İQTİSADİYYAT
Avtomobil və dəmir yolları strukturunun yenilənməsi hərəkətin təhlükəsizliyinə müsbət təsir göstərir
Bakı, 17 dekabr, Ceyhun Rüstəmov, AZƏRTAC
Son illər ölkənin avtomobil və dəmir yolları strukturu əhəmiyyətli dərəcədə yenilənib. Müasir avtomobil yolları, yol qurğuları, əsaslı təmir edilən dəmir yolları, yeni vaqonlar sərnişin və yükdaşımaya, hərəkətin təhlükəsizliyinə müsbət təsirini göstərməkdədir. Nəqliyyat Nazirliyinin Nəqliyyatda təhlükəsizlik şöbəsinin müdiri Kazım Şərifov AZƏRTAC-ın müxbirinə bu sahədəki mövcud vəziyyət haqqında məlumat verib.
Həyata keçirilmiş tədbirlər nəticəsində yol-nəqliyyat hadisələrinin sayının ümumən azaldığını bildirən K.Şərifov qeydə alınan statistik rəqəmləri açıqlayıb:
- 2014-cü ilin 10 ayında 1025,5 kilometr avtomobil yolu tikilib, yenidən qurulub və ya təmir edilib, 35 yeni körpü, 6 tunel, 15 piyada keçidi inşa olunub. Bu yollardan 288,6 kilometri respublika əhəmiyyətli, 681,9 kilometri yerli əhəmiyyətli, 55 kilometri isə Bakı şəhəri ərazisindəki yollardır. Nəqliyyat Nazirliyinin xidmət etdiyi avtomobil yollarının yenidən qurulan hissələrində 836 yol nişanı, 10 min 665 siqnal dirəyi, 38 min 974 poqonmetr əyrixətli tirlər quraşdırılıb, 2267366 kvadratmetr yolun xətlənməsi və 267861 kvadratmetr yol elementlərinin rənglənməsi işləri görülüb. Bu və digər tədbirlər nəticəsində bu ilin 10 ayında avtobus və yük avtomobilləri ilə bağlı baş vermiş yol-nəqliyyat hadisələrinin sayında ötən ilin müvafiq dövrü ilə müqayisədə azalma müşahidə olunub. Belə ki, 10 ayda qəza nəticəsində ölənlərin sayı 2013-cü ilin müvafiq dövrü ilə müqayisədə 22,7 faiz, yaralananların sayı isə 7,9 faiz azalıb.
Dəmir yolunda da hərəkətin təhlükəsizliyinin təmin edilməsi istiqamətində həyata keçirilmiş konkret tədbirlər də müsbət nəticə verməkdədir. “Dəmir yolu nəqliyyat sisteminin 2010-2014-cü illərdə inkişafına dair Dövlət Proqramı”nın həyata keçirilməsi üzrə Tədbirlər Planına əsasən dəmir yollarının əsaslı təmir işləri davam etdirilir. Təmir işləri aparılmış sahələrdə sərnişin qatarlarının sürətinin ilkin mərhələdə saatda 100 kilometrə, növbəti mərhələdə isə 140 kilometrə çatdırılması nəzərdə tutulur. Lakin dəmir yolu keçidlərinin çox olması və bir-birinə yaxın məsafədə yerləşməsi qatarların yüksək sürətlə hərəkəti zamanı təhlükəsizliyin təmin edilməsi baxımından bir çox problemlər yaradır.
Bu səbəbdən Nəqliyyat Nazirliyi tərəfindən dəmir yolu üzərindəki bəzi qorunmayan keçidlərin ləğv edilməsinə başlanılıb. Həmsöhbətim indiyədək Heybət-Puta, Puta-Qaradağ, Qaradağ-Səngəçal, Qarabucaq-Müsüslü, Ucar-Əlikənd, Ləki-Malay, Malay-Yevlax, Mingəçevir Baş Goran, Kürəkçay-Dəliməmmədli, Şəmkir-Dəllər, Zəyəm-Qovlar, Qovlar-Tovuz, Poylu-Ağstafa və digər mənzillərdə belə keçidlərin ləğv edildiyini bildirib.
K.Şərifov qeyd edib ki, hərəkətin təhlükəsizliyində dəmir yolunun texniki qurğu və avadanlıqlarının sazlığı, səmərəli istismarı da böyük rol oynayır. “Dəmir yolu nəqliyyat sisteminin 2010-2014-cü illərdə inkişafına dair Dövlət Proqramı” çərçivəsində 2011-ci ildə 40 kilometrdən çox, 2012-ci ildə 130 kilometrdən çox, 2013-cü ildə 147 kilometr, 2014-cü ilin 10 ayında isə 51 kilometr yol əsaslı təmir olunub. Stansiyaların ərazilərində bu ilin 10 ayında 81 dəst yoldəyişən qurğunun metal hissələri və 29 dəst çevirici tirlər dəyişdirilib və 52,1 kilometr yolda calaqsız rels qoyulub.
Lokomotiv parkının gücləndirilməsi üçün də lazımi addımlar atılıb. Bu dövrdə 5 ədəd ВЛ-8 və ВЛ-11 seriyalı elektrovoz, 3 ədəd manevr teplovozu cari təmir olunub, 1 ədəd 2TE10M teplovozu Ukraynanın Poltava teplovoz təmiri zavodunda əsaslı təmir edilərək respublikaya gətirilib. Hazırda 4 ədəd ТЭМ-2 seriyalı manevr teplovozu Latviyanın Dauqavpilis lokomotiv təmiri zavodunda əsaslı təmirdədir.
Sərnişin vaqon parkının texniki vəziyyətinin yaxşılaşdırılması məqsədilə istismar müddəti başa çatmış 10 sərnişin vaqonu əsaslı təmir üçün “Dnepropetrovsk vaqon təmir-quraşdırma” ASC-yə göndərilib. On ayda Bakı vaqon deposunda 78 vaqon depo təmirindən, 17 vaqon əsaslı, 645 vaqon isə cari təmirdən keçib. Yük vaqon parkı üzrə də inventar parka məxsus 19990 vaqon cari və əsaslı təmir olunub.
Şöbə müdiri bildirib ki, görülmüş tədbirlərə baxmayaraq, bəzi hallarda sürücülər tərəfindən yol hərəkəti qaydalarının pozulması nəticəsində dəmir yolu keçidlərində qəzalar da baş verir. 2014-cü ilin 10 ayında dəmir yolu keçidlərində 31 toqquşma hadisəsi qeydə alınıb, 4 nəfər ölüb, 11 nəfər müxtəlif dərəcəli bədən xəsarəti alıb.