SİYASƏT
Azərbaycan-Kosta-Rika əlaqələri inkişaf edir
Bakı, 2 iyun, AZƏRTAC
Azərbaycanın xarici işlər naziri Elmar Məmmədyarov iyunun 1-2-də Kosta-Rika Respublikasına rəsmi səfəri çərçivəsində bu ölkənin prezidenti Luis Guillermo Solis tərəfindən qəbul edilib.
Xarici İşlər Nazirliyinin mətbuat xidmətindən AZƏRTAC-a bildirilib ki, Elmar Məmmədyarov Azərbaycan Respublikasının Prezidenti İlham Əliyevin salamlarını və xoş arzularını Prezident Luis Guillermo Solisə çatdırıb. Öz növbəsində, Prezident Luis Guillermo Solis ən xoş arzularının Prezident İlham Əliyevə çatdırılmasını xahiş edib.
Səfər çərçivəsində xarici işlər nazirləri Elmar Məmmədyarov və Manuel Gonzalez Sanz geniş tərkibdə görüş keçirib. 2002-ci il sentyabrın 16-da Nyu-York şəhərində imzalanmış “Azərbaycan Respublikasının Xarici İşlər Nazirliyi və Kosta-Rika Respublikasının Xarici İşlər və Etiqad Nazirliyi arasında siyasi məsləhətləşmələr mexanizminin yaradılmasına dair Anlaşma Memorandumu”na uyğun olaraq siyasi məsləhətləşmələr aparılıb.
Siyasi məsləhətləşmələr çərçivəsində nazirlər ikitərəfli münasibətlərin cari statusunu nəzərdən keçiriblər və Kosta-Rika ilə Azərbaycan arasında diplomatik münasibətlərin qurulmasının 20 illiyinin qeyd olunduğunu deyərək, keçən dövr ərzində siyasi dialoq və qarşılıqlı anlaşmanın müsbət inkişafından məmnunluq ifadə ediblər.
Nazirlər Kosta-Rika ilə Azərbaycan arasında dostluq və əməkdaşlıq əlaqələrinin inkişaf etdirilməsi baxımından qarşılıqlı səfərlərin önəmini qeyd edərək, bu xüsusda Manuel Gonzalez Sanzın 2015-ci il 20 oktyabr tarixində Azərbaycan Respublikasına rəsmi səfərini xoş təəssüratlarla xatırlayıblar.
Elmar Məmmədyarov Kosta-Rikanın Azərbaycanda səfirlik təsisetmə qərarının yüksək qiymətləndirildiyini diqqətə çatdırıb. Nazirlər hər iki ölkədə diplomatik missiyaların mübadiləsinin qarşılıqlı əməkdaşlığın gücləndirilməsinə yeni təkan verəcəyinə əminlik ifadə ediblər.
Nazirlər ölkələrimizin bir-birinin ərazi bütövlüyü, suverenliyi və beynəlxalq səviyyədə tanınmış sərhədlərinin toxunulmazlığına qarşılıqlı hörmət və dəstəyi bir daha bəyan ediblər. Onlar, həmçinin gücdən istifadə ilə dövlətlərin beynəlxalq səviyyədə tanınmış sərhədlərinin dəyişdirilməsi cəhdlərinin qəbuledilməz olduğunu vurğulayıblar.
Manuel Gonzalez Sanz Kosta-Rikanın Ermənistan-Azərbaycan münaqişəsinin BMT Təhlükəsizlik Şurasının müvafiq qətnamələrinə uyğun olaraq, Azərbaycanın beynəlxalq səviyyədə tanınmış sərhədləri çərçivəsində ərazi bütövlüyü və suverenliyi əsasında nizamlanmasını tam dəstəklədiyini bəyan edib.
Nazirlər iqtisadi-ticarət, turizm, enerji, logistika, limanlar və gəmiçilik, sərmayələrin qoyuluşu və humanitar sahələrdə qarşılıqlı faydalı əməkdaşlıq üçün geniş imkanlar olduğunu qeyd ediblər. Bu xüsusda, Diplomatik Akademiyalar arasında əməkdaşlıq, tələbə və alim mübadiləsi xüsusilə vurğulanıb.
Tərəflər hazırkı ticarət dövriyyəsinin iki ölkənin potensialını əks etdirmədiyini bildiriblər və ticarət əlaqələrinin inkişaf etdirilməsi üçün iki ölkənin biznes icmaları arasında birbaşa təmasların qurulmasının təşviqi barədə ortaq mövqelərini bölüşüblər. Daha sonra onlar təmsil etdikləri ölkələrdə Azərbaycan və Kosta-Rika haqqında ictimai məlumatlılığın artırılması baxımından ictimai diplomatiya və mədəni tədbirlərin rolunu diqqətə çatdırıblar. Həmçinin bu kimi səylərin turist axınına töhfə verəcəyini əlavə ediblər.
Nazirlər, həmçinin ikitərəfli münasibətlərin irəlilədilməsi baxımından parlament diplomatiyasının xüsusi rol oynadığını bildirərək, parlament nümayəndə heyətlərinin mübadiləsi barədə ortaq təşəbbüslə çıxış ediblər.
Tərəflər beynəlxalq aləmdə baş verən hadisələr ətrafında geniş müzakirələr apararaq, qlobal məsələlərə münasibətdə Azərbaycan və Kosta-Rikanın ortaq baxışları bölüşdüyünü və beynəlxalq hüququn norma və prinsiplərinə uyğun olaraq, regional və qlobal sülhün qorunub saxlanılması məqsədilə qanunlara əsaslanan beynəlxalq nizamın gücləndirilməsinə sadiqliyini bəyan ediblər.
Mühüm beynəlxalq tədbirlər əsnasında görüşlərini xatırlayan nazirlər bu xüsusda beynəlxalq təşkilatlar çərçivəsində əməkdaşlıq və dayanıqlı qarşılıqlı dəstək təcrübəsinin təqdirəlayiq hal olduğunu bildiriblər.
Nazirlər “Diplomatik, xidməti və rəsmi pasporta malik şəxslərin vizadan azad edilməsi haqqında razılaşma”nı imzalayıb və iki ölkə arasında, xüsusilə iqtisadi və humanitar sahədə müqavilə-hüquq bazasının gücləndirilməsi baxımından səylərin davam etdirilməsi barədə razılığa gəliblər. Həmçinin nazirlər siyasi məsləhətləşmələrin növbəti raundunun Bakıda keçirilməsi haqqında razılıq əldə ediblər.