İQTİSADİYYAT
Azərbaycan İKT-nin inkişaf indeksinə görə MDB ölkələri arasında liderlər sırasındadır
Bakı, 23 noyabr, AZƏRTAC
Beynəlxalq Telekommunikasiya İttifaqının (BTİ) saytında yer almış “İnformasiya Cəmiyyətinin ölçülməsi 2016” adlı hesabata əsasən, Azərbaycan informasiya kommunikasiya texnologiyalarının (İKT) inkişaf indeksinə (IDI) görə dünyada 58-ci yeri tutub (ötənilki hesabatda ölkəmiz 67-ci yerdə qərarlaşmışdı).
Rabitə və Yüksək Texnologiyalar Nazirliyindən AZƏRTAC-a bildirilib ki, Azərbaycan bu göstərici üzrə MDB regionunda Moldova (68-ci yer), Ermənistan (71-ci yer), Gürcüstan (72-ci yer), Ukrayna (76-cı yer), Özbəkistan (110-cu yer), və Qırğızıstanı (113-cü yer) geridə qoyaraq Belarus (31-ci yer), Rusiya (43-cü yer) və Qazaxıstandan (52-ci yer) sonra dördüncü yerdə qərarlaşıb.
BTİ-nin qiymətləndirməsinə görə, 2016-cı ildə Azərbaycanın IDI-si ötən illə müqayisədə (6.23) artaraq 6.28 təşkil edib.
2016-cı ildə giriş subindeksi 6.78 (63-cü yer) və istifadə subindeksi 5.70 (50-ci yer) təşkil edib.
Hesabatda 2015-ci ildə stasionar və mobil genişzolaqlı rabitə xidmətləri üzrə qiymət səbəti qeyd olunub. BTİ-nin qiymətləndirməsinə görə, 2015-ci ilin nəticəsinə əsasən, Azərbaycanda stasionar genişzolaqlı rabitə sahəsində xidmətlərin qiymət səbəti ümumi daxili məhsulun 1.54 faizini, mobil genişzolaqlı rabitə üzrə “Prepaid” və “Postpaid” istifadəçi kateqoriyasından asılı olaraq 0.62 və 1.08 faiz təşkil edib.
BTİ-nin məlumatına görə, 2015-ci ildə Azərbaycanda stasionar telefon bağlantısının nüfuzetmə səviyyəsi 18.7 faiz (2014-cü ilin göstəricisindən 1.06 faiz aşağıdır) təşkil edib, mobil bağlantıda bu göstərici 111.3 faiz olub ki, bu da 2014-cü ilin göstəricisindən 0.36 faiz yüksəkdir.
Ölkədə 62.4 faiz ev təsərrüfatı kompüterdən istifadə edir və ev istifadəçiləri arasında internetin nüfuzetmə səviyyəsi 76.7 faizdir. 2015-ci ildə bu göstəricilər üzrə artım ötən illə müqayisədə müvafiq olaraq 3.48 və 0.65 faiz olub.