Bakı, 28 noyabr, AZƏRTAC

Bakıda Azərbaycan Kardiologiya Cəmiyyətinin 4-cü milli konqresi öz işinə başlayıb.

AZƏRTAC xəbər verir ki, konfransda yerli mütəxəssislərlə yanaşı, Gürcüstandan, Almaniyadan, Türkiyədən, Rusiya və digər ölkələrdən tanınmış kardioloq və kardiocərrahlar iştirak edirlər.

Konfransı giriş sözü ilə Azərbaycan Kardiologiya Cəmiyyətinin sədri Firdovsi İbrahimov açıb. Bildirilib ki, konfransın məqsədi Azərbaycanda kardiologiyanın və ürək-damar cərrahiyyəsinin inkişafına töhfə vermək, xarici mütəxəssislərlə təcrübə mübadiləsi aparmaq və tibb elminin bu sahədəki son yeniliklərini müzakirə etməkdir. O deyib ki, konfransda həmçinin kardiologiya və ürək-damar cərrahiyyəsindəki ən mübahisəli problemlərə də toxunulacaq.

Azərbaycan Ürək və Damar Cərrahiyyəsi Cəmiyyətinin (AÜDCC) sədri Kamran Musayev bildirib ki, belə mühüm tədbirlərin ölkəmizdə reallaşması ümummilli liderimiz Heydər Əliyevin əsasını qoyduğu səhiyyə siyasətinin Prezident İlham Əliyev tərəfindən uğurla davam etdirilməsinin məntiqi nəticəsidir. K.Musayev ölkəmizdə kardiologiya və ürək-damar cərrahiyyəsi sahəsində əldə edilmiş nailiyyətlərdən də danışıb.

Konqresdə kardiologiyanın aktual problemlərinə dair mühazirələr oxunub və fikir mübadiləsi aparılıb.

Qeyd edək ki, Azərbaycan Tibb Universitetinin Tədris Terapevtik Klinikasında Azərbaycan Kardiologiya Cəmiyyətinin 4-cü milli konqresi çərçivəsində “Ürəyin Anatomiyası” kursu təşkil olunub. Tibb üzrə fəlsəfə doktoru Mahmud Bağırzadə “Ürəyin embrioloji inkişafı” mövzusunda mühazirə ilə çıxış edib. İnsan ürəyinin rüşeym, döl və doğulduqdan sonrakı dövrlərdə inkişaf mexanizmini kurs iştirakçılarının diqqətinə çatdırıb. Tədris Terapevtik Klinikanın həkim kardioloqu Fuad Səmədov isə “Ürək qapaqlarının klinik anatomiyası” mövzusunda mühazirəsini təqdim etdi, ürək qapaqlarında gedən dəyişikliklərin fərqli təsnifatlarını aparılmış müayinə nəticələri əsasında izah etdi. Daha sonra klinikanın kardioloqu Elnur İsayev “Ürəyin arterial və venoz sistemi” mövzusunda mühazirə ilə çıxış etdi, ürək damarlarının şaxələnməsi və ürəyin qidalanması yollarından danışdı.

Mühazirələrin ardından kurs praktiki hissə ilə davam etdi. Azərbaycan Ürək və Damar Cərrahiyyəsi Cəmiyyətinin sədri, tibb elmləri doktoru K.Musayev və Tədris Terapevtik Klinikanın Ürək-damar Mərkəzinin rəhbəri, dosent Fərid Əliyev həkim rezident və tələbələr üçün ürəyin disseksiyasını həyata keçirdilər.