İQTİSADİYYAT
Azərbaycan “Cənub” qaz dəhlizinin siyasiləşdirilməsinə yol vermədən reallaşmasını təmin edib
Bakı, 25 noyabr, Nihad Budaqov, AZƏRTAC
Azərbaycan vaxtında məsuliyyəti tam öz üzərinə götürməklə və layihənin siyasiləşdirilməsinə yol vermədən “Cənub” qaz dəhlizinin reallaşmasını təmin edib.
Energetika Nazirliyindən AZƏRTAC-a bildirilib ki, bu barədə energetika nazirinin müavini Natiq Abbasovun Almaniya İqtisadiyyat və Sənaye Nazirliyinin xarici iqtisadi siyasət idarəsinin rəhbəri Ekard Fransın rəhbərlik etdiyi nümayəndə heyəti ilə keçirdiyi görüşdə danışılıb.
Görüşdə enerji təhlükəsizliyinin təminatı istiqamətində “Cənub Qaz Dəhlizi” layihəsinin həyata keçirilməsinin cari vəziyyəti, “Transxəzər” qaz kəməri layihəsinin reallaşma perspektivləri, eləcə də alternativ enerji və enerjiyə qənaət sahəsində ikitərəfli münasibətlərin genişləndirilməsi potensialı ətrafında müzakirələr aparılıb.
Azərbaycan-Almaniya əlaqələrinin yüksələn xətlə inkişaf etdiyini deyən N.Abbasov bu əməkdaşlığın enerji sahəsində qanunvericilik, enerji təhlükəsizliyi və etibarlılığa dair təcrübənin öyrənilməsi, enerji bazarında islahatların dərinləşdirilməsi, enerji infrastrukturlarının müasirləşdirilməsi, enerji səmərəliliyi, enerjiyə qənaət və bərpaolunan enerji növlərinin inkişafı kimi istiqamətləri əhatə etdiyini qeyd edib. Bildirib ki, Xəzər qazını Avropaya nəql edəcək “Trans-Adriatik” boru kəməri (TAP) layihəsində Almaniyanın “E.ON Global Commodities SE” şirkəti 2014-cü ilədək 9 faiz paya malik olub.
Bundan başqa, SOCAR-ın Almaniyanın “RWE” şirkəti ilə “Naxçıvan” perspektiv strukturunun kəşfiyyatı və işlənilməsi, enerji və buxar istehsalı üzrə isə “UNIPER” şirkəti ilə mövcud əməkdaşlıq əlaqələrindən bəhs edilib.
Almaniya İqtisadiyyat və Sənaye Nazirliyinin xarici iqtisadi siyasət idarəsinin rəhbəri Ekard Frans “Cənub” qaz dəhlizinin Avropa üçün mühüm önəm daşıdığını qeyd edərək, layihənin ayrı-ayrı seqmentləri üzrə görülən işlər və layihənin şaxələndirilməsi perspektivləri ilə maraqlanıb.
N.Abbasov layihənin icra vəziyyəti barədə qonaqları məlumatlandıraraq deyib ki, Azərbaycan vaxtında məsuliyyəti tam öz üzərinə götürməklə və layihənin siyasiləşdirilməsinə yol vermədən “Cənub” qaz dəhlizinin reallaşmasını təmin edib. Layihənin vaxtında başa çatdırılması ilə bağlı hazırda heç bir çətinlik müşahidə olunmur.
Görüşdə, həmçinin E.Fransın Azərbaycanın alternativ və bərpaolunan enerji mənbələri, eləcə də enerji səmərəliliyi ilə bağlı gördüyü tədbirlər və prioritetləri ilə bağlı sualları da cavablandırılıb. Enerji səmərəliliyinin enerji sektorunun həlli vacib məsələlərindən olduğu vurğulanaraq, bu sahədə Almaniya təcrübəsindən bəhrələnməyin zəruriliyi bir daha qeyd edilib.