Kanberra, 29 may, AZƏRTAC

28 May-Respublika Günü münasibətilə Azərbaycanın Avstraliya İttifaqındakı səfirliyi tərəfindən Kanberrada ziyafət təşkil edilib.

Tədbirdə hökumət nümayəndələri, parlamentin üzvləri, aparıcı dövlət və özəl şirkətlərin, tədqiqat mərkəzləri və universitetlərin nümayəndələri, diplomatik korpusun əməkdaşları, kütləvi informasiya vasitələrinin təmsilçiləri, bu ölkədə yaşayan azərbaycanlılar iştirak ediblər.

Tədbir Azərbaycan və Avstraliyanın dövlət himnlərinin səsləndirilməsi ilə başlanıb.

Səfir Rövşən Cəmşidov çıxışında Azərbaycan Xalq Cümhuriyyətinin yaranma tarixi haqqında danışıb, onun qısa müddət ərzində mövcud olmasına baxmayaraq, Azərbaycanın dövlət quruculuğunda oynadığı böyük rol barədə tədbir iştirakçılarına məlumat verib. 70 illik fasilədən sonra Azərbaycanın dövlət müstəqilliyini bərpa etdiyini qeyd edən səfir müstəqilliyin ilk illərində yaranmış çətinlikləri xalqımızın uğurla aradan qaldırmasından bəhs edib. O, son illər Azərbaycan iqtisadiyyatının dinamik inkişafı, iqtisadi artım göstəriciləri haqda qonaqlara məlumat verilib. Azərbaycanın digər sahələrdəki uğurlarını mərasim iştirakçılarının diqqətinə çatdıran R.Cəmşidov gələn ay ilk Avropa Oyunlarının Bakı şəhərində keçiriləcəyini qeyd edib.

İki ölkə arasında əlaqələrdən bəhs edən səfir Azərbaycanın Avstraliya ilə müxtəlif sahələr üzrə əməkdaşlığın genişləndirilməsinə böyük əhəmiyyət verdiyini vurğulayıb.

Ermənistanın Azərbaycana qarşı yürütdüyü işğalçılıq siyasətinə toxunan R.Cəmşidov bunun bütün regionun inkişafına mənfi təsir göstərdiyini təəssüflə qeyd edib. Azərbaycanın dünya ölkələrindən problemin həllində qəti, ədalətli mövqe gözlədiyi vurğulanıb və təcavüzkar ölkənin işğala məruz qalmış ölkədən fərqləndirilməsinin zəruri olduğunu bildirib.

Avstraliya Xarici İşlər və Ticarət Departamentinin protokol xidmətinin rəisi Kris Kannan Avstraliya hökuməti adından Azərbaycan xalqını Respublika Günü münasibəti ilə təbrik edib.

Sonra ziyafət verilib.

Tədbirdə “Tagiev music scholl”un üzvlərindən ibarət kvartetin ifası, eyni zamanda, Azərbaycan diasporunun üzvü Eldar Rubinovun şəxsi kolleksiyasına aid olan, azərbaycanlı rəssamların çəkdikləri şəkillər qonaqlar tərəfindən maraqla qarşılanıb.

Ziyafət zamanı ilk Avropa Oyunlarının video təqdimatı keçirilib, Azərbaycanın iqtisadiyyatını, turizm imkanlarını, mədəniyyətini özündə əks etdirən müxtəlif videoçarxlar nümayiş etdirilib.

Qonaqlara “İRS-Heritage”, “Vision of Azerbaijan” jurnalları, Avropa Oyunlarına həsr olunan açıqcalar, həmçinin “Bakıda ilk Avropa Oyunları keçiriləcək” adlı məqalənin dərc olunduğu “The Canberra Times” qəzeti paylanılıb.

Vüqar Ağayev

AZƏRTAC-ın xüsusi müxbiri

Kanberra