Bakı, 22 sentyabr (AZƏRTAC, Ceyhun Rüstəmov). Son illər ölkəmizdə turizmin inkişafı özünün yeni yüksəliş mərhələsinə qədəm qoyub. Paytaxtımızda və respublikamızın səfalı bölgələrində yaradılmış müasir infrastruktur, yüksək xidmət mədəniyyəti xarici turistlərin Azərbaycana marağının artmasına səbəb olub. Təkcə bir faktı demək kifayətdir ki, ötən il ölkəmizə 2 milyon 500 mindən çox turist səfər edib. Bununla yanaşı, Azərbaycandan xaricdə dincəlməyə gedənlərin sayı da ilbəil artmaqdadır. Onların bir çoxu “Azərbaycan Hava Yolları”nın xidmətindən məmnuniyyətlə istifadə edir.

Sərnişinlərə yüksək səviyyədə xidmət göstərməyi qarşıya məqsəd qoyan “Azərbaycan Hava Yolları”nın devizi belədir: “Biz sizin üçün yaranmışıq”. Bu, gəlişigözəl kəlmələr deyil, sıralarında bir neçə min nəfərlik peşəkar və mehriban kollektivi birləşdirən milli aviaşirkətimizin sərnişinlərin rahatlığına yönəlmiş fəaliyyətinin real təcəssümüdür. Öz yüksək xidmət mədəniyyəti ilə fərqlənən “Azərbaycan Hava Yolları” bu missiyanı uğurla yerinə yetirir.

Uçuş coğrafiyasını genişləndirərək hazırda dünyanın 36 məntəqəsinə reyslər təşkil edən milli aviaşirkətimiz sərnişinlərə əlavə imkanlar da yaradır. Hər il olduğu kimi, bu il də turizm mövsümü ərəfəsində aviaşirkətin qardaş Türkiyənin ən məşhur turist məkanlarından olan Antalya, Bodrum, İzmir və Dalamana birbaşa aviareyslər açması səyahət həvəskarlarına sevinc bəxş etdi. Bununla da hər bir sərnişin “Azərbaycan Hava Yolları”nın yüksək servis xidmətindən yararlanmaqla, arzuladığı səfərə çıxmaq şansı qazandı.

“Azərbaycan Hava Yolları” QSC-nin prezidenti Cahangir Əsgərovun təşəbbüsü ilə bir qrup azərbaycanlı jurnalistin Antalyaya dörd günlük səfəri də maraqlı və yaddaqalan oldu. Bu səfər, eyni zamanda, KİV işçilərinin “Azərbaycan Hava Yolları” tərəfindən göstərilən xidmətlə əyani şəkildə tanış olmasına şərait yaratdı.

İndi isə səfər təəssüratları barədə. Sentyabrın 18-də Heydər Əliyev Beynəlxalq Aeroportundan yerli vaxtla saat 13-də havaya qalxan və göyərtəsində 71 nəfərin olduğu “Aerobus-340” hava gəmisi ilə uçuş zamanı həmsöhbət olduğum sərnişinlər “Azərbaycan Hava Yolları”ının yüksək xidmət səviyyəsindən razılıqlarını bildirirdilər.

Maksimal sürəti saatda 890 kilometr olan bu hava gəmisi birbaşa 15 min 742 kilometr məsafə qət edə bilir. Bu da öz növbəsində uzaqməsafəli uçuşları daha səmərəli həyata keçirməyə imkan yaradır. “Aerobus-340” təyyarələri bu gün dünyanın ən nüfuzlu aviaşirkətləri tərəfindən istifadə edilir. Hava gəmisi sərnişinlərin rahatlığını təmin etmək üçün bütün zəruri avadanlıqla təchiz olunub. O da ürəkaçan faktdır ki, sentyabrın 24-də açılacaq Bakı-Nyu-York aviareysi məhz bu təyyarə ilə həyata keçiriləcək.

İki saat 50 dəqiqə sürən uçuşdan sonra təyyarə Antalya hava limanında yerə endi. Azərbaycanlı jurnalistləri qonaqpərvərliklə qarşılayan “Summer Tour” turizm şirkətinin nümayəndəsi bizi Antalyanın ən məşhur otellərindən olan “Rixos” otelinə yerləşdirdi.

“Azərbaycan Hava Yolları” QSC prezidentinin köməkçisi, xidmət rəisi Məhərrəm Səfərli jurnalistlərə müsahibəsində qeyd etdi ki, artıq turizm mövsümünün sonuna yaxınlaşırıq. “Azərbaycan Hava Yolları”nın rəhbərliyi xoşməramlı addım ataraq aviaşirkətin fəaliyyətini işıqlandıran jurnalistlərin bir qrupunun Antalyada istirahətini təşkil edib.

Türkiyəyə istirahətə gedən azərbaycanlıların sayının ilbəil artdığını diqqətə çatdıran M.Səfərli vurğuladı ki, aviaşirkətin təyyarələri ilə Antalya, Bodrum, İzmir və Dalamana bu il 30 minədək yerli turist səfər edib. Türkiyənin turizm bölgələrinə aviareyslərin təşkil olunması QSC-nin azərbaycanlı turistlərin qardaş ölkəyə rahat və birbaşa səfər etmələri üçün yaratdığı əlverişli imkandır. Bu hava reysləri ölkələrimizin qarşılıqlı əlaqələrinin getdikcə möhkəmlənməsindən, ticarət və turizm əlaqələrinin artmasından xəbər verir. “Azərbaycan Hava Yolları” üzərinə ölkələrimiz arasındakı münasibətlərə töhfə vermək kimi şərəfli bir missiya götürüb. Yeni təyyarələr alındıqca Türkiyənin digər şəhərlərinə də uçuşların həyata keçirilməsi nəzərdə tutulur.

“Summer Tour” şirkətinin icraçı direktoru Təhminə Quliyeva jurnalistlərlə söhbət zamanı dedi ki, Bakı-Antalya-Bakı aviareysi açıldıqdan sonra azərbaycanlı turistlər Antalyaya daha çox gəlirlər. Burada ilin bütün fəsillərində turistlərə xidmət göstərilir. Yay mövsümündə 30 mindən çox turist qəbul etdiklərini diqqətə çatdıran icraçı direktor turistlərə bu cür gözəl imkan yaratdığına və əməkdaşlığa görə “Azərbaycan Hava Yolları”nın rəhbərliyinə təşəkkürünü bildirdi.

Səfər çərçivəsində jurnalistlərə Antalya ilə yaxından tanış olmaq, bu səfalı və qədim şəhərin tarixi yerlərini ziyarət etmək, dincəlmək üçün hər cür şərait yaradıldı. Türkiyənin cənubunda, Aralıq dənizi sahillərində yerləşən Antalya məşhur kurort şəhəridir. Ölkənin turizm paytaxtı sayılan bu məkan gözəl çimərlikləri ilə seçilir. Ərazisi 1,4 min kvadratkilometr, əhalisi təxminən 2 milyon olan Antalyaya il ərzində 10 milyona yaxın turist gəlir. Yeni və tarixi hissədən ibarət olan şəhərdə Aralıq dənizi iqlimi hakimdir. Yayı isti və quru, qışı mülayim və yağmurlu keçir. Ümumiyyətlə, Türkiyənin Aralıq dəniz sahilləri ekoloji baxımdan ən təmiz ərazilər hesab olunur. Özünəməxsus arxitekturası və tarixi abidələri ilə məşhur olan şəhər dağlarla əhatələnib.

Turist axınının daha çox qeydə alındığı məkan Qalayçı adlanan qədim şəhərdir. Antalyanın görməli yerlərinin əksəriyyəti də demək olar ki, bu ərazidə yerləşir. Buradakı evlərin çoxu mehmanxana və restorana çevrilib. Yivli minarəsi Antalyanın simvolu hesab olunur. Hündürlüyü 39 metrə çatan abidə 1230-cu ildə Sultan Ələddin Keyqubad tərəfindən inşa edilib. Əsası XIX əsrdə qoyulan Saat qülləsi, Xıdırlıq qalası, Adrianın qapıları, Atatürk və Mərmərli parkları da şəhər sakinləri və qonaqların sevimli istirahət məkanlarıdır. Türkiyənin ən zəngin muzeylərindən biri məhz Antalyadadır. Burada Osmanlı imperiyasınaqədərki dövrün tapıntıları, romalılara aid heykəllərlə işlənmiş sarkofaqlar nümayiş olunur.

Türkiyənin cənnət bölgəsində aldığı xoş təəssüratları bölüşən həmkarım M.Əhmədoğlu Antalyada ilk dəfə olduğunu vurğulayaraq dedi: “Həqiqətən də bu bölgə gözəl təbiətə, qədim tarixə malikdir. Bilirdim ki, Türkiyə tanınıb-seçilən turist məkanları ilə məşhurdur. Antalyada bunu öz gözlərimlə gördüm. Təsadüfi deyil ki, “Azərbaycan Hava Yolları”nın qardaş Türkiyəni gəzib görmək üçün yaratdığı bu gözəl fürsətdən çoxları yararlanıb. Bu aviareys təkcə turist səfərləri üçün deyil, eyni zamanda, ölkələrimiz arasında əlaqələrin daha da möhkəmlənməsinə xidmət edir. Bu işdə “Azərbaycan Hava Yolları”na uğurlar arzulayıram”.

Jurnalist Nurlan Əliyev isə “Azərbaycan Hava Yolları”nın yerli media işçiləri üçün yaratdığı bu fürsəti yüksək qiymətləndirərək dedi: “Biz Antalyaya ən müasir hava gəmilərindən olan “Aerobus-340” təyyarəsi ilə uçduq. Öz rahatlığı ilə seçilən bu təyyarənin uçuş heyətinin sərnişinlərə göstərdiyi yüksək xidmətin şəxsən şahidi oldum. Bir jurnalist olaraq mənə məlumdur ki, təhlükəsiz uçuşları ilə seçilən milli aviaşirkətimiz öz təyyarə parkını son illər bir çox müasir hava gəmiləri ilə zənginləşdirib. Bu günlərdə Nyu-Yorka açılması nəzərdə tutulan birbaşa aviareys də “Azərbaycan Hava Yolları”nın geniş imkanlarından xəbər verir. Siz də bilirsiniz ki, ABŞ-ın Federal Aviasiya Administrasiyası heç də hər şirkətə aviasiya sahəsində uçuşların təşkilinin və təhlükəsizliyinə nəzarətin səviyyəsinin “1-ci dərəcə”yə uyğunluğu barədə müsbət rəy vermir. “Azərbaycan Hava Yolları” bu proseduru uğurla başa vuraraq, ABŞ aeroportlarına müntəzəm uçuşlar həyata keçirmək hüququ əldə edib. Milli aviasiyamızın bu və digər uğurları həqiqətən qürurvericidir və mediada daha tez-tez işıqlandırılmağa layiqdir.

Yerli media işçilərinin Antalya ilə tanışlığı sentyabrın 21-də başa çatdı. 160 sərnişinlə paytaxt Bakıya dönən “Boeing-757” təyyarəsində jurnalistlər, yerli turistlər bir-biriləri ilə xoş təəssüratlarını bölüşürdülər.

Bu gün Azərbaycanın mülki aviasiyası ölkənin ümumi inkişafının, qüdrətli iqtisadi potensialının güzgüsünə çevrilib, sərnişinlərin seçim və etibarını qazanmaqla ölkəmizi xaricdə də layiqincə təmsil edir. Regionda, eyni zamanda, MDB məkanında yeni hava gəmilərinin sayına görə lider olan “Azərbaycan Hava Yolları”nın təyyarə parkı əsasən “Boeing-757”, “Boeing-767”, “Aerobus-319”, “Aerorbus-320”, “Aerobus-340”, “Embraer-170” və “Embraer-190” kimi müasir avialaynerlərdən ibarətdir. Əminliklə demək olar ki, aviaşirkət uçuş coğrafiyasını daha da genişləndirəcək və dünyanın hər yerinə körpülər salacaq.

Ceyhun Rüstəmov

AZƏRTAC-ın müxbiri

Bakı-Antalya-Bakı