Bakı, 17 yanvar, AZƏRTAC 

Yanvarın 17-də Azərbaycan Avtomobil Yolları Dövlət Agentliyində ötən ilin yekunları və 2018-ci ildə qarşıda duran vəzifələr müzakirə edilib.

Agentliyin mətbuat xidmətindən AZƏRTAC-a bildirilib ki, iclas iştirakçıları əvvəlcə ulu öndər Heydər Əliyevin büstü önünə gül dəstələri qoyaraq, onun xatirəsini ehtiramla yad ediblər.

İclasda çıxış edən Azərbaycan Avtomobil Yolları Dövlət Agentliyinin İdarə Heyətinin sədri Saleh Məmmədov 2017-ci il ərzində Prezident İlham Əliyevin birbaşa dəstəyi və qayğısı nəticəsində respublikanın avtomobil yollarının inkişafı istiqamətində çox mühüm layihələrin həyata keçirildiyini və hazırda da bu işlərin uğurla davam etdirildiyini vurğulayıb.

S. Məmmədov Prezident İlham Əliyev tərəfindən 2017-ci il 18 oktyabr tarixində imzalanmış 1638 nömrəli Fərmana əsasən, “Azəravtoyol” Açıq Səhmdar Cəmiyyətinin yenidən təşkil edilərək Azərbaycan Avtomobil Yolları Dövlət Agentliyinin yaradılmasına diqqət yetirib. O, Azərbaycanın yol təsərrüfatı işçilərinin əməyinə verdiyi bu yüksək qiymətə və etimada görə dövlətimizin başçısına agentliyin kollektivi adından dərin minnətdarlığını bildirib və yeni yaradılan qurumun verilən bütün tapşırıqların vaxtında və yüksək keyfiyyətlə yerinə yetiriləcəyinə söz verib.

S. Məmmədov 2017-ci il ərzində agentlik tərəfindən nəzərdə tutulan bütün respublika əhəmiyyətli, kənd və qəsəbələrarası avtomobil yolu layihələri üzrə tikinti və yenidənqurma işlərinin uğurla icra olunduğunu qeyd edərək, ümumilikdə uzunluğu 1335 kilometr olan yolların yenidən qurulduğunu və təmir olunduğunu iclas iştirakçılarının nəzərinə çatdırıb.

Saleh Məmmədov regionlarda nəzərdə tutulan bütün infrastruktur layihələrin icrasının, insanların həyat şəraitinin yaxşılaşmasına birbaşa təsir edən turizmin və kənd təsərrüfatının inkişafına gətirib çıxaracaq kənd və qəsəbələrarası avtomobil yollarının tikintisinin vacibliyini qeyd edərək, 2018-ci ildə də bu istiqamətdə genişmiqyaslı işlərin aparılacağını, uzunluğu 2 min kilometrdən artıq kəndlərarası və qəsəbələrarası avtomobil yolu, habelə digər respublika əhəmiyyətli və magistral avtomobil yollarının layihələrinin icrasının həyata keçiriləcəyini söyləyib.

İclasda çıxış edən digər natiqlər də Azərbaycanda yol infrastrukturunun inkişafının ölkənin əsas prioritetlərindən birinə çevrildiyini və ulu öndər Heydər Əliyev tərəfindən müəyyənləşdirilən sosial-iqtisadi siyasətin mühüm istiqamətlərindən birinin də məhz bu mühüm sahənin inkişafı ilə bağlı olduğunu vurğulayıblar. Prezident İlham Əliyevin də uğurlu daxili siyasəti sayəsində qazanılan müvəffəqiyyətlərin sırasında yol infrastrukturunun yenilənməsi və inkişafı önəmli yer tutur.

Qeyd olunub ki, növbəti illərdə də Azərbaycan Avtomobil Yolları Dövlət Agentliyi tərəfindən sözügedən prosesin reallaşdırılması davam etdiriləcək.