Bakı, 22 may, AZƏRTAC

Mayın 22-də Azərbaycan Respublikası Milli Məclisi sədrinin birinci müavini Ziyafət Əsgərov ölkəmizdə səfərdə olan Avropa Parlamentinin Xarici Əlaqələr Komitəsinin yeni sədri, Avropa Xalq Partiyasının Almaniyadan olan deputatı Devid MakAlisterin başçılıq etdiyi nümayəndə heyəti ilə görüşüb.

AZƏRTAC xəbər verir ki, hazırda Azərbaycanla Avropa Parlamenti arasında münasibətlərin yaxşı istiqamətdə inkişaf etdiyini vurğulayan birinci vitse-spiker Devid MakAlisterin böyük nümayəndə heyəti ilə ölkəmizə səfərindən məmnunluq ifadə edib, deputatların qarşılıqlı səfərlərini müsbət dəyərləndirib. Ziyafət Əsgərov Azərbaycanın Cənubi Qafqazdakı öncül mövqeyi barədə məlumat verib.

Avropa Parlamentinin Xarici Əlaqələr Komitəsinin sədri Devid MakAlister bildirib ki, başçılıq etdiyi nümayəndə heyəti altı gün Cənubi Qafqazda olacaq, üç ölkədə görüşlər keçirəcək. Nümayəndə heyətinin tərkibinə Avropa Parlamentində təmsil olunan müxtəlif siyasi qrupların üzvləri daxildir. Səfərin məqsədi Azərbaycandakı vəziyyətlə yaxından tanış olmaqdır.

Bu gün səhər Azərbaycan Prezidenti İlham Əliyevin qəbulunda olduqlarını deyən qonaq həmin görüşdən çox zəngin təəssüratla ayrıldıqlarını vurğulayıb. O, Milli Məclislə Avropa Parlamenti, həmçinin Avronest Parlament Assambleyası arasında əlaqələrin davamlı inkişafına ümidvar olduğunu bildirib.

Görüşdə əməkdaşlığın perspektivlərinə dair fikir mübadiləsi aparılıb, Azərbaycanın ağrılı problemi olan Dağlıq Qarabağ münaqişəsi barədə danışılıb. Ermənistan-Azərbaycan, Dağlıq Qarabağ münaqişəsinin həlli üçün beynəlxalq təşkilatların öz dəstəyini gücləndirməsinin vacibliyi vurğulanıb.

x x x

Həmin gün Milli Məclisin beynəlxalq münasibətlər və parlamentlərarası əlaqələr komitəsinin sədri, Azərbaycanın AŞPA-dakı nümayəndə heyətinin rəhbəri Səməd Seyidov Avropa Parlamentinin Xarici Əlaqələr Komitəsinin sədri Devid MakAlisterin başçılıq etdiyi nümayəndə heyəti ilə görüşüb.

Səməd Seyidov Azərbaycanın Avropa Şurası qarşısında götürdüyü öhdəlikləri layiqincə yerinə yetirməsindən, Avropa İttifaqı ilə əməkdaşlığın mövcud durumundan söz açıb. O, Azərbaycanın regionda böyük nüfuza sahib dövlət olduğunu, ölkəmizin bir sıra məsələlərdə bütün dünya üçün nümunə olduğunu vurğulayıb. Qeyd edib ki, Azərbaycan Avropa İttifaqı və Avropa Parlamenti ilə münasibətlərini qarşılıqlı hörmət, anlaşma əsasında davam etdirməyə, bunun üçün hər zaman açıq fikir mübadiləsi aparmağa hazırdır.

Devid MakAlister ölkəmizdə İslam Həmrəyliyi Oyunları çərçivəsində qonaqlar üçün yaradılan şəraitdən, göstərilən qonaqpərvərlikdən məmnunluğunu ifadə edib. O, Azərbaycanda keçirdikləri görüşlərin əməkdaşlığımızın dərinləşməsində xüsusi əhəmiyyəti olacağını diqqətə çatdırıb. Qonaq parlamentlərarası münasibətlərin dərinləşməsinin yaxşı nəticələri olacağına, bu münasibətlərin xalqlarımızın ümumi maraqlarına xidmət edəcəyinə ümidvar olduğunu bildirib.

Söhbət zamanı Avropa Parlamenti ilə Azərbaycan arasında əməkdaşlığın perspektivləri, Dağlıq Qarabağ münaqişəsinin həlli yolları, regionda və dünyada sülhün bərqərar olması üçün atılan addımlar, bu istiqamətdə səylərin gücləndirilməsi və qarşılıqlı maraq doğuran digər məsələlər ətrafında fikir mübadiləsi aparılıb.