin müstəqillik yolunda qazandığı nailiyyətlər, Ermənistan-Azərbaycan, Dağlıq Qarabağ münaqişəsi, həmçinin hüquq islahatlar barədə məlumat verib.

E.Hümbətov ölkəmizdə dövlət xidmətlərinin göstərilməsi sahəsində həyata keçirilən islahatlar və Azərbaycanın brendi olaraq tanınan “ASAN xidmət” mərkəzlərinin yaradılması və onların əhaliyə keyfiyyətli xidmətlər göstərilməsi istiqamətində uğurlu fəaliyyətindən danışıb.

Tədbirdə, həmçinin qeyd olunub ki, “Yay hüquq məktəbi” Azərbaycan ilə yanaşı, Avropanın 30 ölkəsindən 75 gənc hüquqşünas tələbənin iştirakı ilə keçirilir. Yay məktəbində azərbaycanlı mütəxəssislər tərəfindən beynəlxalq hüquq normaları ilə bağlı müxtəlif seminarlar tədris ediləcək. Son zamanlar ölkəmizdə biznes mühitinin təkmilləşdirilməsi, eləcə də məhkəmə-hüquq islahatları ilə bağlı həyata keçirilən tədbirlər müzakirə olunacaq. Həmçinin iştirakçıların Milli Məclisə, Ali Məhkəməyə və “ASAN xidmət” mərkəzinə tanışlıq səfərləri nəzərdə tutulur. Eyni zamanda, Azərbaycanın tarixi və mədəniyyəti ilə tanışlıq məqsədilə iştirakçıların Heydər Əliyev Mərkəzinə, “YARAT” Müasir İncəsənət Mərkəzinə, Xalça Muzeyinə, Qız qalasına ziyarətləri təşkil ediləcək.

Beynəlxalq “Yay hüquq məktəbi”nin təşkili azərbaycanlı və xarici hüquqşünas tələbələr arasında fikir mübadiləsinə və yeni əməkdaşlıq imkanlarının yaradılmasına şərait yaradacaq. Eləcə də azərbaycanlı tələbələrin Avropa ölkələrində oxşar tədbirlərdə iştirakını təmin edəcək.

Diqqətə çatdırılıb ki, ELSA-Azərbaycan nümayəndəliyinin fəaliyyəti nəticəsində ölkəmizdə bir neçə uğurlu beynəlxalq və yerli layihələr həyata keçirilib. Təşkilatın dəstəyi ilə azərbaycanlı hüquqşünas tələbələr xaricdə təcrübə keçiblər.

Avropanın 42 ölkəsində fəaliyyət göstərən ELSA beynəlxalq təşkilatı 230 universitetdə təhsil alan 40 mindən çox hüquqşünas tələbəni və gənc hüquqşünası sıralarında birləşdirir. Təşkilatın məqsədi Avropada gənc hüquqşünas tələbələr arasında təhsil-mübadilə imkanlarının genişləndirilməsinə, cəmiyyətin inkişafında onların fəal iştirakının təşviq edilməsinə, nəzəri biliklərinin praktiki tətbiqinə nail olmaqdır.

Azərbaycan 2010-cu ildə ELSA beynəlxalq təşkilatına üzv olub. Ölkəmiz hazırda bu qurumun ən fəal üzvlərindən biridir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.