İQTİSADİYYAT
Avtomobil hissələrini idxal edən şəxslərin gömrük ödənişlərindən yayınması hallarına qarşı tədbirlər görülür VİDEO
Bakı, 11 mart, AZƏRTAC
Avtomobil hissələrini idxal edən şəxslərin gömrük ödənişlərindən yayınması hallarına qarşı tədbirlər görülür.
Dövlət Gömrük Komitəsinin mətbuat xidmətindən AZƏRTAC-a bildirilib ki, son vaxtlar ayrı-ayrı şəxslər tərəfindən müxtəlif ölkələrdən avtomobil hissələrinin ölkə ərazisinə gətirilməsi, gömrük sərhədindən keçirildikdən sonra isə yenidən quraşdırılaraq satışa çıxarılması, bununla da gömrük vergi və rüsumlarından yayınma hallarına yol verilməsi halları müşahidə olunur.
Bakı Baş Gömrük İdarəsi əməkdaşlarının apardığı araşdırma nəticəsində bu qəbildən bir neçə fakt aşkar edilib.
2016-cı ilin oktyabrından etibarən Almaniyadan Azərbaycan Respublikasının vətəndaşı Qəribov Nizami Novruz oğlu tərəfindən KBD888/KD888 nömrə nişanlı avtomaşınla 8 yerdən ibarət - 5800 kiloqram çəkidə, BA444KU/BA347B nömrə nişanlı avtomaşınla isə 6 yerdən ibarət - 4100 kiloqram çəkidə “Mercedes” markalı avtomobillər üçün qabaq hissələr gətirilib.
Eyni zamanda, ötən ilin dekabrından Bolqarıstandan Kərimov Eldar Qurban oğlunun ünvanına LL414II/AV929V nömrə nişanlı avtomaşınla 6 yerdən ibarət - 1800 kiloqram çəkidə “Mercedes” markalı avtomobilin arxa hissələri, bu ilin yanvar ayında isə Bolqarıstandan Balamedov Nəzir Süleyman oğlunun ünvanına 99XE432 nömrə nişanlı avtomaşınla 1 yerdən ibarət - 400 kiloqram çəkidə “Mercedes” markalı avtomobillərin arxa hissələri göndərilib.
Bundan başqa, 2017-ci ilin yanvarında Almaniyadan Əkbərov Hüseyn Əkrəm oğlunun adına QB941BQ nömrə nişanlı avtomaşınla 4 yerdən ibarət - 600 kiloqram çəkidə “Mercedes” markalı avtomobillər üçün arxa hissələr gətirilib.
Lakin eyni əməllər hüquqi şəxslər tərəfindən də törədilir.
2016-cı ilin noyabrında Birləşmiş Ərəb Əmirliklərindən “Vitol-L Group” MMC-nin ünvanına 99B12310/99B12410 nömrə nişanlı avtomaşınla 4 yerdən ibarət - 1800 kiloqram çəkidə “Mercedes” markalı avtomobillər üçün arxa və qabaq hissələr, həmin ilin dekabrında isə Birləşmiş Ərəb Əmirliklərindən “Truzz” MMC-nin ünvanına 12B28910/12B29010 nömrə nişanlı avtomaşınla 4 yerdən ibarət - 900 kiloqram çəkidə “Mercedes” markalı avtomobillər üçün arxa hissələr gətirilib.
Bu ilin yanvarında isə Birləşmiş Ərəb Əmirliklərindən “Hikan Trade Company” MMC-nin ünvanına 86B65510/86B65610 nömrə nişanlı avtomaşınla 1 yerdən ibarət - 150 kiloqram çəkidə “Mercedes” markalı avtomobillər üçün arxa hissələr gətirilib.
Sadalanan bütün hallar Bakı Baş Gömrük İdarəsinin əməkdaşları tərəfindən gömrük nəzarətinin həyata keçirilməsi zamanı aşkar edilib və gömrük qaydalarının pozulması faktı kimi araşdırmalar aparılması məqsədilə saxlanılıb.
Dövlət Gömrük Komitəsi xarici iqtisadi fəaliyyətlə məşğul olan fiziki və hüquqi şəxslərin diqqətinə çatdırır ki, gömrük vergi və rüsumlarından yayınmağa hesablanan belə hərəkətlərə qarşı mübarizə tədbirləri davamlı şəkildə həyata keçiriləcək.