IV İSLAM HƏMRƏYLİYİ OYUNLARI


Azərbaycan Cüdo Federasiyası IV İslam Həmrəyliyi Oyunlarına ciddi hazırlaşır

Bakı, 26 yanvar, AZƏRTAC

Azərbaycan Cüdo Federasiyası IV İslam Həmrəyliyi Oyunlarına ciddi hazırlaşır.

AZƏRTAC xəbər verir ki, bunu Azərbaycan Cüdo Federasiyasının baş katibi Elmar Babanlı IV İslam Həmrəyliyi Oyunlarının rəsmi saytına (www.baku2017.com) müsahibəsində deyib.

Son bir il ərzində ölkəmizdə cüdonun inkişafı istiqamətində mühüm addımların atıldığını vurğulayan baş katib federasiya rəhbərliyində dəyişikliklərin olduğunu qeyd edib. Bildirib ki, “Böyük dəbilqə” yarışı Rio Olimpiadasına lisenziya qazandıran son turnir idi və ondan sonra cüdoçular uğurlar əldə etdilər. Rüstəm Orucovun, Elmar Qasımovun Olimpiadadakı çıxışlarının xalqımızı sevindirdiyini deyən baş katib həmin uğurlu nəticələrin davamlı olmasını gözlədiklərini bildirib.

Mötəbər yarışa hazırlıq işlərindən danışan E.Babanlı deyib: “Federasiya IV İslam Həmrəyliyi Oyunlarına ciddi hazırlaşır. Ölkəmizdə keçiriləcək mötəbər yarışda hər bir idmançı iştirak etmək istəyir. İdmançılarımız artıq təlim-məşq toplanışlarına başlayıblar. Hər hansı böyük yarışlara hazırlaşmaq üçün idmançılar müəyyən turnirlərdə iştirak etməlidirlər. Odur ki, cüdoçularımız IV İslam Həmrəyliyi Oyunlarından əvvəl keçiriləcək bir neçə böyük yarışlara qatılacaqlar. “Böyük dəbilqə” turniri növbəti dörd il ərzində yenə Bakıda keçiriləcək və artıq bu haqda danışıqlar yekunlaşıb. Beynəlxalq Cüdo Federasiyasının nümayəndəsi Nasir Əl Xamimi Bakıda keçirilən “Böyük dəbilqə” turnirində iştirak edib və yarışın yüksək səviyyədə təşkili ilə bağlı məmnunluğunu bildirib. Qələbələrimizin davamlı olması üçün çox çalışırıq”.

Cüdoçularımızdan IV İslam Həmrəyliyi Oyunlarında parlaq qələbələr gözlədiklərini söyləyən baş katib komandada bütün çəki dərəcələrində qalib gələ biləcək istedadlı idmançıların olduğunu diqqətə çatdırıb. Qazanılan nailiyyətlərin idmançılara əlavə stimul verdiyini qeyd edən E.Babanlı bildirib ki, hazırda heyətdə zədəli idmançı yoxdur. Ancaq bu, qarşıdakı yarışlardan sonra daha dəqiq bilinəcək. Federasiya rəsmisi cüdoçuların bu ilin fevralında Romada keçiriləcək beynəlxalq turnirdə iştirak edəcəklərini bildirib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.