ELM VƏ TƏHSİL
Azərbaycan Kooperasiya Universitetinin 50 illik yubileyi qeyd olunub
Bakı, 23 noyabr, AZƏRTAC
Azərbaycan Kooperasiya Universitetinin 50 illik yubileyi münasibətilə “Regional iqtisadi siyasət və kooperasiya münasibətlərinin inkişafı” mövzusunda beynəlxalq konfrans keçirilib.
AZƏRTAC xəbər verir ki, yubiley iştirakçıları əvvəlcə Fəxri xiyabanda ümummilli lider Heydər Əliyevin məzarı önünə əklil qoyaraq xatirəsini ehtiramla yad ediblər.
Görkəmli oftalmoloq alim, akademik Zərifə xanım Əliyevanın da xatirəsi anılıb.
Sonra Şəhidlər xiyabanına gələn Kooperasiya Universitetinin kollektivi Azərbaycanın müstəqilliyi və ərazi bütövlüyü uğrunda canlarından keçən qəhrəman Vətən övladlarının xatirəsini yad edib, “Əbədi məşəl” abidəsi önünə əklil qoyub.
Konfransda iqtisadi siyasət məsələləri üzrə dövlət müşaviri Vahid Axundov universitetin 50 illik yubileyi münasibətilə Prezident İlham Əliyevin mərasim iştirakçılarına təbrik məktubunu oxuyub.
Bildirilib ki, dövlətimizin başçısının Sərəncamı ilə universitetin 12 nəfər əməkdaşı ali mükafatlara layiq görülüb.
Universitetin rektoru, Milli Məclisin deputatı Eldar Quliyev dövlətimizin başçısının təbrik məktubunu təhsil işçilərinə göstərilən diqqət və qayğının təcəssümü kimi səciyyələndirib.
E.Quliyev Prezident İlham Əliyevin və xanımı, Heydər Əliyev Fondunun prezidenti Mehriban Əliyevanın gənclərin savadlı və bilikli kadr kimi yetişməsinə böyük önəm verdiklərini vurğulayaraq, bu istiqamətdə həyata keçirilən siyasətin uğurlu nəticələrindən bəhs edib.
Konfransda çıxış edən təhsil nazirinin müavini Firudun Qurbanov bildirib ki, universitetin 50 illik yubileyi münasibətilə Təhsil Nazirliyi tərəfindən bu ali məktəbin bir qrup əməkdaşı fəxri diplomlara layiq görülüb.
Milli Məclisin iqtisadi siyasət komitəsinin sədri Ziyad Səmədzadə iqtisadiyyatın müxtəlif sahələri üçün kadr hazırlığında Kooperasiya Universitetinin xidmətlərindən danışıb.
Bakı Dövlət Universitetinin rektoru, Milli Məclisin deputatı Abel Məhərrəmov, parlamentin aqrar siyasət komitəsinin sədri Eldar İbrahimov universitetin kollektivini yubiley münasibətilə təbrik ediblər.
Konfransda iştirak edən Türkiyə, Ukrayna, Gürcüstan və digər ölkələrdən qonaqlar Azərbaycanda gedən sürətli iqtisadi inkişafın təhsilə də təsir göstərdiyini, gənclərin daha bilikli kadr kimi yetişmələrinə böyük imkanlar açdığını diqqətə çatdırıblar.
Sonda universitetin dövlətimizin başçısının Sərəncamı ilə təltif edilən əməkdaşlarına ali mükafatlar təqdim edilib.