DÜNYA


Avstriya rəsmisi: Terrorla mübarizədə messencer xidmətlərinə nəzarət gücləndirilməlidir

Vyana, 28 may, AZƏRTAC

Cəmiyyətin ən böyük bəlası olan terrorla mübarizədə “Skype” və ya “WhatsApp” kimi messencer xidmətlərinə nəzarət üçün polisin səlahiyyətləri gücləndirilməlidir.

Bu fikri Avstriya Konstitusiyanın Mühafizəsi və Terrorla Mübarizə Federal İdarəsinin direktoru Peter Qridlinq Böyük Britaniyanın Mançester şəhərində törədilmiş terror aktı və digər Avropa ölkələrində mümkün terror təhlükəsini şərh edərkən bildirib.

Avstriya Teleradiosuna (ORF) verdiyi müsahibədə P.Qridlinq qeyd edib ki, hazırda ümumi kommunikasiyanın təxminən 80 faizinin bu xidmətlər vasitəsilə həyata keçirildiyini nəzərə aldıqda, hüquq-mühafizə orqanlarının müvafiq fəaliyyətində doldurulması mümkün olmayan boşluqlar yaranıb. Ənənəvi telefon danışıqları yerinə müasir texnoloji imkanlardan istifadə edən terrorçularla mübarizədə hüquq-mühafizə orqanlarına qanunla əlavə səlahiyyətlər verilməlidir. O, həmçinin “ağıllı” nəzarət sistemlərinin tətbiqinin genişləndirilməsini tələb edib, şifrələnmiş videotelefon və messencer proqramlarına polis nəzarətini asanlaşdırmaq və ictimai yerlərdə aparılan videoçekilişlərin arxivdə saxlanma müddətini uzatmaq üçün qanunvericilikdə dəyişiklik aparılmasını vacib addımlar sırasına daxil edib.

Avstriyada konkret şübhədoğurucu məqamların olmadığını diqqətə çatdıran P.Qridlinq deyib ki, ölkədə 300-dən artıq keçmiş “cihadçı”nın yaşaması daimi təhlükə potensialının mövcud olduğunu göstərir: “300 insanı bütün sutka ərzində mütəmadi şəkildə müşahidə altında saxlamağın mümkünlüyünə inanmaq sadəcə illüziyadır”. Mançester hadisəsinə işarə edən direktor qeyd edib ki, əgər bu qrup insanlarla bağlı prioritetlər tətbiq olunmasa, qeyri-fəal təbəqəyə aid şəxslərin müəyyən situasiyalarda ən fəal fiqura çevrilməsi baş verəcək.

Elgün Niftəli

AZƏRTAC-ın xüsusi müxbiri

Vyana

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.