CƏMİYYƏT


“Azərbaycan Prokurorluğu” elmi-praktiki jurnalının 2017-ci il üzrə ikinci nömrəsi çapdan çıxıb

Bakı, 7 avqust, AZƏRTAC

Azərbaycan Respublikası Baş Prokurorluğunun “Azərbaycan Prokurorluğu” elmi-praktiki jurnalının 2017-ci il üzrə ikinci nömrəsi çapdan çıxıb. Jurnalın ikinci nömrəsi cari ilin aprel-iyun aylarını əhatə edir.

AZƏRTAC xəbər verir ki, jurnal Azərbaycan Prezidenti İlham Əliyevin “Həm ənənələr, tariximiz, mədəniyyətimiz, dinimiz bizim üçün müqəddəsdir, eyni zamanda, biz dünyaya açığıq, müasirik, bütün ölkələrlə yaxşı münasibətlər qurmağa çalışırıq” sözləri ilə başlayır.

Nəşrin “İctimai-siyasi tədbirlər”, “Rəsmi tədbirlər”, “Təhlillər, təkliflər”, “Bizdən soruşurlar”, “İctimaiyyətə hesabat”, “Beynəlxalq əlaqələr” və “Hüquqi aktlar” bölmələrində maraqlı məlumatlar əksini tapıb.

Jurnalın “İctimai-siyasi tədbirlər” bölməsində Prezident İlham Əliyevin sədrliyi ilə Nazirlər Kabinetinin 2017-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclası ilə bağlı informasiya, dövlətimizin başçısının Fəxri xiyabanda ulu öndər Heydər Əliyevin məzarını ziyarət etməsi, ulu öndər Heydər Əliyevin doğum gününə həsr olunan ağacəkmə aksiyasında iştirakı, dahi rəhbərin anadan olmasının 94-cü ildönümünə və Heydər Əliyev Fondunun fəaliyyətinin 13 illiyinə həsr olunan təntənəli mərasimdə iştirakı ilə bağlı xəbərlər yer alıb.

Bu bölmədə, həmçinin IV İslam Həmrəyliyi Oyunlarında Azərbaycan Respublikasının idmançıları və onların məşqçiləri üçün ən yüksək nəticələrə görə mükafatların müəyyən edilməsi haqqında Azərbaycan Respublikası Prezidentinin və Azərbaycan Respublikası Milli Olimpiya Komitəsi Prezidentinin Sərəncamı, dövlətimizin başçısının Bakı Olimpiya Stadionunda IV İslam Həmrəyliyi Oyunlarının təntənəli açılış və bağlanış mərasimlərində, eləcə də IV İslam Həmrəyliyi Oyunlarının qalib idmançıları, onların məşqçiləri və idman ictimaiyyətinin nümayəndələri ilə keçirilən görüşdə iştirakı barədə ətraflı məlumat verilib.

Dövlətimizin başçısının 9 May-Qələbə Günü münasibətilə Bakıda keçirilən mərasimdə, eləcə də 28 May-Respublika Günü münasibətilə rəsmi qəbulda, müqəddəs Ramazan ayı münasibətilə iftar mərasimində iştirakı barədə xəbərlər, həmçinin Prezident İlham Əliyevin Formula-1 Azərbaycan Qran-Prisinin açılış mərasiminə və final yarışına baxması, Bolqarıstanın Baş prokurorunu qəbul etməsi ilə bağlı yazılar oxucuların diqqətinə çatdırılır.

Jurnalın “Rəsmi tədbirlər” bölməsində ümummilli lider Heydər Əliyevin anadan olmasının 94-cü ildönümü münasibətilə Baş Prokurorluqda və Naxçıvan Muxtar Respublikası Prokurorluğunda təşkil olunan tədbirlər, habelə Bakıda İqtisadi Əməkdaşlıq Təşkilatına (ECO) üzv dövlətlərin prokurorluq, ixtisaslaşdırılmış korrupsiyaya qarşı mübarizə qurumlarının rəhbərlərinin və ombudsmanlarının üçüncü iclası ilə bağlı məqalələr yer alıb. Bundan başqa, baş prokuror Zakir Qaralovun görüşləri, “Prokurorluq orqanlarında vətəndaşların müraciətlərinə baxılması işi daim diqqət mərkəzindədir” sərlövhəli yazı, prokurorluq işçiləri növbəti ağacəkmə kampaniyası keçirməsi də bu bölmədə təqdim olunur.

“Təhlillər, təkliflər” bölməsində Azərbaycan Yazıçılar Birliyinin üzvü, prokurorluğun fəxri işçisi, baş ədliyyə müşaviri Cahangir Nəsirovun “Milli cinayət-prosessual qanun norması xarici ölkənin dövlət orqanları üçün prosessual vəzifələr təsbit etmir” sərlövhəli məqaləsi verilib.

Baş Prokurorluğun Elm-Tədris Mərkəzinin rəisi Nazir Bayramovun “Konstitusiya Məhkəməsi ilə Avropa Məhkəməsinin hüquqi mövqeləri arasında məntiqi ziddiyyət yoxdur” sərlövhəli məqalə “Bizdən soruşurlar” bölməsində yer alıb.

“İctimaiyyətə hesabat” bölməsində isə prokurorluq işçilərinin nəzəri bilik və peşə hazırlığı səviyyəsinin elektron test üsulu ilə yoxlanılması, Bolqarıstan prokurorluğunun nümayəndə heyətinin Baş Prokuror yanında Korrupsiyaya Qarşı Mübarizə Baş İdarəsində və Baş Prokurorluğun Elmi-Tədris Mərkəzində olması, Baş Prokurorluqda Avropa Komissiyası ilə birgə tədbirin keçirilməsi və sair barədə məlumatlar əksini tapıb.

Ümumilikdə nəşrdə Baş Prokurorluğun 2017-ci ilin aprel–iyun ayları ərzində fəaliyyəti dolğun işıqlandırılıb, keçirilən seminarlar, konfranslar, Baş prokurorluğun nümayəndə heyətlərinin səfərləri, eləcə də qurumun uğurlu beynəlxalq əlaqələri, hüquqi aktlar və digər mövzularda maraqlı məqalələr toplanıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.