Naxçıvan, 19 dekabr, Rauf Əliyev, AZƏRTAC

Naxçıvanda keçirilmiş Azərbaycan Memarlar İttifaqı İdarə Heyətinin II Plenumunun iştirakçıları Naxçıvan Dövlət Universitetinin memarlıq və mühəndislik fakültəsində olublar.

AZƏRTAC xəbər verir ki, universitetin tədris işləri üzrə prorektoru, filologiya üzrə fəlsəfə doktoru, dosent Surə Seyid qonaqları salamlayaraq ali məktəbin strukturu, təşəkkülü, inkişafı, professor–müəllim heyəti və tələbə kontingenti barədə geniş məlumat verib.

Qeyd olunub ki, Naxçıvan Muxtar Respublikası Ali Məclisinin Sədri Vasif Talıbovun ali təhsilin inkişafına göstərdiyi diqqət və qayğı sayəsində universitetin 110 hektarlıq ərazisində ucaldılan bir-birindən yaraşıqlı tədris korpusları müasir memarlıq kompleksi kimi diqqəti cəlb edir. Burada digər ixtisaslar kimi, memarlıq ixtisası da dünya standartlarına cavab verəcək səviyyədə, müasir informasiya-kommunikasiya texnologiyalarından istifadə yolu ilə tədris olunur.

Qonaqlar auditoriyalarda, “Memarlıq və incəsənət tarixi” kabinəsində və sərgi salonunda tədris prosesi, tələbə-memarların yeni layihələri ilə tanış olublar. Memarlıq və mühəndislik fakültəsinin dekanı, texnika üzrə elmlər doktoru Cavanşir Zeynalov buradakı maket və kompozisiyalar barədə onları ətraflı məlumatlandırıb.

Memarlıq ixtisasının tələbələri ilə görüş zamanı Azərbaycan Memarlıq və İnşaat Universitetinin beynəlxalq əlaqələr üzrə prorektoru, memarlıq doktoru, professor Nərgiz Abdullayeva Azərbaycanın zəngin memarlıq ənənələrindən, Naxçıvan memarlıq məktəbinin dünyada məşhur nümunələrə malik olmasından, müasir memarlıq və şəhərsalma sahəsində qazanılan nailiyyətlərdən bəhs edib. Onun çıxışında universitetlərarası təcrübə mübadiləsi, müştərək layihələrin təşkili ilə bağlı maraqlı təkliflər səsləndirilib. Nərgiz Abdullayeva gənc memarları Azərbaycan Memarlar İttifaqının yeni yaradılan Naxçıvan Bölməsinin fəaliyyətində yaxından iştirak etməyə çağırıb.

Azərbaycan Memarlar İttifaqı İdarə Heyətinin sədri, Əməkdar Memar Elbay Qasımzadə memarlığın inkişafına qayğı ilə yanaşan ümummilli lider Heydər Əliyevin Vətəni, sivilizasiyanın beşiyi Naxçıvanda qədim və orta əsrlər dövrünə məxsus nadir tarixi abidələrin olmasından danışıb, qurumun Naxçıvanda keçirilən növbəti Plenumunun memarlığın inkişafı və memarlar arasında qarşılıqlı əlaqələrin qurulması baxımından faydalı olacağını qeyd edib.

Azərbaycan Memarlıq və İnşaat Universitetinin professoru Ramiz Əbdülrəhmanov memarlıq ixtisasının tədrisi ilə bağlı əməkdaşlığın əhəmiyyətindən bəhs edib, müasir Azərbaycanın gələcəkdə daha füsunkar və gözəl görünməsinə xidmət etməsi üçün tələbələrə zəngin bilik və təcrübəyə yiyələnməyi arzulayıb, sərgidəki işləri yüksək qiymətləndirib.

Sonda Azərbaycanın tanınmış memarları kafedraya və tələbələrə beşcildlik “Azərbaycan memarlıq tarixi” kitabını, monoqrafiya və dərsliklər hədiyyə ediblər.

Naxçıvan Dövlət Universitetinin memarlıq kafedrasının müdiri, memarlıq üzrə fəlsəfə doktoru, dosent Qadir Əliyev və memarlıq üzrə fəlsəfə doktoru, dosent Gülnarə Qənbərova da müəllifləri olduqları yeni elmi nəşrləri həmkarlarına təqdim ediblər.