Bakı, 24 may, AZƏRTAC

Azərbaycan Respublikası Baş Prokurorluğunun “Azərbaycan Prokurorluğu” elmi-praktiki jurnalının 2017-ci il üzrə birinci nömrəsi çapdan çıxıb. Jurnalın birinci nömrəsi cari ilin yanvar-mart aylarını əhatə edir.

AZƏRTAC xəbər verir ki, jurnal Azərbaycan Prezidenti İlham Əliyevin “Seçdiyimiz yol yeganə düzgün yoldur. Bu, müstəqillik yoludur, sabitlik, inkişaf yoludur” sözləri ilə başlayır.

Nəşrin “İctimai-siyasi tədbirlər”, “Rəsmi tədbirlər”, “Təbriklər”, “Digər ölkələrin təcrübəsi”, “Məhkəmə-istintaq təcrübəsi”, “İctimaiyyətə hesabat”, “Beynəlxalq əlaqələr”, “Hüquqi aktlar” bölmələrində maraqlı məlumatlar əksini tapıb.

Jurnalın “İctimai-siyasi tədbirlər” bölməsində Prezident İlham Əliyevin sədrliyi ilə Nazirlər Kabinetinin 2016-cı ilin sosial-iqtisadi inkişafının yekunlarına və qarşıda duran vəzifələrə həsr olunan iclası ilə bağlı informasiya, Mehriban Əliyevanın Azərbaycan Respublikasının Birinci vitse-prezidenti təyin edilməsi haqqında Azərbaycan Respublikası Prezidentinin Sərəncamı, Prezident İlham Əliyevin sədrliyi ilə keçirilən Təhlükəsizlik Şurasının iclası, dövlətimizin başçısının şəhidlərin əziz xatirəsini yad etməsi, Xocalı soyqırımının iyirmi beşinci ildönümü haqqında Azərbaycan Prezidentinin Sərəncamı, Xocalı soyqırımının 25-ci ildönümü ilə əlaqədar Bakıda keçirilən ümumxalq yürüşündə dövlətimizin başçısının iştirakı, Xocalı soyqırımının dünya ictimaiyyətinə çatdırılması istiqamətində Hərbi Prokurorluq tərəfindən səmərəli işlərin görülməsi, Prezident İlham Əliyevin 8 mart – Beynəlxalq Qadınlar Günü münasibətilə Azərbaycan qadınlarına təbriki, dövlətimizin başçısının Novruz bayramı münasibətilə ümumxalq şənliyində iştirakı barədə xəbərlər, “Azərbaycan Respublikası Baş Prokurorluğunun strukturu”nda dəyişikliklər edilməsi haqqında Azərbaycan Prezidentinin Sərəncamı oxucuların diqqətinə çatdırılır.

Jurnalın “Rəsmi tədbirlər” bölməsində Baş Prokurorluqda və Naxçıvan Muxtar Respublikası Prokurorluğunda keçirilən kollegiya iclasları, Baş Prokurorluqda əməliyyat müşavirəsi, Prezidentin Sərəncamından irəli gələn vəzifələrin Baş Prokurorluqda müzakirəsi və digər tədbirlərlə bağlı məlumatlar təqdim olunur.

Bundan başqa, prokurorluq orqanlarında vətəndaşların müraciətlərinə baxılması işinin daim diqqət mərkəzində saxlanılması, habelə Ukraynanın baş prokuroru ilə Azərbaycan Respublikası Baş Prokurorluğunda keçirilən görüş və digər tədbirlər barədə xəbərlər də bu bölmədə yer alıb.

Birinci xanım Mehriban Əliyevanın Azərbaycan Respublikasının Birinci vitse-prezidenti təyin edilməsi ilə əlaqədar baş prokuror Zakir Qaralovun ünvanlandığı təbrik məktubu “Təbriklər” bölməsində oxuculara təqdim edilir.

“Digər ölkələrin təcrübəsi” bölməsində “Rusiyada şəxsin cinayət məsuliyyətinə cəlb edilməsinə mane olan inzibati xəta haqqında iş üzrə məhkəmə qərarı prokurorun protestinə əsasən ləğv edilib”, “Məhkəmə-istintaq təcrübəsi” bölməsində “Azərbaycan Respublikasının işğal olunmuş ərazilərində qondarma rejimin təşviq edilməsi, maddi-mədəni irsin və təbii sərvətlərin talan olunması faktları üzrə cinayət işi başlanıb” və digər sərlövhəli məqalələr verilib.

“İctimaiyyətə hesabat” bölməsində isə “Korrupsiyaya qarşı mübarizə tədbirləri uğurla davam etdirilir”, “İqtisadi Əməkdaşlıq və İnkişaf Təşkilatının Azərbaycan üçün qəbul edilmiş hesabatı təqdim olunub” və digər məlumatlar əksini tapıb.

Ümumilikdə jurnalda Baş Prokurorluğun 2017-ci ilin yanvar-mart ayları ərzində fəaliyyəti dolğun işıqlandırılıb, keçirilən seminarlar, konfranslar, digər tədbirlər, eləcə də qurumun uğurlu beynəlxalq əlaqələri və digər mövzularda maraqlı məqalələr toplanıb.