ELM VƏ TƏHSİL
Azərbaycan Milli Elmlər Akademiyasının nümayəndə heyəti İsraildə səfərdədir
Bakı, 24 fevral, AZƏRTAC
Azərbaycan Milli Elmlər Akademiyasının (AMEA) prezidenti, akademik Akif Əlizadənin rəhbərlik etdiyi nümayəndə heyəti İsraildə səfərdədir.
AMEA-dan AZƏRTAC-a bildiriblər ki, İsrail Təbiət və Humanitar Elmlər Akademiyasının (İTHEA) rəhbərliyi ilə keçirilən görüşdə akademik Rut Arnon 1961-ci ildə Qüdsdə yaradılmış İTHEA-nın tarixi haqqında qonaqlara məlumat verib. Qeyd edilib ki, İTHEA İsrailin yüzdən artıq tanınmış alimini bir araya gətirib, həmçinin ölkənin geologiyası, flora və faunasının öyrənilməsi, Talmud, yəhudi fəlsəfəsi, ədəbiyyatı və s. araşdırılmasına yönəlmiş layihələri maliyyələşdirir.
Akademik R.Arnon bildirib ki, İTHEA müxtəlif beynəlxalq layihələrdə iştirak edir, həmçinin Eynşteyn Təqaüd Fonduna rəhbərliyi həyata keçirir.
Görüşdə akademik Akif Əlizadə AMEA-nın 70 illik tarixi barədə ətraflı məlumat verib.
Sonra Azərbaycanda fundamental elmlərin inkişafı, AMEA-nın strukturu, respublikada elmə və alimlərə göstərilən diqqət və qayğıdan bəhs edən videoçarx nümayiş olunub.
AMEA və İTHEA arasında elm və texnologiya sahəsində birgə əməkdaşlıq haqqında saziş imzalanıb.
Daha sonra AMEA-nın nümayəndə heyətinin iştirakı ilə İsrailin ən iri elm və təhsil mərkəzi, dünyanın ən yaxşı universitetlərinin siyahısında ilk yüzlüyə daxil olan Qüds Universitetində görüş keçirilib. AMEA-nın nümayəndə heyəti İsrailin ilk təhsil müəssisəsinin prorektoru, doktor Oron Şaqrif ilə görüşüb, universitetin laboratoriyaları ilə yaxından tanış olublar.
Səfər çərçivəsində alimlərimiz Qüds şəhərinin görməli yerlərindən olan İbadət dağını, İslam mədəniyyətinə məxsus Qübbətüs-Səhra və əl-Əqsa məscidlərini də ziyarət ediblər.
AMEA-nın vitse-prezidenti, akademik İbrahim Quliyev, Yer Elmləri Bölməsinin akademik-katibi, akademik Fəxrəddin Qədirov və digər alimlərdən ibarət nümayəndə heyətinin İsrailə səfəri davam edir.