CƏMİYYƏT
Avropa Şurasının ekspertlərinə Azərbaycanda insan hüquqları sahəsində əldə edilən uğurlar barədə məlumat verilib
Bakı, 20 yanvar, AZƏRTAC
Azərbaycan Respublikasının İnsan Hüquqları üzrə Müvəkkili Aparatında Avropa Şurasının ölkəmizdə səfərdə olan ekspertləri Con Makgukin və xanım Katerin Kramer ilə görüş keçirilib.
Ombudsman Aparatının rəhbəri Aydın Səfixanlı qonaqlara Azərbaycanda insan hüquqları sahəsində həyata keçirilən islahatlar, milli qanunvericiliyin daha da təkmilləşdirilməsi, insan hüquqları sahəsində uğurlar, ölkəmizin 250-dən çox beynəlxalq konvensiyaya, o cümlədən BMT-nin “İşgəncə və digər qəddar, qeyri-insani və ya ləyaqəti alçaldan rəftar və ya cəza əleyhinə Konvensiya”sının Fakültativ Protokoluna qoşulması barədə məlumat verib. O, Fakültativ Protokolunun icrasının təmin edilməsi ilə bağlı ölkə Prezidentinin müvafiq Sərəncamı ilə Ombudsmanın Milli Preventiv Mexanizm (MPM) funksiyalarını yerinə yetirən təsisat qismində müəyyən olunması, bunun məntiqi davamı olaraq təsisatda müvafiq şöbənin və Milli Preventiv Qrupun (MPQ) yaradılması haqqında danışıb.
Aparatın rəhbəri müvəkkil Elmira Süleymanovanın çoxşaxəli fəaliyyəti haqqında da məlumat verib, beynəlxalq təşkilatlarla, o cümlədən Avropa Şurası ilə insan hüquqları istiqamətində qurulmuş səmərəli əməkdaşlıq əlaqələri, həyata keçirilən birgə layihələri diqqətə çatdırıb. O, ombudsmanın MPM qismində fəaliyyəti üzrə də dövlət qurumları, QHT-lər, vətəndaş cəmiyyəti ilə əməkdaşlıq əlaqələrinin qurulduğunu, şikayətlərin araşdırıldığını, müvafiq “qaynar xətlər”ə müraciətlərə dərhal reaksiya verildiyini, məhkumların hüquqlarının diqqətdə saxlanıldığını, habelə hüquqi maarifləndirmə tədbirlərinin təşkilini vurğulayıb.
Ombudsman Aparatının şöbə müdiri, MPQ-nin rəhbəri Rəşid Rumzadə saxlanılan şəxslərin öz iradəsi ilə tərk edə bilmədiyi yerlərə, o cümlədən penitensiar müəssisələrə, həmin müəssisələrdə tibbi sanitar hissələrə keçirilmiş başçəkmələr, milli və beynəlxalq standartlar əsasında verilmiş tövsiyələr və onların icrası vəziyyəti barədə ətraflı danışıb.
Görüşdə ombudsmanın Avropa İttifaqının TWINNING, TAIEX, Şərq Tərəfdaşlığı proqramlarında iştirakı, habelə beynəlxalq əməkdaşlıq çərçivəsində BMT-nin İşgəncələrin qarşısının alınması üzrə Alt Komitəsi, Avropa Şurasının İşgəncələrin qarşısının alınması üzrə Avropa Komitəsi, İşgəncələrin Qarşısının alınması üzrə Assosiasiya ilə qarşılıqlı əməkdaşlıq etdiyi diqqətə çatdırılıb.
Qonaqlar Azərbaycan ombudsmanının fəaliyyətini, o cümlədən MPM qismində gördüyü işləri yüksək dəyərləndirib, onları maraqlandıran suallar ətraflı cavablandırılıb.