SİYASƏT
Azərbaycan-İtaliya parlamentlərarası əlaqələri inkişaf edir
Bakı, 26 may, AZƏRTAC
Mayın 26-da Milli Məclisin sədri Oqtay Əsədov İtaliya Respublikası Senatının Avropa İttifaqının siyasəti daimi komissiyasının sədri, senator Vanino Kitinin başçılıq etdiyi nümayəndə heyəti ilə görüşüb.
Milli Məclisin sədri əmin olduğunu bildirib ki, bu səfər parlamentlərarası əlaqələrin daha da dərinləşməsinə xidmət edəcək. O qeyd edib ki, ölkələrimiz arasında yüksək səviyyəli siyasi dialoq mövcuddur. Dövlət başçıları arasındakı münasibətlər, Prezident İlham Əliyevin İtaliyaya səfəri zamanı keçirilən görüşlər əlaqələrimizi keyfiyyətcə yeni səviyyəyə qaldırıb. İndiyədək ölkələrimiz arasında 39 sənəd imzalanıb ki, bu da səmərəli əməkdaşlığa möhkəm hüquqi təminat verir.
İqtisadi əməkdaşlığın yüksək səviyyədə olduğunu deyən sədr bildirib ki, vaxtilə iki ölkə arasında ticarət dövriyyəsi 5 milyard ABŞ dolları həcmində olub. Oqtay Əsədov son dövrdə bu sahədə azalma müşahidə olunsa da, gələcəkdə bu göstəricinin daha da yüksələcəyinə inandığını qeyd edib.
Söhbət zamanı Milli Məclisin sədri parlamentlər səviyyəsində münasibətlərin yüksək səviyyədə olduğunu bildirib, hər iki ölkənin qanunverici orqanlarında dostluq qruplarının fəaliyyət göstərməsini təqdirəlayiq hesab edib.
Görüşdə Ermənistan-Azərbaycan, Dağlıq Qarabağ münaqişəsindən söz açan Milli Məclisin sədri diqqəti işğalçı Ermənistanın təxribatlarına cəlb edib. Bildirilib ki, BMT Təhlükəsizlik Şurasının, AŞPA-nın münaqişə ilə bağlı qərar və qətnamələrinə məhəl qoymayan Ermənistan işğalçılıq siyasətini davam etdirir. Problemin həlli ilə məşğul olan ATƏT-in Minsk qrupu ötən dövr ərzində heç bir real nəticə əldə etməyib. Cəbhənin təmas xəttində erməni silahlı birləşmələri mülki əhalini iriçaplı silahlardan atəşə tutur. Bunun nəticəsi kimi aprel hadisələri yaşandı və Azərbaycan Ordusu təcavüzkara layiqli cavab verdi. Oqtay Əsədov vurğulayıb ki, işğalçı ilə işğala məruz qalanı eyniləşdirmək olmaz. Azərbaycan bununla heç vaxt barışmayacaq. Ölkələrin ərazi bütövlüyü prinsipi Azərbaycanın prinsipial mövqeyidir.
Senator Vanino Kiti ölkəmizə səfərindən və burada keçirdiyi görüşlərdən məmnun qaldığını söyləyib. O, İtaliyanın Qafqazın bu bölgəsi ilə əlaqələrin inkişafına böyük maraq göstərdiyini xüsusi vurğulayıb. Bildirib ki, dövlət başçıları arasındakı səmimi münasibətlər əlaqələrimizin inkişafına müsbət təsirini göstərir.
Qonaq parlamentlər səviyyəsində əməkdaşlığın dərinləşməsindən söz açaraq deyib ki, deputatların qarşılıqlı səfərləri, müvafiq komitələr arasında birbaşa əlaqələrin qurulması təcrübə mübadiləsi baxımından çox önəmlidir.
X X X
Həmin gün İtaliya nümayəndə heyəti Milli Məclisin beynəlxalq münasibətlər və parlamentlərarası əlaqələr komitəsinin üzvləri ilə də görüşüb.
Komitənin sədr müavini Sevinc Fətəliyeva ölkələrimiz arasındakı dostluq və əməkdaşlıq əlaqələrindən söz açıb. O, Azərbaycanın tarixən Şərqdə qadınlara seçki hüququ verən ilk ölkə olmasından, müstəqillik dövründə əldə etdiyi siyasi-iqtisadi uğurlardan və demokratik institutların bərqərar olmasından danışıb. Xalqımızın tolerantlığı, ölkəmizdə multikultural dəyərlərə və insan hüquqlarının qorunmasına xüsusi önəm verildiyi diqqətə çatdırılıb. Bu günlərdə Azərbaycanın birinci xanımı, Milli Məclisin deputatı Mehriban Əliyevanın təşəbbüsü ilə parlamentdə yeni amnistiya aktı qəbul olunduğu vurğulanıb.
Söhbət zamanı Ermənistan-Azərbaycan, Dağlıq Qarabağ münaqişəsinin həlli, qaçqın və məcburi köçkünə çevrilmiş 1 milyondan çox soydaşımızın hüquqlarının bərpasının vacibliyi qeyd edilib.
Nümayəndə heyətinin rəhbəri Vanino Kiti İtaliyanın Azərbaycanla hərtərəfli əməkdaşlıqda maraqlı olduğunu söyləyib. O, parlamentlərarası əlaqələrin möhkəmləndirilməsinin vacibliyini vurğulayıb. Senator ölkəmizdəki inkişafı, demokratik dəyərlərə üstünlük verilməsini, insan haqları sahəsindəki uğurlu addımları, sözügedən amnistiya aktını məmnunluqla qeyd edib. O, İtaliyanın Ermənistan-Azərbaycan münaqişəsinin sülh yolu ilə həllinə tərəfdar olduğunu söyləyib.
X X X
Nümayəndə heyətinin daha bir görüşü Milli Məclisin İtaliya ilə parlamentlərarası əlaqələr üzrə işçi qrupunun üzvləri ilə keçirilib.
İşçi qrupun rəhbəri, deputat Azər Kərimli görüşdə deyib ki, Azərbaycan dünya dövlətləri, o cümlədən İtaliya ilə əlaqələrin inkişafına böyük önəm verir. Hazırda bu dost ölkə ilə siyasi, iqtisadi, mədəni və humanitar sahələrdə əməkdaşlıq inkişaf edir. Həyata keçirilən iqtisadi islahatlardan, Azərbaycanın təşəbbüskarı və fəal iştirakçısı olduğu qlobal layihələrdən söz açan deputat bildirib ki, bu gün ölkəmizin Avropanın enerji təhlükəsizliyi sistemində özünəməxsus rolu var.
İşçi qrupun rəhbəri parlamentlərarası əlaqələrin inkişafında dostluq qruplarının rolunu qeyd edərək deyib ki, İtaliya parlamentində Azərbaycanla dostluq qrupu ən böyük qrupdur, sayca 65 nəfəri əhatə edir. Milli Məclisdə də İtaliya ilə əlaqələr üzrə işçi qrupu ən böyük qruplardan biridir. Deputatlarımız müxtəlif beynəlxalq təşkilatlarda səmərəli əməkdaşlıq edirlər. Nümayəndə heyətlərinin qarşılıqlı səfərləri təcrübə və informasiya mübadiləsi baxımından çox önəmlidir.
Görüşdə qonaqlara Ermənistan-Azərbaycan, Dağlıq Qarabağ münaqişəsinin mövcud durumu barədə də məlumat verilib. Qeyd edilib ki, Azərbaycan bütövlükdə regionun təhlükəsizliyini təhdid altında saxlayan münaqişənin sülh yolu ilə həllinə tərəfdardır. Amma Ermənistan dövləti Azərbaycan torpaqlarının qeyd-şərtsiz azad edilməsi ilə bağlı BMT-nin və digər beynəlxalq qurumların qəbul etdiyi sənədlərə məhəl qoymur.
Senator Vanino Kiti Azərbaycanda ilk dəfə səfərdə olduqlarını, burada gördüklərindən, keçirdikləri görüşlərdən olduqca məmnun qaldıqlarını söyləyib. O deyib ki, İtaliya böyük iqtisadi potensiala malik Azərbaycanın Avratlantik məkana inteqrasiyasına və ölkədə aparılan islahatlara gələcəkdə də dəstək vermək niyyətindədir.