CƏMİYYƏT


Azərbaycan Beynəlxalq Sosial Təminat Assosiasiyasının Bürosuna və Avropa Şəbəkəsinin Rəhbər Komitəsinə üzv seçilib

A+ A

Bakı, 21 noyabr, AZƏRTAC

Azərbaycan Respublikasının əmək və əhalinin sosial müdafiəsi nazirinin müavini İdris İsayevin rəhbərlik etdiyi nümayəndə heyəti Beynəlxalq Sosial Təminat Assosiasiyasının (BSTA) və Panama Respublikasının Sosial Sığorta Fondunun birgə təşkilatçılığı ilə Panama şəhərində keçirilən Dünya Sosial Təminat Forumunda iştirak edib.

Nazirliyin ictimaiyyətlə əlaqələr şöbəsindən AZƏRTAC-a bildiriblər ki, üç ildə bir dəfə keçirilən bu mötəbər tədbirdə 125-dən çox ölkədən 1000-ə yaxın nümayəndə iştirak edib.

Dünyanın bütün regionlarından sosial müdafiə və sosial təminat təşkilatlarını bir platformada birləşdirən BSTA ən dinamik sosial sığorta sistemlərinin yaradılması və təşviqi məqsədilə sosial sahənin qarşılaşdığı problemlər, onların həlli yolları, uğurlar və nöqsanlar barədə təcrübə mübadiləsini təşkil edən beynəlxalq təşkilatdır. Assosiasiya həmçinin üzv təşkilatlara informasiya və ekspert dəstəyinin göstərilməsi, praktiki tövsiyələrin verilməsi və s. üzrə əhəmiyyətli tədbirləri həyata keçirir.

Müxtəlif sosial təminat təşkilatlarının bir yerdə cəmləşdiyi bu unikal platformada təqdimatla çıxış edən BSTA-nın baş katibi Hans-Horst Konkolevski dünyada sosial təminat sistemi qarşısında duran çətinliklər, problemlər, onların aradan qaldırılması yolları və qlobal çağırışlar barədə geniş məlumat verib. Hazırda sosial təminat sahəsinin qarşısında duran əsas çağırışları 10 qrup üzrə təsnifləsdirən H.Konkolevski qeyd edib ki, bu qruplara sosial təminatın əhatə dairəsinin genişləndirilməsi, uzunmüddətli dövrdə cəmiyyətdə bərabər imkanların və əhalinin sağlamlığının təmin edilməsi, əhalinin yaşlanmasının doğurduğu fəsadların aradan qaldırılması daxildir. O, həmçinin gənc nəslin məşğulluğunun təmin edilməsinin, rəqəmsal iqtisadiyyatın əmək bazarına təsirinin güclənməsinin və iş yerlərinin avtomatlaşdırılmasının, fövqəladə vəziyyətlərin yaratdığı sosial risklərin, əmək miqrantlarının sosial müdafiəsinin, texniki təkamül və yüksək ictimai gözləntilərin bu qruplar sırasında olduğunu bildirib.

Azərbaycan nümayəndə heyəti də forumun işində fəal iştirak edib. İ.İsayev plenar iclasdakı çıxışında, eləcə də müxtəlif görüşlər zamanı Azərbaycan Prezidenti İlham Əliyevin həyata keçirdiyi düşünülmüş sosial-iqtisadi islahatlar nəticəsində ölkəmizdə etibarlı və dayanıqlı sosial müdafiə və sosial təminat sistemlərinin formalaşdığını vurğulayıb. Ölkəmizdə sosial müdafiə sisteminin idarə edilməsində informasiya-kommunikasiya texnologiyalarından geniş istifadə olunduğunu diqqətə çatdıran İ.İsayev sosial sahədə dövlət xidmətlərinin elektron xidmətlər müstəvisində əhalinin istifadəsinə təqdim olunduğu barədə geniş məlumat verib. Nazir müavini Azərbaycanın sosial müdafiə sahəsində bu uğurlarının beynəlxalq təşkilatlar tərəfindən də diqqətlə izləndiyini və yüksək qiymətləndirildiyini bildirib. O, ölkəmizin bu təcrübəsinin digər ölkələr tərəfindən geniş istifadəsini təmin etmək məqsədilə Azərbaycanın da təmsil olunduğu BSTA-nın İnformasiya-Kommunikasiya Texnologiyaları (İKT) üzrə texniki komissiyasının əhəmiyyətindən bəhs edib.

Tədbirin texniki innovasiyalar və İKT paralel sessiyasında Azərbaycan nümayəndə heyəti ölkəmizdə əmək və sosial təminat sahəsində İKT-nin tətbiqi ilə bağlı əldə edilmiş nailiyyətlər, ortaya çıxan çətinliklər və həllər barədə məlumat verib. Qeyd olunub ki, Azərbaycanda əmək və sosial təminat sahəsində İKT-nin tətbiqindən əldə olunan uğurların əsas amili onun ölkənin milli strategiyasının əsas elementinə çevrilməsi olub. Ölkədə digər sahələrində olduğu kimi, əmək və sosial müdafiəsi sahəsində də İKT-nin tətbiqi ilə uğurlu islahatlar davam etdirilir.

İnnovativ yanaşmaların və İKT-nin müasir nailiyyətlərinin tətbiqi nəticəsində yaradılmış Vahid Elektron Müraciət və Təyinat Alt Sistemi, Tibbi-Sosial Ekspertiza və Reabilitasiya Alt Sistemi, Əmək Müqaviləsi Bildirişi Elektron İnformasiya Sistemi, Pensiyaların avtomatlaşdırılmış təyinatı sistemi, Fərdi uçot sistemi və s. barədə təqdim olunan məlumatlar tədbir iştirakçıları tərəfindən maraqla qarşılanıb. Səsləndirilən suallar ətrafında müzakirələr, eləcə də qurumlar arası elektron məlumat mübadiləsinin təşkili, fərdi məlumatlar və onların təhlükəsizliyi, xidmətlərin əlçatanlığı, vətəndaş məmnunluğu və xidmət keyfiyyətinin artırılması və s. məsələlərlə bağlı fikir mübadiləsi aparılıb.

Tədbirdə İKT-nin tətbiqi sahəsində Azərbaycanın zəngin və uğurlu təcrübəsi nəzərə alınaraq, BSTA katibliyinin təklifi ilə Azərbaycan nümayəndə heyətinin üzvü, Əmək və Əhalinin Sosial Müdafiəsi Nazirliyinin İnformasiya texnologiyaları şöbəsinin müdir müavini, İKT üzrə BSTA texniki komissiyasının üzvü Sabir Qocayev bu komissiyanın 2014-2016-cı illər ərzində üzərində işlədiyi ana məlumatların (Masterdata) idarəolunması və İKT üzrə beynəlxalq sosial sığorta müqavilələri (təşkilatlar arası məlumat mübadiləsi) sahəsində BSTA tövsiyələrinin yekun versiyası barədə təqdimatla çıxış edib.

Forum çərçivəsində BSTA-nın 113-cü və 114-cü Büro iclasları, 32-ci Baş Assambleyasının Sessiyası, Dünya Sosial Təminat Sammiti, 36-cı Şuranın Sessiyası, BSTA Avropa Şəbəkəsinin Rəhbər Komitəsinin iclası keçirilib, forumun ümumilikdə 44 sessiyasında 132 məruzəçi çıxış edib.

Sosial təminat sahəsində ölkəmizdə aparılan uğurlu islahatlar nəzərə alınmaqla Azərbaycan ikinci dəfə BSTA büro üzvü seçilib. Büro BSTA-nın əsas idarəetmə və eyni zamanda Baş Assambleya toplantıları arasında 3 il müddətində Şura qərarlarını həyata keçirən orqanıdır. O, BSTA-nın tərkibindəki digər orqanlardan fərqli olaraq, qərar qəbuletmə proseslərində yaxından iştirak edir, bu proseslər müddətində aparılan dəyişikliklərdən ən qısa müddətdə xəbərdar olur və ya bu proseslərin idarəetməsini həyata keçirir.

Eyni zamanda, Azərbaycan növbəti dəfə Avropa Şəbəkəsinin Rəhbər Komitəsinin üzvü seçilib. 2008-ci ildən fəaliyyət göstərən Avropa Şəbəkəsi Rəhbər Komitəsi BSTA-nın əsas fəaliyyət istiqamətlərinə uyğun olaraq region ölkələrinin birgə fəaliyyət planına uyğun tədbirləri həyata keçirir. Rəhbər Komitə üzv təşkilatların qarşılaşdıqları başlıca problemlərin qlobal çağırışlar fonunda həlli yollarının qarşılıqlı müzakirəsi və təcrübə mübadiləsinin aparılmasının təşkili üçün tədbirlər görür. Komitəyə Avropa regionundan sosial təminat sahəsində mütərəqqi təcrübəyə malik 13 ölkə daxildir.

Forumda Azərbaycanın sosial təminat sahəsində uğurlu islahatlar təcrübəsi və BSTA-nın fəaliyyətində aktiv iştirakı nəzərə alınmaqla, BSTA-nın üç ildə bir dəfə keçirilən Avropa Regional Sosial Təminat Forumunun növbəti dəfə Bakıda keçirilməsi qərara alınıb və razılaşma memorandumu imzalanıb.

Bu, Azərbaycanın sosial təminat sahəsində apardığı islahatlara, ölkədə görülmüş işlərə və həyata keçirilən siyasətə verilmiş yüksək qiymətdir.

Qeyd edək ki, cari ilin aprel ayında İsveçin paytaxtı Stokholm şəhərində keçirilmiş sonuncu Avropa Regional Sosial Təminat Forumunda sosial təminat sistemlərində innovativ yanaşmaların və qabaqcıl texnologiyaların tətbiqi ilə seçilən iş təcrübələrinin mükafatlandırılması mərasimində də Azərbaycan Respublikanın Əmək və Əhalinin Sosial Müdafiə Nazirliyinin “Çağrı Mərkəzi vasitəsilə avtomatlaşdırılmış pensiya təyinatı” xidməti BSTA-nın Müsbət Təcrübə üzrə Fəxri Diplomuna (Certificate of Merit) layiq görülərək, müsbət təcrübələr üzrə məlumat bazasına daxil edilib.

Beş gün davam edən Dünya Sosial Təminat Forumu zamanı Azərbaycan nümayəndə heyəti dünyanın bir sıra aparıcı ölkələrinin sosial təminat qurumlarının rəhbərləri və ekspertlərlə qarşılıqlı fikir mübadiləsi aparıb, əməkdaşlıq perspektivləri müzakirə olunub.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.