MƏDƏNİYYƏT
Azərbaycan Konqreslər Bürosu ali təhsil müəssisələri ilə əməkdaşlığı gücləndirir
Bakı, 10 dekabr, AZƏRTAC
Mədəniyyət və Turizm Nazirliyinin nəzdində ölkəmizdə işgüzar turizmin inkişafı üzrə strategiyanın həyata keçirilməsi məqsədilə yaradılan Azərbaycan Konqreslər Bürosu ali təhsil müəssisələri ilə birgə turizm sahəsinin inkişafına həsr olunmuş iclas keçirib.
Mədəniyyət və Turizm Nazirliyinin mətbuat xidmətindən AZƏRTAC-a bildirilib ki, Azərbaycan Turizm İnstitutunda təşkil olunan iclasda ölkəmizdə fəaliyyət göstərən akademiya, universitet və institutların professor-müəllim heyəti iştirak edib.
Tədbirdə ali təhsil ocaqları ilə sıx əməkdaşlıq qurmaq və peşəkar Azərbaycan Görüşlər İttifaqının yaradılması ilə bağlı müzakirələr aparılıb.
Tədbirdə qeyd olunub ki, beynəlxalq konqreslərin təşkili sektoru turizmin ən gəlirli və dinamik inkişaf edən sahələrindən biridir. Hər il dünyada təxminən 16.000-ə yaxın konqres təşkil olunur və dünyanın yüzlərlə şəhəri işgüzar turizmin bu gəlirli sahəsində öncəlik əldə etmək üçün 20 ildən çox bir müddətdir ki, güclü rəqabət aparır.
Tədbirdə həmçinin qeyd edilib ki, beynəlxalq əhəmiyyətli tədbirlərin təşkili ölkə iqtisadiyyatına güclü təkan ola bilər və bu amaldan çıxış edərək bütün səyləri birləşdirməklə Azərbaycanı beynəlxalq aləmdə daha da tanıtmaq lazımdır.
Vurğulanıb ki, Azərbaycan Konqreslər Bürosu ölkəmizin Beynəlxalq Görüşlər Assosiasiyasındakı yerini möhkəmlətmək və növbəti beş il ərzində ölkənin ən azı ildə 20 beynəlxalq konqresə ev sahibliyi etməsini hədəfləyir.
Tədbir iştirakçıları, ölkəmizin təhsil sisteminin nümayəndələri ilə Azərbaycan Konqreslər Bürosu mütəxəssislərinin qarşılıqlı əməkdaşlığının bu hədəflərə çatmaq yolunda effektiv rol oynayacağını vurğulayıblar.