MƏDƏNİYYƏT
Azərbaycan Kuala Lumpur Beynəlxalq Sənətkarlıq Festivalı “KLICF-2016”da təmsil olunub
Tokio, 29 noyabr, AZƏRTAC
Azərbaycan Malayziyanın Mədəniyyət və Turizm Nazirliyinin təşkilatçılığı ilə keçirilən Kuala Lumpur Beynəlxalq Sənətkarlıq Festivalı “KLICF-2016”da yüksək səviyyədə təmsil olunub.
Noyabrın 24-dən 27-dək keçirilən festivalda Azərbaycan da daxil olmaqla, 24 ölkədən nümayəndələr iştirak ediblər.
Festivalda iştirakçı ölkələrin milli sənətkarlıq, toxuculuq nümunələri, bəzək əşyaları, rəsm, keramika işləri və şirniyyatları nümayiş etdirilib. Həmçinin əl işlərinin və sənətkarlıq nümunələrinin satışı təşkil olunub.
“KLICF-2016” Beynəlxalq Festivalında Azərbaycan səfirliyinin dəstəyi və Mədəniyyət və Turizm Nazirliyinin xətti ilə əl işləri sənəti ustası Pərvanə Eyyubova iştirak edib. P.Eyyubova Azərbaycan səfirliyi üçün ayrılmış pavilyonda ona məxsus olan müxtəlif növ əl işlərini, o cümlədən dəri üzərində sənət əsərləri, şüşə və çini qablar üzərində işləmələr, araxçınlar, buta şəklində bəzək əşyaları və kəmərləri, milli gəlincikləri, ipək kəlağayıları nümayiş etdirib. P.Eyyubova milli ornamentlərlə xınayaxma ustası kimi də ziyarətçiləri heyrətləndirib.
Azərbaycan pavilyonunda, həmçinin ölkəmizin mədəniyyəti, tarixi, turizm imkanları haqqında jurnal və bukletlər, sənətkarlıq nümunələri və suvenirlər, milli geyimlər və şirniyyatlarımız nümayiş etdirilib. Azərbaycan pavilyonunu ziyarət edənlərə milli suvenirlər, şirniyyatlar, ölkəmiz haqqında ingilis dilində nəşr olunmuş jurnallar hədiyyə edilib. Pavilyonumuzda sərgilənənlər ziyarətçilərin böyük marağına səbəb olub.
Azərbaycan tarixi, mədəniyyəti, adət-ənənələri, turizm məkanları, milli mətbəxi haqqında maraqlananların sualları ətraflı cavablandırılıb.
“KLICF-2016” Beynəlxalq Festivalının rəsmi açılış mərasimində iştirak edən ölkələrə, o cümlədən Azərbaycan səfirliyinə sertifikat təqdim olunub.
Əl işləri sənətkarı Pərvanə Eyyubova “KLICF-2016” Beynəlxalq Festivalı çərçivəsində Malayziyanın TV9 kanalının “Nasi Lemak” səhər proqramında canlı yayımda əl işlərini nümayiş etdirib. Malay dilində efirə gedən proqramın aparıcısı Azərbaycanda əl işləri sənətinin inkişafı və ölkəmizin mədəniyyəti barədə tamaşaçılara məlumat verib.
Vüqar Ağayev
AZƏRTAC-ın xüsusi müxbiri
Tokio