SİYASƏT
Azərbaycan Maarifçi Gənclər Təşkilatı Ermənistan ordusunun Alxanlıdakı hərbi cinayətini pisləyib
Bakı, 13 iyul, AZƏRTAC
Azərbaycan Maarifçi Gənclər Təşkilatı (AMGT) Füzuli rayonunun Alxanlı kəndinin sakinləri Sahibə Allahverdiyevanın və onun 2 yaşlı nəvəsi Zəhra Quliyevanın Ermənistan silahlı qüvvələri tərəfindən vəhşicəsinə qətlə yetirilməsi ilə bağlı bəyanat yayıb.
AZƏRTAC xəbər verir ki, dinc sakinlərin, o cümlədən iki yaşlı körpənin qətlə yetirilməsinin şiddətlə qınandığı bəyanatda Ermənistanın təcavüzkar siyasəti nəticəsində Azərbaycan torpaqlarının 20 faizinin işğal edilməsi və bir milyondan artıq azərbaycanlının qaçqın və məcburi köçkün vəziyyətinə düşməsinə səbəb olan Ermənistan-Azərbaycan, Dağlıq Qarabağ münaqişəsinin otuz ilə yaxın müddətdə həllini tapmadığı vurğulanıb. Qeyd edilib ki, münaqişənin nizamlanması, bölgədə sülhün və əmin-amanlığın bərqərar olunması üçün çoxsaylı təşəbbüslərə, mötəbər beynəlxalq təşkilatların qərar və qətnamələrinə baxmayaraq, Ermənistanın destruktiv mövqeyi problemin həllinə doğru addım atmağa imkan vermir. Son illər dünyanın bir sıra nöqtələrindəki münaqişələrlə bağlı nüfuzlu beynəlxalq təşkilatların prinsipial mövqeyi sayəsində həmin problemlərin həlli ilə bağlı irəliləyişlərin əldə edilməsi Ermənistan-Azərbaycan münaqişəsinin həlli məsələsində dünya birliyinin eyni prinsipiallığı nümayiş etdirmədiyini söyləməyə əsas verir. BMT, ATƏT, Avropa Şurası, Avropa İttifaqı və digər qurumların Azərbaycanın ərazi bütövlüyü ilə bağlı bəyanatlarına baxmayaraq, onlar münaqişənin nizamlanması prosesində təcavüzkar Ermənistanı konstruktivliyə sövq etmək üçün heç bir təzyiq göstərmirlər. Nəticədə Ermənistan-Azərbaycan, Dağlıq Qarabağ münaqişəsinin həlli uzanır, dinc insanların qətlə yetirilməsi davam edir.
“Sonuncu hadisə, xüsusilə də 2 yaşlı Zəhranın amansızlıqla qətlə yetirilməsi hətta müharibə qanunlarına da uyğun gəlmir. Bu, insanlığa sığmayan cinayətdir. Bütün dünya bunu görməli, bilməli və bu cinayətə səssiz qalmamalıdır. Azərbaycan Maarifçi Gənclər Təşkilatı BMT-ni, ATƏT-in Minsk qrupunun həmsədrlərini, Avropa Şurasını və digər beynəlxalq təşkilatları Ermənistan-Azərbaycan, Dağlıq Qarabağ münaqişəsinin tezliklə və ədalətli şəkildə nizamlanmasına nail olmaq üçün bütün imkanlardan istifadə etməyə çağırır. Əks təqdirdə 2 yaşlı Zəhra və gələcəkdə, təəssüf ki, baş verəcəyi labüd olan dinc insanların qətli hallarına görə beynəlxalq birlik də məsuliyyət daşıyır”, - deyə bəyanatda xüsusi vurğulanıb.