SİYASƏT
Azərbaycan Prezidentinin məcburi köçkünlərlə bağlı Sərəncamı onların sosial təminatının daha da yaxşılaşmasına xidmət edir
Bakı, 24 yanvar, AZƏRTAC
Prezident İlham Əliyev dəfələrlə bildirib ki, Azərbaycanda dövlət siyasətinin prioritetini insanların yüksək rifah halı və firavan yaşaması təşkil edir. Bu, demək olar ki, müasir Azərbaycan dövlətinin sosial-iqtisadi siyasətinin əsas xəttini təşkil edir. Dövlətimizin başçısı verdiyi bütün qərarlarda ilk olaraq insanları düşünür.
Bu sözləri AZƏRTAC-a açıqlamasında Yeni Azərbaycan Partiyası (YAP) Nizami rayon təşkilatının sədri, Milli Məclisin deputatı Sədaqət Vəliyeva deyib.
Deputat vurğulayıb ki, dövlətimizin başçısı İlham Əliyev hər bir azərbaycanlının Prezidenti kimi xalqımızın ona göstərdiyi etimadı fəaliyyəti boyunca doğruldur. Elə məcburi köçkünlər və onlara bərabər tutulan şəxslər üçün vahid aylıq müavinətin müəyyən edilməsi haqqında Fərman da dediklərimizin bir nümunəsi oldu. Prezident İlham Əliyevin müvafiq Fərmanından sonra bütün müavinətlər hamısı hesablanıb pul formasında məcburi köçkünlərin kartına yüklənəcək və onlar həm yemək xərci, həm də kommunal xidmətlər üçün müavinətləri özləri alacaq və istədikləri kimi vəsaitdən istifadə edəcəklər. Bununla da məcburi köçkünlər heç bir təşkilatdan asılı olmadan vəsaiti özü paylaşdıracaq və belə olan halda kommunal xərclər üçün ayrılmış vəsaitdən az istifadə edən məcburi köçkün ailələri də yerdə qalan məbləği digər ehtiyaclarının ödənilməsinə sərf edəcək. Məhz, Fərmanın da sosial ədalət prinsipi bu amildən qaynaqlanır.
Sədaqət Vəliyeva əlavə edib ki, bu Fərman məcburi köçkünlərin sosial təminatının daha da yaxşılaşmasına xidmət edəcək və bu sahədəki fəaliyyəti daha da şəffaflaşdıracaq.