İQTİSADİYYAT
“AzInTelecom” MMC beynəlxalq keyfiyyət sertifikatına layiq görülüb
Bakı, 22 noyabr, AZƏRTAC
Rabitə və Yüksək Texnologiyalar Nazirliyinin tabeliyində fəaliyyət göstərən “AzInTelecom” MMC beynəlxalq keyfiyyət sertifikatını (ISO/IEC 20000-1:2011) əldə edib. Bu sertifikat müştərilərinə beynəlxalq tələblərə uyğun keyfiyyətli informasiya texnologiyaları xidmətləri göstərən müəssisələrə verilir.
Nazirlikdən AZƏRTAC-a bildirilib ki, keyfiyyət sertifikatlaşdırılması üçün 1864-cü ildə təsis olunan və QVI (Quality Veritas International) şirkətinin vasitəçiliyi ilə Azərbaycana təqdim olunan Norveçin DNV GL (Det Norske Veritas Germanischer Lloyd) şirkəti seçilib.
2016-cı ilin aprelində daxili prosedur və təşkilati işlərin normaları üçün ISO/IEC 20000-1:2011 beynəlxalq keyfiyyət sertifikatının alınması ilə bağlı işlərə başlanılıb. Sentyabrda aparılan ilkin, noyabrda isə final audit nəticəsində heç bir ciddi uyğunsuzluq aşkar edilməyib və “AzInTelecom” MMC-yə ISO/IEC 20000-1:2011 keyfiyyət sertifikatının verilməsi üçün qərar qəbul edilib.
Növbəti addım xidmətlərin daha da yaxşılaşdırılması üçün həyata keçirilən işlərin davam etdirilməsi və informasiya təhlükəsizliyi üzrə “ISO 27001:2013” standartının əldə olunmasıdır.
Nəticədə, “AzInTelecom” MMC informasiya texnologiyaları standartları üzrə beynəlxalq informasiya təhlükəsizliyi norma və tələblərinə cavab verən data mərkəzi xidmətləri göstərən etibarlı xidmət provayderi olacaq.
Qeyd edək ki, “AzInTelecom” MMC bu sertifikatdan öncə regionda TEİR III sertifikatı almış yeganə data mərkəzidir.