Bakı, 6 mart, P.İmanova, T.Ağayeva, AZƏRTAC

Martın 6-da Azərbaycan Memarlıq və İnşaat Universitetinin (AMİU) memarlıq fakültəsinin tədris binasının əsaslı təmirdən sonra açılışı olub.

AZƏRTAC xəbər verir ki, açılış mərasimində təhsil naziri Mikayıl Cabbarov çıxış edərək ölkəmizdə elm və təhsilin inkişafına göstərilən dövlət qayğısından, bu sahədə həyata keçirilən islahatlardan, dövlət proqramlarından söz açıb.

M.Cabbarov milli təhsilimizin inkişafında Prezident İlham Əliyevin “Azərbaycan Respublikasında təhsilin inkişafı üzrə Dövlət Strategiyası”nın təsdiq edilməsi haqqında 2013-cü il 24 oktyabr tarixli Sərəncamının əhəmiyyətini xüsusilə vurğulayıb. Dövlət Strategiyasına uyğun olaraq təhsil müəssisələrinin yenidən qurulması, onların maddi-texniki bazasının gücləndirilməsi istiqamətində işlərin genişləndiyini qeyd edən nazir təhsilalanlar üçün yaradılan şəraitin ölkəmizin müasir kadrlara olan tələbatının ödənilməsinə, yüksək səviyyəli mütəxəssislərin hazırlanmasına töhfə verəcəyini söyləyib. Bildirilib ki, bu gün ölkəmizdə tədris ocaqları üçün yeni binalar inşa olunarkən və ya tikililər əsaslı təmir edilərkən həmin təhsil müəssisələrində müasir informasiya-kommunikasiya texnologiyalarının tətbiqinə imkan verən infrastrukturun yaradılması prioritet hədəf kimi qarşıya qoyulur.

Təhsil naziri AMİU-nun memarlıq fakültəsinin tədris binasının əsaslı təmirdən sonra yenidən istifadəyə verilməsinin gələcəkdə peşəkar memarlar nəslinin hazırlanmasına və formalaşmasına böyük töhfələr verəcəyinə əminliyini bildirib. Qeyd edilib ki, təhsil sisteminin maddi-texniki bazasının gücləndirilməsi, bu sistemə XXI əsrə uyğun tədris metodikalarının tətbiqi qarşıda duran əsas vəzifələrdəndir. Prezident İlham Əliyevin təhsilin inkişafına göstərdiyi diqqət və qayğı təsdiqləyir ki, bu mühüm amil dövlət siyasətinin əsas prinsiplərini təşkil edir. Son illər müasir məktəb binaları tikilir, təhsil müəssisələri üçün yeni korpuslar inşa olunur, onların maddi-texniki bazası gücləndirilir.

Tədbirdə AMİU-nun rektoru, Milli Məclisin deputatı, professor Gülçöhrə Məmmədova qədim tarixə malik binanın təmir edilərək yenidən istifadəyə verilməsinin ölkənin təhsil sistemi, pedaqoji kollektiv üçün əlamətdar hadisə olduğunu qeyd edib. Binanın tarixi barədə məlumat verən rektor bildirib ki, burada əsaslı tikinti işləri müasir infrastrukturun yaradılması üçün tələb olunan qaydalara uyğun aparılıb. Ümumi sahəsi dörd min kvadrat metrdən çox olan yeni binada 20 auditoriya, kompyuter otağı, kitabxana, elektron oxu zalı, konfrans otağı yaradılıb.

G.Məmmədova təhsil ocaqlarının infrastrukturunun yaxşılaşdırılmasının, maddi-texniki bazanın müasirləşdirilməsinin təlim-tədrisin keyfiyyətinə əhəmiyyətli dərəcədə təsir etdiyini vurğulayıb. Bildirilib ki, ölkəmizdə yeni təhsil müəssisələrinin əsaslı təmir və yenidənqurmadan sonra istifadəyə verilməsi dövlətimizin bu sahəyə olan diqqət və qayğısının parlaq nümunəsidir.

Rektor, həmçinin son illər bu istiqamətdə universitetdə görülən işlər, həyata keçirilən layihələr barədə ətraflı məlumat verib.

Sonra qonaqlar AMİU-nun tədris binasında əsaslı təmirdən sonra yaradılan şəraitlə tanış olublar.