ELM VƏ TƏHSİL
Azərbaycan Dövlət Neft və Sənaye Universitetində ikinci Startap və İnnovasiya Festivalı keçirilib
Bakı, 16 iyun, AZƏRTAC
İyunun 16-da Azərbaycan Dövlət Neft və Sənaye Universitetində (ADNSU) II Strartap və İnnovasiya Festivalı keçirilib.
AZƏRTAC xəbər verir ki, müvafiq qurumların nümayəndələrinin, Milli Məclisin deputatlarının, universitet rektorlarının, səfirliklərin nümayəndələrinin iştirak etdikləri tədbirdə ADNSU-nun rektoru, professor Mustafa Babanlı bu ali məktəbin fəaliyyəti, təhsil müəssisəsində hazırlanan layihələr barədə ətraflı məlumat verib.
ADNSU-nun “eazi START” Startap və İnnovasiya Mərkəzinin son iki ildə gördüyü işlərdən danışan M.Babanlı gənclərin təqdim etdikləri layihələrin gələcəkdə böyük uğur qazanacağına inandığını bildirib. Rektor deyib: “Əsas məqsədlərimizdən biri odur ki, gələcəkdə tələbələr buraxılış işlərini startap ideyaları ilə təqdim etsinlər. Növbəti illərdə universitet sərhədlərini aşıb bu cür buraxılış festivallarını daha geniş formada təşkil etməyi planlaşdırırıq”.
Sonra universitetin “eazi START” startap məktəbinin “Smart Keyboard”, “Cam Touch”, “General Reporting Platform”, “Multivizor” və “KubiRub” layihələrinin təqdimatı olub.
Nəqliyyat, rabitə və yüksək texnologiyalar naziri Ramin Quluzadə rəhbərlik etdiyi qurumun ölkədə informasiya texnologiyalarının inkişafına xüsusi önəm verdiyini bildirib. Vurğulanıb ki, nazirliyin İKT Fondu, Yüksək Texnologiyalar Parkı, Biznes İnkubasiya Mərkəzində müvafiq sahədə müəyyən işlər görülüb. İnnovasiya sahələrinin inkişafı üçün bir çox startap layihələrinə qrantlar ayrılır. Bu günədək İKT Fondu tərəfindən innovasiya sahələri üzrə dörd qrant müsabiqəsi keçirilib. 600-dən çox layihədən 100-ü maliyyələşdirilib. Nazirliyin Yüksək Texnologiyalar Parkına bu günədək 300-dən çox startapçı müraciət edib. Onlardan 29-u parkda daimi fəaliyyət göstərir. 150-dək startapçı isə qurumla mütəmadi əməkdaşlıq edir.
Təhsil naziri Mikayıl Cabbarov ali məktəblərdə startap ideyalarının icrasının həm tələbələr, həm də təhsil müəssisələrinin özləri üçün yeni imkanlar yaratdığını diqqətə çatdırıb. Onun sözlərinə görə, bu layihələrin həyata keçirilməsi gənclərin sahibkarlıq ruhunun inkişaf etdirilməsinə, biznes potensialının artmasına xidmət edir.
Nazir qeyd edib ki, startap layihələrinin icrası tələbələrin sahibkarlıq ruhunun inkişaf etdirilməsi ilə yanaşı, ali məktəblərin də əlavə qazanc əldə etməsində müəyyən rol oynaya bilər.
ADNSU-nun startap məktəbinin daha altı layihəsi təqdim olunub.
Sonra “dəyirmi masa” keçirilib. M.Babanlı şirkət nümayəndələrinə göstərdikləri dəstəyə görə minnətdarlığını bildirib, universitet və müəssisələr arasında qurulan əməkdaşlığın hər iki tərəfə böyük fayda verəcəyini qeyd edib.
“Dəyirmi masa”da sərmayəçilərlə startap layihələrinin inkişafı, görüləcək işlər, birgə əməkdaşlıq və digər məsələlər barədə müzakirələr aparılıb.