ELM VƏ TƏHSİL


Azərbaycan Memarlıq və İnşaat Universitetinin tələbəsi “Azercell”in təqaüd proqramının qalibi olub

Bakı, 10 yanvar, AZƏRTAC

Azərbaycanın akademik potensialının yüksəlməsinə daim dəstək olan Azercell Telekom MMC-nin 2008-ci ildən start verdiyi Tələbə Təqaüd Proqramının növbəti qalibləri müəyyənləşdirilib. Şirkətin ötən il oktyabrın 1-də elan etdiyi proqram üzrə son seçimlərin nəticələrinə görə, Azərbaycan universitetlərində təhsil alan 27 tələbə “Azercell”in təqaüdçüsü adına layiq görülüb. Bu tələbələr ali təhsillərinin sonunadək “Azercell” şirkətindən 200 manat məbləğində aylıq təqaüd almaqla yanaşı, telekommunikasiya sahəsinə dair biliklərini artırmaq, şirkətin korporativ tədbirlərinə dəvət almaq, müxtəlif təlimlərdə iştirak və şirkətdə təcrübə keçmək imkanı əldə edəcəklər.

Azərbaycan Memarlıq və İnşaat Universitetindən (AzMİU) AZƏRTAC-a bildiriblər ki, bu ali məktəbin “SABAH” qruplarının memarlıq ixtisası üzrə təhsil alan üçüncü kurs tələbəsi Təhminə Əzimzadə “Azercell”in təqaüd proqramının qalibi olub. O, bu proqrama “SABAH” qrupları rəhbərliyinin təşəbbüsü ilə qatılıb.

Tələbə Təqaüd Proqramının seçimləri ikimərhələli olub. Ötən il noyabrın 1-dən 10-dək davam edən birinci seçim mərhələsində tələbələrin online rejimdə təqdim etdikləri ərizələrin və sənədlərin dəyərləndirilməsi, ikinci mərhələdə (14 noyabr - 27 dekabr) onların məntiqi və ingilis dili bilikləri yoxlanılıb. Bundan əlavə, tələbələr “Azercell”in İQ mütəxəssisləri və digər departamentlərinin rəhbərləri tərəfindən keçirilən müsahibələrdə iştirak ediblər. Tələbələr akademik bilikləri, dünya görüşü, elmə və təhsilə həvəs və s. meyarlar əsasında dəyərləndirilib.

Məlumat üçün qeyd edək ki, bu vaxtadək Azərbaycanın müxtəlif universitetlərində təhsil alan 120-dən çox tələbə “Azercell”in təqaüdçüsü adına layiq görülüb.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.