SİYASƏT
Avropa İttifaqı-Azərbaycan əlaqələrinin strateji müstəviyə keçirilməsinin zəruriliyi vurğulanıb
Brüssel, 11 fevral, AZERTAC
Brüsseldə, Avropanın nüfuzlu “beyin mərkəz”lərindən olan Avropa Siyasət Mərkəzində “Azərbaycan–Avropa İttifaqı münasibətləri. Çağırışlar və imkanlar” mövzusunda müzakirələr keçirilib.
Tədbirin moderatoru Avropa Siyasət Mərkəzinin aparıcı siyasi təhlilçisi Amanda Pol Avropa İttifaqı ilə Azərbaycan arasında enerji sahəsində strateji tərəfdaşlığın yeni ikitərəfli saziş layihəsinin formalaşmasında xüsusi çəkiyə malik olduğunu söyləyib. O, tərəflər arasında beynəlxalq təhlükəsizlik, terrorizm kimi regional təhdidlərə qarşı mübarizə sahələrində əməkdaşlıq perspektivlərinin mövcudluğundan bəhs edib. Avropa İttifaqının Ermənistan-Azərbaycan, Dağlıq Qarabağ münaqişəsi və Azərbaycanda insan hüquqları ilə bağlı bəzən ikili standartlardan çıxış etməsinin rəsmi Bakının təşkilata olan etimadının zədələnməsi ilə nəticələndiyini bildirib.
Tədbirdə çıxış edən Azərbaycanın Avropa İttifaqı yanında daimi nümayəndəliyinin rəhbəri səfir Fuad İsgəndərov Azərbaycan-Avropa İttifaqı münasibətlərinin birtərəfli təxəyyüllər əsasında qurulmasının nəticə vermədiyini, bundan sonra praqmatik yanaşma nümayiş etdirməyin vacibliyini vurğulayıb. Belə bir tədbirin Avropa İttifaqının xarici işlər və təhlükəsizlik siyasəti üzrə ali nümayəndəsi Federika Mogerini və Avropa Komissiyasının enerji birliyi üzrə vitse-prezidenti Maroş Şefçoviçin Azərbaycana nəzərdə tutulan səfəri ərəfəsində baş tutmasının təsadüfi olmadığını bildirən səfir bu səfərin Strateji Tərəfdaşlıq Sazişi layihəsi üzrə məsləhətləşmələrə müsbət təkan verəcəyinə inandığını deyib.
Mərkəzi Asiya-Qafqaz İnstitutu və İpək Yolu təhsil proqramının direktoru Svante Kornel Azərbaycanın sürətlə inkişaf edən müasir və dünyəvi ölkə olduğunu qeyd edib. O, Azərbaycanın xarici siyasətinin prioritetləri, Ermənistan-Azərbaycan, Dağlıq Qarabağ münaqişəsi barədə fikirlərini səsləndirib. S.Kornel Azərbaycanın Avropa ölkələri üçün etibarlı enerji təchizatçısı, həmçinin Qərblə Mərkəzi Asiya arasında nəqliyyat, enerji və logistika sahəsində körpü rolunu oynadığını vurğulayıb.
Xəzər Universitetinin siyasi elmlər və beynəlxalq əlaqələr departamentinin rəhbəri Muxtar Hacızadə ötən illər ərzində Azərbaycanın həyata keçirdiyi irimiqyaslı tədbirlərlə Avropanın mədəni həyatının önəmli hissəsinə çevrildiyini qeyd edib. O, ikitərəfli münasibətlərdə mövcud olan çətinliklərin Avropanın Azərbaycana qarşı tətbiq etdiyi ikili standartlarla daha da artdığını diqqətə çatdırıb.
“The Caucasus Interface” idarəetmə üzrə konsaltinq şirkətinin direktoru Mişel İvor Ermənistan-Azərbaycan, Dağlıq Qarabağ münaqişəsinin tarixi kökləri ilə bağlı Avropa ictimai-siyasi dairələrində yanlış təsəvvürün olduğunu, bunun da münaqişənin həllinə olan yanaşmaya mənfi təsir etdiyini bildirib. O, vaxtilə işğal olunmuş ərazilərə səfəri zamanı qondarma separatçı rejimin onun dolğun və dürüst araşdırma aparmasına mane olduğunu, bununla belə Ağdamda erməni vandalizminin nəticələrinin canlı şahidinə çevrildiyini deyib. M.İvor Ağdamdan məcburi köçkünlərin qəmli xatirələri əsasında videoyazı hazırladığını, həmin materialda münaqişə qurbanlarının öz doğma yurd-yuvalarına qayıtmaq arzusunun öz əksini tapdığını bildirib.
Avropa Xarici Siyasət Xidmətinin rəsmisi Dirk Şubel Azərbaycanla bir çox sahələrdə praqmatik əməkdaşlığın yaradılması üçün real perspektivlərin olduğunu deyib, hər iki tərəfin bu istiqamətdə qarşılıqlı addımlar atmasının vacibliyini vurğulayıb. Üçüncü ölkə tərəfindən ikitərəfli saziş layihəsinin təqdim olunmasının Avropa İttifaqı təcrübəsində ilk olduğunu, bu baxımdan təşkilatın Azərbaycan tərəfindən irəli sürülmüş Strateji Tərəfdaşlıq Sazişi layihəsinə maraqla yanaşdığını bildirib. O, yeni saziş layihəsinin Azərbaycanla enerjinin şaxələndirilməsi, qeyri-neft sektorunun inkişafı, terrorizm və beynəlxalq təhlükəsizlik, həmçinin dinlər və mədəniyyətlərarası dialoq sahəsində əməkdaşlığın genişləndirilməsinə şərait yaradacağına inandığını deyib.
Tərəflər arasında dialoqun effektivliyinin təmin edilməsində ünsiyyət mexanizmlərinin düzgün qurulmasının vacibliyinə diqqət çəkən D.Şubel bu istiqamətdə Avropa İttifaqının Azərbaycana münasibətdə yeni strateji ünsiyyət vasitələrindən istifadə edəcəyini bildirib.
Müzakirələrdə çıxış edənlərin hər biri Avropa İttifaqı Azərbaycan münasibətlərinin strateji müstəviyə keçirilməsinin zəruriliyini vurğulayıb və yaxın zamanlarda bu istiqamətdə vacib addımların atılacağına ümid bəslədiklərini bildiriblər.
Sonra məruzəçilər tədbir iştirakçılarının suallarını cavablandırıblar.
Tədbirdə Brüsseldə fəaliyyət göstərən diplomatik korpusun, Avropa İttifaqı institutlarının və tədqiqat mərkəzlərinin, kütləvi informasiya vasitələrinin nümayəndələri iştirak ediblər.
Pərvanə Qarayeva
AZƏRTAC-ın xüsusi müxbiri
Brüssel