Pəncab, 28 noyabr, AZƏRTAC 

Azərbaycan Respublikasının Pakistan İslam Respublikasındakı səfiri Daşqın Şikarov ölkənin Pəncab əyalətinə səfəri çərçivəsində bir sıra görüşlər keçirib.

Əyalətin qubernatoru senator Malik Məhəmməd Rafiq Racvana ilə görüşdə səfir Azərbaycan Prezidenti İlham Əliyevin rəhbərliyi ilə ölkəmizdəki iqtisadi tərəqqi, qeyri-neft sektorunun, xüsusilə, turizmin sürətli inkişafı barədə məlumat verib. O, Azərbaycan və Pakistan arasında münasibətlərin ən yüksək səviyyədə olmasından qürur duyduğunu qeyd edib, bu münasibətlərin tarixi, dini və mədəni əsaslara söykəndiyini bildirib. Diplomat Azərbaycanın birinci xanımı, Heydər Əliyev Fondunun prezidenti Mehriban Əliyevanın təşəbbüsü və dəstəyi ilə Pakistanın bütün əyalətlərində həyata keçirilən humanitar və sosial layihələrin iki qardaş ölkə arasında əlaqələrin inkişafına xüsusi töhfə verdiyini bildirib. Səfir 2012–ci ildə Pakistan Senatının Xocalı soyqırımını tanıması və bu soyqırımını törədənlərin məsuliyyətə cəlb olunması, həmçinin 2013-cü ildə Azərbaycanın ərazi bütövlüyünün dəstəklənməsi və Ermənistanın işğal olunmuş Azərbaycan torpaqlarından qeyd-şərtsiz çıxmasının tələb olunması ilə bağlı qətnamələrin qəbul edilməsinin yüksək qiymətləndirildiyini vurğulayıb. O, Pakistanın hər zaman haqq-ədalət yanında olduğunu deyib və bu günə qədər Pakistanın Ermənistan ilə heç bir diplomatik münasibətlər qurmadığına görə təşəkkürünü bildirib.

Qubernator M.M.Racvana Pakistanın Azərbaycana olan xüsusi rəğbətini bir daha vurğulayıb, siyasi əlaqələrin yüksək səviyyədə olduğunu qeyd edib. O, Pakistanın Dağlıq Qarabağ məsələsində daim Azərbaycanı dəstəklədiyini və hər zaman da dəstəkləyəcəyini vurğulayıb. Qubernator Azərbaycan-Pakistan iqtisadi əlaqələrinin qısa zamanda siyasi əlaqələr səviyyəsinə çatdırılacağına əmin olduğunu bildirib.

D.Şikarov iki ölkə arasında iqtisadi əlaqələrin yaxşılaşdırılmasının hazırda prioritet məsələ olduğunu bildirib, bu istiqamətdə artıq işlərin görüldüyünü qeyd edib. Səfir əmin olduğunu bildirib ki, ölkələrimiz arasında iqtisadi əlaqələr siyasi münasibətlər səviyyəsinə çatdırılacaq.

Sənaye və ticarət palatasının prezidenti Şeyx Məhəmməd Ərşad ilə görüşdə səfir D.Şikarov Azərbaycanda əldə edilən iqtisadi nailiyyətlər, ölkəmizdə xarici investorlar üçün yaradılan münbit şərait barədə söhbət açıb, pakistanlı iş adamlarını Azərbaycana səfərə dəvət edib.

Səfir Bakı-İslamabad birbaşa hava reysinin artıq fəaliyyət göstərdiyini, bunun iqtisadi əlaqələrə təkan verəcəyini vurğulayıb. O, Azərbaycanın əsas ixrac mallarının enerji resursları olduğunu və Pakistanın enerji qıtlığından əziyyət çəkdiyini qeyd edərək bununla bağlı uğurlu işlərin görülə biləcəyini söyləyib. Həmçinin Pakistandan düyü, şəkər, idman məhsulları və digər malların Azərbaycana ixrac potensialı qeyd edilib.

Gömrük və vergilər naziri Mujtaba Şuja-ur-Rehman ilə keçirilən görüşdə səfir Azərbaycanın gömrük və vergi sistemi haqqında ətraflı məlumat verib, həmçinin Azərbaycan məhsullarının Pakistana ixracı məsələsində gömrük və vergi güzəştlərinin tətbiq olunmasını xahiş edib.

Qeyd edək ki, 90 milyon əhalisi olan Pəncab nüfuzuna görə Pakistanın ən böyük əyalətidir.

Qulu Kəngərli

AZƏRTAC-ın xüsusi müxbiri

Pəncab