SİYASƏT


Azərbaycan-İran münasibətlərinin inkişafında parlamentlər vacib rol oynayır VİDEO

Seul, 27 iyun, AZƏRTAC

Seulda Avrasiya Ölkələri Parlament Sədrlərinin II Müşavirəsində iştirak edən Milli Məclisin sədri Oqtay Əsədov iyunun 27-də İran İslam Respublikası İslam Şura Məclisinin sədri Əli Laricani ilə görüşüb.

Görüşdə ölkələrimiz arasında münasibətlərin hazırkı vəziyyətinə və müxtəlif sahələrdə əməkdaşlığın inkişafına dair geniş fikir mübadiləsi aparılıb. Tərəflər dost, mehriban qonşular olan İran və Azərbaycan arasında əlaqələrin inkişafında prezidentlərin qarşılıqlı səfərlərinin xüsusi əhəmiyyət daşıdığını vurğulayıblar.

Əli Laricani ölkələrimiz arasında əlaqələrin inkişaf etdiyini, parlamentlərin də öz növbəsində bu münasibətlərin dərinləşməsinə töhfə verdiyini diqqətə çatdırıb. O, iki ölkə arasında iqtisadi əlaqələrin genişlənməsi istiqamətində görülən işləri yüksək qiymətləndirib, bu çərçivədə hökumətlərarası komissiyanın fəaliyyətini təqdir edib. Bildirib ki, komissiyanın iclaslarında ölkələrimizin müxtəlif istiqamətlər üzrə əməkdaşlığının inkişafı ilə bağlı bir çox məsələlər müzakirə olunur, bu da öz növbəsində əlaqələrimizin möhkəmlənməsinə müsbət təsir göstərir.

İran İslam Respublikası İslam Şura Məclisinin sədri Əli Laricani iki ölkə arasında əlaqələrin inkişafında heç bir maneə görmədiyini, Azərbaycanın İran üçün dost, qardaş və yaxın qonşu olduğunu diqqətə çatdırıb.

Milli Məclisin sədri Oqtay Əsədov xalqlarımız arasında mövcud olan tarixi və mədəni bağlılığın münasibətlərimizin qarşılıqlı anlaşma üzərində inkişafına təkan verdiyini, əlaqələrin hazırda müxtəlif istiqamətlər üzrə uğurla inkişaf etdiyini deyib.

Müstəqillik illərində hər iki ölkənin prezidentləri səviyyəsində həyata keçirilən qarşılıqlı səfərlərin əməkdaşlığımız üçün yeni imkanlar açdığını, istiqamətlər müəyyənləşdirdiyini bildirən O.Əsədov ötən müddətdə münasibətlərimizin möhkəm hüquqi bazasının formalaşdırıldığını diqqətə çatdırıb.

Milli Məclisin sədri Azərbaycan-İran münasibətlərinin inkişafında iki ölkənin parlamentlərinin vacib rolunu vurğulayaraq, son illər qanunverici orqanlar arasında əməkdaşlıqda hiss olunan dinamikanı, qarşılıqlı səfərlərin və görüşlərin sayının artmasını sevindirici hal kimi dəyərləndirib.

Oqtay Əsədov Azərbaycan ilə İran arasında iqtisadi münasibətlərin inkişafı istiqamətində görülən işlərdən danışıb, bu çərçivədə hər iki ölkənin böyük potensialından istifadə olunmasının zəruriliyini vurğulayıb.

Şahin Cəfərov

AZƏRTAC-ın xüsusi müxbiri

Seul

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.