İQTİSADİYYAT
Avstraliyada Azərbaycanın iqtisadi və investisiya imkanlarının təqdimatı keçirilib
Bakı, 26 may, AZƏRTAC
Avstraliyanın Pert şəhərində Azərbaycanın iqtisadi və investisiya imkanlarının təqdimatı keçirilib.
Milli Məclisin mətbuat xidmətindən AZƏRTAC-a bildiriblər ki, tədbir avstraliyalı sahibkarlar üçün Azərbaycanın fəxri konsulluğu tərəfindən təşkil olunub.
Azərbaycanın Avstraliyadakı fəxri konsulu Aydan Rzayeva son illər ölkəmizdə qeydə alınan sürətli iqtisadi inkişafdan, respublikada həyata keçirilən layihələrdən və ölkəmizin investisiyalar üçün cəlbediciliyindən danışıb. Xüsusilə enerji resurslarının istehsalı layihələrinin həyata keçirilməsi və “Cənub Qaz Dəhlizi” layihəsi, nəqliyyat layihələri, o cümlədən Bakı-Tbilisi-Qars dəmir yolu haqqında məlumatlar təqdim edilib. Qeyd olunub ki, ölkənin əsas prioritetləri arasında iqtisadiyyatın qeyri-neft sektorunun, kənd təsərrüfatının və ixracyönümlü məhsul istehsalının inkişafı yer alıb.
Azərbaycan-Avstraliya Dostluq Cəmiyyətinin prezidenti Con Hammond müasir Azərbaycan, onun multikulturalizm və tolerantlıq dəyərləri haqqında məlumat verib. O qeyd edib ki, bu gün Azərbaycan müasir dünyanın problemlərinin müzakirə olunduğu mərkəzə çevrilir. Bundan başqa, elan olunub ki, bu ilin oktyabr ayında Bakıda Avstraliya-Azərbaycan biznes-forumunun keçirilməsi planlaşdırılır.
Görüşdə Avstraliyanın kənd təsərrüfatı, süd məmulatları istehsalı, heyvandarlıq sahələrində bizneslə məşğul olan şirkətlərinin, eləcə də neft-qaz, nəqliyyat və turizm şirkətlərinin 60-dan çox nümayəndəsi iştirak edib.
İqtisadi potensialın təqdimatı böyük marağa səbəb olub və iştirakçıların əksər hissəsi Bakıdakı biznes-forumda da iştirak etmək arzusunda olduğunu ifadə edib.