Bakı, 26 may, AZƏRTAC

Mayın 26-da Azərbaycan Dillər Universitetində (ADU) Avstriya Mübadilə Xidməti (OeAD) informasiya mərkəzinin nümayəndələri ilə görüş keçirilib.

Universitetdən AZƏRTAC-a bildiriblər ki, tədbirdə ADU-nun rektoru, Milli Məclisin deputatı, professor Səməd Seyidov Azərbaycan ilə Avstriya arasında əlaqələrin yüksək səviyyədə olduğunu vurğulayıb. ADU-da fəaliyyət göstərəcək Avstriya Mübadilə Xidmətinin perspektivlərindən danışan rektor bu xidmətdən yalnız universitetin tələbələrinin deyil, həmçinin alman dili üzrə təhsil alan, dili öyrənmək istəyən hər kəsin faydalanmaq imkanı olduğunu qeyd edib. O, OeAD informasiya mərkəzinin yaradılmasının Azərbaycanda ilk addım olduğunu söyləyib. Ölkəmizdə fransızdilli və ingilisdilli orta məktəblərin fəaliyyət göstərdiyini deyən S.Seyidov bu təşəbbüsün almandilli orta məktəbin fəaliyyəti üçün zəmin yaradacağına əminliyini ifadə edib.

Görüşdən məmnunluğunu bildirən OeAD-ın rəhbəri Stefan Zotti ADU-da fəaliyyət göstərən Avstriya kitabxanasının maraqlı kitablarla zənginləşdirildiyini vurğulayıb. O, Avstriya Mübadilə Xidmətinin informasiya mərkəzinin yaradılmasının ikitərəfli əlaqələrin intensiv inkişafına böyük töhfə olacağını söyləyib.

Təhsil Nazirliyinin sektor müdiri Sülhəddin Gözəlov qeyd edib ki, təhsil və mədəniyyət qədər ölkələri bir-birinə yaxınlaşdıran ikinci amil yoxdur. BMT-nin XXI əsri təhsil əsri adlandırdığını vurğulayan S.Gözəlov Prezident İlham Əliyevin müvafiq Sərəncamı ilə təsdiq edilmiş “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” haqqında danışıb. Bu proqram çərçivəsində 3200 azərbaycanlı gəncin dünyanın aparıcı universitetlərində təhsil aldığını söyləyən sektor müdiri proqramın ikinci mərhələsinin 2016-2020-ci illəri əhatə edəcəyini vurğulayıb. Hazırda Azərbaycan gənclərinin Dövlət Proqramı çərçivəsində Avstriyanın aparıcı təhsil ocaqlarında oxuduqlarını söyləyən S.Gözəlov bunun Azərbaycan və Avstriya arasında əlaqələrin inkişafı baxımından mühüm əhəmiyyət daşıdığını diqqətə çatdırıb.

ADU-nun alman dilinin tərcüməsi kafedrasının baş müəllimi Səfa Əliyeva Avstriya Mübadilə Xidmətinin yaranması haqqında qısa məlumat verib, bu xidmətin müxtəlif təqaüd proqramlarını təklif etdiyini bildirib. Avstriya Mübadilə Xidmətinin rəsmi internet saytına (www.oead.at) daxil olmaqla bu xidmət barədə ətraflı məlumat almağın mümkünlüyü diqqətə çatdırılıb.

Sonda ADU-nun nəzdində OeAD informasiya mərkəzinin yaradılmasına və fəaliyyətinə dair S.Seyidov və OeAD-ın rəhbəri S.Zotti arasında müqavilə imzalanıb.

Müqaviləyə əsasən Azərbaycan və Avstriya arasında tələbə mübadiləsinin inkişafı üçün Avstriya təhsil və təqaüd proqramları haqqında mütəmadi konsultasiyalar, birgə layihələrin həyata keçirilməsi ilə bağlı digər Avstriya nümayəndəlikləri, eləcə də mədəniyyət və təhsil sahəsində fəaliyyət göstərən vasitəçi Azərbaycan təşkilatları ilə əlaqələrin yaradılması, ali məktəblərlə keçiriləcək görüş proqramlarının təşkili, Avstriya kitabxanası ilə birgə Azərbaycan universitetlərində sərgilərin, mühazirələrin, film və musiqi tədbirlərinin, eləcə də Azərbaycanda keçirilə biləcək elmi konfrans və simpoziumların təşkili qaydaları nəzərə alınaraq ADU-nun nəzdində Avstriya Mübadilə Xidməti fəaliyyətə başlayıb.