Bakı, 27 may, AZƏRTAC

Avropa İttifaqı Azərbaycanın əsas ticarət tərəfdaşıdır. 2015-ci ildə Azərbaycanın Avropa İttifaqı (Aİ) ölkələri ilə ticarət dövriyyəsi 9,7 milyard dollar təşkil edib.

AZƏRTAC xəbər verir ki, bu fikir mayın 27-də İqtisadiyyat Nazirliyi ilə Avropa İttifaqı tərəfindən maliyyələşdirilən "Azərbaycanda institusional quruculuq əməliyyatlarına dəstək" (SIBA) layihəsinin birgə təşkilatçılığı ilə "Azərbaycanda institusional quruculuq" mövzusunda Bakıda keçirilən konfransda səsləndirilib.

İqtisadiyyat nazirinin müavini Sahil Babayev Azərbaycan və Avropa İttifaqı arasında uğurlu əməkdaşlığın həyata keçirildiyini və tərəfdaşlıq əlaqələrinin müxtəlif sahələrdə daha da möhkəmləndirilməsi üçün imkanların olduğunu deyib. Nazir müavini qeyd edib ki, Avropa İttifaqı Azərbaycanın əsas ticarət tərəfdaşıdır. Bildirib ki, ötən il Avropa İttifaqı ilə ticarət dövriyyəsinin həcminin ümumi ticarətdəki payı 47 faiz, bu il bu göstərici 41 faiz ətrafındadır. Aİ ölkələri ilə Azərbaycan arasında sıx əməkdaşlıq əlaqələri mövcuddur. Son 10 ildə Aİ ölkələrinin Azərbaycanda əsas kapitala qoyduğu investisiyaların həcmi ölkənin əsas kapitalına qoyulmuş bütün investisiyaların 45,6 faizini təşkil edib.

"Bu günədək Azərbaycanda, ümumilikdə, 43 Tvinninq layihəsi icra edilib ki, bunlardan 25-i uğurla tamamlanıb, 9 layihə icra mərhələsindədir, 9 layihə üzrə isə sənədlər hazırlanır. Azərbaycan dövlət qurumlarının təşəbbüsü ilə ümumilikdə 150 TAIEX tədbiri həyata keçirilib. Eyni zamanda, dövlət qurumlarının nümayəndələri 68 çoxtərəfli TAIEX tədbirində iştirak edib. Azərbaycanda 15 SIQMA layihəsi həyata keçirilib, 2 SOCIEUX layihəsi isə icra mərhələsindədir", - deyə nazir müavini diqqətə çatdırıb.

Avropa İttifaqının Azərbaycandakı nümayəndəliyinin rəhbəri, səfir Malena Mard Avropa İttifaqı ilə Azərbaycan arasında əlaqələrin inkişaf etdirilməsi üçün mövcud olan qarşılıqlı marağın əhəmiyyətini diqqətə çatdırıb. Bildirib ki, Avropa İttifaqı ilə Azərbaycan arasında əlaqələrin genişləndirilməsi üçün böyük potensial var.

Azərbaycanda Avropa İttifaqının institusional quruculuq alətləri üzrə proqram idarəetmə qurumunun direktoru, İqtisadiyyat Nazirliyinin beynəlxalq təşkilatlarla əməkdaşlıq şöbəsinin müdiri Ruslan Rüstəmli Tvinninq alətinin Azərbaycandakı nailiyyətləri ilə bağlı məlumat verib.

Tədbirdə Azərbaycanın benefisiar qurumlarının nümayəndələri Tvinninq və TAIEX-lə bağlı təcrübələrini bölüşüblər.

Avropa Komissiyasının Qonşuluq Siyasəti və Genişlənmə Danışıqları üzrə Baş Direktorluğunun nümayəndəsi Luçiya Santuçone Aİ-nin institusional quruculuq alətləri olan Tvinninq və TAIEX-in Şərq Tərəfdaşlığı ölkələrində tətbiqinə dair ümumi və ölkələr üzrə göstəriciləri diqqətə çatdırıb.

Tədbirdə Azərbaycan dövlət qurumlarının, Avropa İttifaqının üzv dövlətlərinin səfirliklərinin, beynəlxalq təşkilatlar və fondların nümayəndələri iştirak edib.

Konfransın keçirilməsində məqsəd potensial benefisiar qurumları və digər maraqlı tərəfləri Tvinninq, TAIEX, SIQMA və SOCIEUX kimi Avropa İttifaqının institusional quruculuq alətləri və Azərbaycanda bu alətlərdən istifadə etməklə əldə edilən nailiyyətlər barədə məlumatlandırmaq, eləcə də institusional quruculuq fəaliyyətində iştirakın faydaları və yaratdığı imkanlar barədə məlumatları iştirakçıların diqqətinə çatdırmaqdır.